2 Samuel 20

1Tugurik nuru ale jam boro wa yuei ale Siiba. Wa jam ka Bikri nidoabili a nyini Benjamin buuni a bo dula jigini. Wa yaa peeri damuniŋka a kaari weeni ayen, <<Tama ka wari a nye ale Deevid, ti ka wari ale Jese nidoabinni. Waai meena ale wa viuk, Izirali demma.>>

2Dila nyiŋ Izirali nuruma yaa basi Deevid ale va Siiba, Bikri nidoabinni. Alege Juda nuruma a za ale ba naawa a zaani Jodan a ga paari Jerusalem.

3Deevid ale ŋman cheŋ wa yenni Jerusalem la, wa yaa ta nɔŋta piwa ate wa basi ayen ba a nya naab yenni zuk la a basi ba yeri po ayen limisidɔba a nya ba zuk. Wa jam a nya ba zuk kama, alege an duak ale ba. Ba jam pai ba a basi ka jigi a ta ga paari ba kum. Ba jam boro ase ka pukɔga la.

4Naawa yaa weeni Amasa ayen, <<Wi Juda nuruma ate ba jam mi jigi ase daa ŋata po la, abe fidek bo dela.>> 5Alege Amasa ale cheŋ ayen wa wi Juda la, wa jam beni kama a gaam naawa ale te wa daa diila.

6Deevid yaa weeni Abisai ayen, <<Yɔgyɔgla de Bikri nidoabinni Siiba ale nye ti biem a gaam Absalom ale nye diila. Pai fi kpagni nuruma a vi wa, dan kan daa di wa le nya tɛŋ pagrisa a chali abe wa ge ti.>> 7Joab nuruma ale Keret nuruma ale Pelet nuruma ale tugurik tɔŋdɔ pagrisaŋa meena a yaa nyini ate Abisai a nya ba zuk. Ba gɔk ka santiri a nyini ayen ba vi Bikri nidoabinni Siiba.

8Ba le diem jam bo piuŋ tanjaŋini ale bo Gibeon la, Amasa yaa jam tu ba. Joab jam jo ka wa kpaliŋ garukku, ate chiak gbain a bobi ku a gilim wa chiaka ate gebik a bo fook po a su gbainni nyiŋ. Wa le tabi cheŋ niŋ geŋ la, ka yaa nyini fooku po a lo.

9Joab yaa weeni Amasa ayen, <<Ka sɛ m suokwa?>> Joab yaa pai juga nisa a yik Amasa teeŋka ase wa ayen wa mɔgsi wa nɔi la. 10Amasa an jam a kpesi gebika ale bo Joab nisa po la, ate Joab a pai ka a lu feri wa lɔgni, ate wa nyuetaŋa a nyini lo tɛŋ. Wa an ŋman jam chub wa alege ate Amasa a kpi. Joab ale wa suoku Abisai yaa vi Siiba Bikri nidoabinni.

11Joab nuruma wanyi yaa zaani Amasa gauŋ a weeni ayen, <<Waai ale ŋmani a te Joab la, ate waai mɛ a bo le Deevid la, basi ate wala a va Joab. 12Amasa yaa jam dua ziimu po a labinti manpanni suŋsuŋ, ate nuruwa nya ayen tugurik tɔŋdɔma meena a jam zimsi ka dula. Wa le miŋ ayen waai meena ale jam Amasa jigi la a wari za kama la, wa yaa vuuri wa a ta nyini manpanni po a jo laŋ po a pai garuk a pili wa. 13Ba le yeeri Amasa manpanni po la ŋaaŋnyiŋ, nuruma meena a yaa cheŋ ale Joab ayen ba vi Siiba Bikri nidoabinni.

14Siiba yaa va Izirali yezuimaŋa meena po a ga paari Abel Bet Maaka ale va Beri demma tɛŋka po meena, baai ale tigsi chaab a va wa. 15Tugurik tɔŋdɔma meena ale bo ale Joab la yaa gilim Siiba ale bo Abel Bet Maaka po la. Ba sɛ bimbimi a ta jueli tɛŋka po, ate di zaani a ta chaab ale peelim ŋanpagrisaŋa. Alege ate ba a nak parika ayen ka siŋ tɛŋ. 16Yam nipok yaa wi nyini tɛŋka po ayen, <<Wom! Wom! Weeni Joab ayen wa jam de ate m biisi ale wa.>> 17Wa yaa cheŋ a duŋ nipowa nyiŋ, ate nipowa a bek wa ayen, <<Fi ka Joab?>> Wa yaa tulisi ayen, <<Ka mi ale Joab.>> Nipowa yaa weeni ayen, <<Wom fi tomteerɔwa ale ta dii ayen wa weeni la. >> Joab yaa weeni ayen, <<Mi a wom.>>

18Wa yaa gum du biisi a cheŋ ayen, <<Dila powa ba jam a weeni kama ayen, <Nya fi tulisaŋa a nyini Abel,> ate wari meena a nueri. 19Tama ale suiyɔgni ale wensie nyam Izirali tɛŋka po. Ni a nye ni kaasi tɛŋ kaai ale ka ma Izirali tɛŋka po la kama. Ka boa ale soa ate nama a yaali ayen ni nɛ Naawen nitalimu?>>

20Joab yaa tulisi ayen, <<Ku yalima ale mi ate mi nɛ yaase mi kaasi tɛŋka. 21Ku daa di. Nuru ate ba a wi ayen Siiba, wa ka Bikri nidoabili a nyini Ɛfraim ate guuta a bo ka po la, ale zak nisa a ta chaab ale naawa, a ta chaab ale Deevid. Pai nuru yeŋka de a te ate mi yeeri m dek tɛŋka po.>> Nipowa yaa weeni Joab ayen, <<Ba le yuk wa zukku a te a nyini parika jigini.>>

22Nipowa yaa ta wa yammu sinsaŋŋa a cheŋ nuruma meena jigi, ate ba gebi Bikri nidoabinni Siiba zukku a yuk a te Joab. Wa yaa peeri damuniŋka, ate wa nuruma a waaŋ tɛŋka po ate waai meena a kuli wa yeri. Ate Joab a ŋman cheŋ naawa jigi Jerusalem.

23Joab ale jam a nya Izirali tugurik tɔŋdɔma meena zuk. Jeyoiada nidoabinni Benaya ale jam a nya Keret ale Pelet demma zuk. 24Adoniram ale jam a nya fifiok tuimaŋa zuk, Ayilud nidoabinni Jeyosafat ale jam chim teerɔwa. 25Seva ale jam chim gbaŋ ŋmarisidoawa, Zadok ale Abiata ale jam chim kaabteerɔba. 26Ate Ira, Jair denɔwa a chim Deevid kaabteerɔ.

Currently Selected:

2 Samuel 20: BWU

Highlight

Copy

Compare