2 Samuel 18

1Deevid yaa wi nuruma ale jam bo le wa la a yaa yeeri kpaga ate ba a nya tusa ale kobsa zuk. 2Deevid yaa basi ate tugurik tɔŋdɔma a nyini ate ba buta Joab a nya ba zuk, ate buta Joab suoku Abisai, Zeruiya nidoabinni a nya ba zuk, ate buta Ittai, Gitti denɔwa a nya ba zuk. Naawa yaa weeni tugurik tɔŋdɔma ayen, <<Mi dek ale sum gɔk santiri a nyini ale ni.>>

3Alege nuruma weeni ayen, <<Ku a fɛ ate fi kan nyini. Ku dan fɛ tama ate ti chali, ba niŋ kan bo ti po. Tama geli a dan poom kpi, ba niŋ kan boro, alege fi a magsi chaab ale ka tama tusa pi (10,000). Yɔgyɔgla de fi dan te ti maarika tɛŋka po a zunchoŋŋa.

4Naawa yaa tulisi ayen, <<Mi le nye dii meena ale nala la a te ni.>> Naawa yaa zaani tuoku nɔi alege ate nuruma meena a gɔk santiri a nyini kobsa ale tusa beŋsa. 5Naawa yaa weeni Joab ale Abisai ale Ittai, <<Ni nye ŋmam ŋmam ale nidoa paalika Absalom mi nyiŋ.>> Ate tugurik tɔŋdɔma meena a wom naawa ale a biisi a magsi chaab ale Absalom a te kpagi meena la.

6Tugurik tɔŋdɔma yaa gɔk santiri a nyini peelimmu po ayen ba kpaliŋ ale Izirali, ate kpaliŋka a nye Ɛfraim tiisaŋa po. 7Dula jigini Deevid nuruma yaa nak de Izirali tugurik tɔŋdɔma, ate nuruma a kpi nna yegayega, tusa pisiye (20,000) meena. 8Kpaliŋka a waaŋ paari tɛŋka nakpiaka meena, ate tiisaŋa a ko nuruba a gaam gebika.

9Yɔgyɔgla de Absalom a yaa zaan pai zik Deevid nuruma. Wa jam do ka wusum boniŋ, wusum boniŋka#18:9 Wusum ale boniŋ ale jueli chaab a biak wusumboniŋ. Wusumboniŋ dek an baga biagi. Ku ta pagrim a tom tuima yegayega kama. 1 Nalima 1:33; Zakaria 14:12 abe le chali va tiib kpiem naŋ tutta po la, tiimu naŋsaŋa yaa yik Absalom zukku, ate wa yik du, alege ate wusum boniŋka a chali.

10Nuruma wanyi ale nya nna la, wa yaa weeni Joab ayen, <<Mi nya Absalom ale wa yik tiib kpiem nyiŋ.>>

11Joab yaa weeni nuruwa ale weeni wa kude la ayen, <<Boa, Fi nya wa? Ka boa ale soa ate fi an nak wa a lɔnsi tɛŋ dula? M te le te fi kpana dobrim ase ligbie pi dobrim la ale tugurik tɔŋdɔ chiak gbain.>>

12Alege nuruwa a tulisi ayen, <<Ba dan poom magsi ligbie dobrim tusidi a pai nyo mi nisima po, mi kan zak nisa a nye wari ale naawa nidoabinni. Tama dek tue po naawa a weeni Abisai ale Ittai kama ayen, <Ni lik nidoa paalika Absalom mi nyiŋ.> 13Mi be dan jam pai m nyuvunni a da kama ate wari an suk ale naawa fi ti jam yalima ale mi kama.>>

14Joab yaa weeni ayen, <<Mi kan yaali ayen m limisi fu nna.>> Wa yaa pai ŋanta ase gbatta la bata wa nisa po a chubi feri Absalom suinummu ale wa diem vua a yiga tiib kpiemu nyiŋ. 15Baai ale a yik Joab kpaliŋ kɔlimaŋa la pi a yaa gilim Absalom, a nak wa a ko.

16Joab yaa peeri damuniŋka ate tugurik tɔŋdɔma a yaa basi Izirali vika, diila Joab ayen ka ba basi. 17Ba yaa pai Absalom a yuk wa basi goluk kpioŋ po tiisaŋa po a pai tintana nna yegayega a vi wa zuk. Dila po, Izirali demma meena yaa chali a kuli ba yeeŋa.

18Absalom ale jam diem boro la wa se ka kpaganiŋ woŋ naawa viaka po a te wadek, diila wa poli kama ayen, <<M ka nidoabili ya ayen wa ta m yuenni ate ba a teeri mu.>> Wa yaa te kpaganiŋ woŋka yuei ayen Absalom jameem a ta jam paari jinla.

19Zadok nidoabinni Ayimaaz yaa weeni ayen, <<Basi ate m chali a ta wapaalaŋa a ga te naawa ayen Naawen a vari wa kama wa dachaasaŋa nisima po a basi.>>

20<<Daa fi ale fi ta wapaalaŋa a cheŋ jinla, <<Joab ale weeni wa diila ale la. <<Fi baga a ta wapaalaŋa a cheŋ da yoŋ kama, alege daa jinla, dii nyiŋla naawa nidoabili ale kpi.>>

21Joab yaa weeni Kus denɔ ayen, <<Cheŋ ga weeni naawa fi le nya diila,>> Kus denɔwa yaa koori tɛŋ a zuli Joab ale chali a cheŋ.

22Zadok nidoabinni Ayimaaz a ŋman weeni Joab ayen, <<Ku dan poom ka dii ya, basi ate mi chali vi Kus denɔwa ŋaaŋ.>> Alege Joab a tulisi ayen, <<M biiga, ka boa ate fi a yaali ayen fi cheŋŋi? Fi ka wapaala ŋaai ale ŋa te fu tutuna.>>

23Wa weeni ayen, <<Ku dan poom ka dii ya, mi a yaali ayen m chali kama.>> Dila Joab yaa weeni ayen, <<Be chali.>> Ayimaaz yaa chali va peelim jassi wa po a chali gaam Kus denɔwa.

24Deevid ale jam diem kala poi po ale peelim tuoku suŋsuŋ la, limisidɔwa a yaa va nansuiŋku a sali parika a jueli ŋmanni. Wa le nya peelim la, wa nya ka nuru ale a chali wadek wa nyiini. 25Limisidɔwa yaa kaari wi naawa a weeni. Naawa yaa weeni ayen, <<Wa dan ka wadek wa nyiini, ku a fɛ ate wa ta ka wapaali maŋsa.>> Alege nuruwa a chali torisi a moata.

26Ate limisidɔwa a ŋman nya nuru wachoa a chali, ate wa wi nansuiŋ limisidɔwa ayen, <<Nya, nuru wachoa ale a chali wadek wa nyini.>> Ate Naawa a weeni ayen, <<Ku a fɛ wa mɛ ta ka wapaala a cheena.>>

27Limisidɔwa yaa weeni ayen, <<Ku a nye mi jigi nna se waai ale dɛ niŋka la a chali ase ka Zadok nidoabinni Ayimaaz la.>> Naawa a weeni ayen, <<Wa ka nuru maŋ. Wa ta ka wapaala a cheena.>>

28Ayimaaz yaa kaari wi naawa a weeni ayen, <<Ku meena nala kama.>> Wa yaa koori naawa niŋ a pai nina a vuk tɛŋ a weeni ayen, <<Pimpauk a cheŋ Naawen fi Wenni jigi. Wa pai nuru baai ale zak ba nisa a ta chaab ale mi nyɔnɔwa naawa la kama a te.>>

29Naawa yaa bek ayen, <<Nidoa paalika Absalom a soa wa dega?>> Ayimaaz yaa tulisi ayen, <<Mi nya ka butimka nna yegayega ase Joab ale boro ayen wa tom naawa tomteerɔwa ale mi, fi tomteerɔwa, alege mi zɛ ku le jam ka diila.>>

30Naawa yaa weeni ayen, <<Zaani nakpiak a limisi dula.>> Wa yaa ga zaani nakpiak dula.

31Ate Kus denɔwa a yaa paari a weeni ayen, <<Mi nyɔnɔwa naawa, wom wapaalaŋa. Naawen jinla vari fu a basi kama a nyini baai meena ale yiti ta chaab ale fu la.>>

32Naawa yaa bek Kus denɔwa ayen, <<Nidoa paalika Absalom a soa wa dega?>> Kus denɔwa yaa tulisi ayen, <<Mi nyɔnɔwa naawa dachaasaŋa ale baai meena ale yiti ta chaab ale naawa la, mi a yaali ayen ba nye ase ka nidoa paalik kala la.>>

33Naawa nyiŋ yaa gɔk. Wa yaa jueli wa dɔkku nansuiŋku ŋmai a kum. Wa le a cheŋ la, wa yaa weeni ayen, <<M biika Absalom! M biiga, m biiga Absalom! Dan ka mi ale poom jɔk kpi alege daa fi. Absalom, m biiga, m biiga!>>

Currently Selected:

2 Samuel 18: BWU

Highlight

Copy

Compare