2 Samuel 11

1Wenkarika po diipo ate nalima a cheŋ kpaliŋ la, Deevid yaa tom Joab ale naawa nuruma ale Izirali tugurik tɔŋdɔma meena. Ba yaa ko Ammon demma ale gilim Arabba tɛŋka. Alege Deevid a wari bo Jerusalem.

2Junɔi yeŋ Deevid yaa yiti wa gaduokku zuk a yaa cheŋ wa gboŋku zuk a gilim. Wa yaa zaani gboŋku zuk a nya nipok a boro a so wa nyiŋ. Nipowa jam nala ka nna yegayega, 3ate Deevid yaa tom nuru ayen wa bek wa wari wom. Nuruwa yaa weeni ayen, <<Daa Batseba yaa, Eliam liewa, Yuraya Yit denɔwa powa?>> 4Deevid yaa tom nuruba ayen ba ta wa jam. Wa yaa jam ate wa goa ale wa. Wa diem jam so ka wadek wa le lo chiak a nueri la. Ate wa yaa ŋman kuli. 5Nipowa yaa yik lɔgi a tom weeni Deevid ayen, <<M yik ka lɔgi.>>

6Deevid yaa te tontomiŋka de Joab ayen, <<Te ate Yuraya Yit denɔwa a jam m jigi.>> Ate Joab a te ate wa cheŋ Deevid jigi. 7Yuraya ale jam wa jigi la, Deevid yaa bek wa Joab ale ka diila ale tugurik tɔŋdɔma ale ka diila ale kpaliŋka ale a cheŋ diila. 8Deevid yaa weeni Yuraya ayen, <<Cheŋ siŋ fi yenni a sugri fi naŋsaŋa.>> Yuraya yaa basi naawa yenni, ate ba ta tiirim nyini naawa jigi a vi wa. 9Alege Yuraya a goa naawa yenni nansuiŋku nɔi ale wa kpagni tomteerɔma meena alege an cheŋ siŋ wa yenni.

10Ba le weeni Deevid ayen, <<Yuraya an kuli la.>> Wa yaa bek ayen, <<Fi an nyini daa suik yaluŋ jamu? Ka boa ale soa ate fi an kuli ya?

11Yuraya yaa weeni Deevid ayen, <<Nɔiyeŋka dakanni ale Izirali ale Juda a bo ka viita po, ale mi nyɔnɔwa Joab ale mi nyɔnɔwa naawa nuruma a goa ka peelimmu niŋ. Mi ale nye ka sɛ a cheŋ m yenni a ga dɛ abe m nyu abe m duak ale m powa? Fi ale boro la nyiŋ, mi kan nye wa dila choa.

12Deevid yaa weeni wa ayen, <<Be ŋman goa dela, ate chum abe m te fi ŋman cheŋ.>> Yuraya yaa goa dai dila danni ale dichoawa. 13Deevid yaa wi wa ate wa de ale nyu ale wa. Deevid jam basi kama ate wa buk. Alege junɔinni Yuraya a nyini a goa peelim wa tiaka po ale wa nyɔnɔwa tomteerɔma, wa an kuli ya.

14Saluiku Deevid yaa ŋmarisi gbaŋ a te Yuraya ayen wa ta ga te Joab. 15Ka po wa ŋmarisi ayen ka, <<Pai Yuraya a basi kpaliŋka niŋ kauk kuui ate ku tua la. Abe fi yeeri fidek abe fi ge wa ate ba nak wa a lɔnsi ate wa kpi.>>

16Joab ale jam gilim tɛŋka la, wa yaa pai Yuraya a basi kauk kuui ate wa seba ayen pagrɔma a boro la. 17Tɛŋka demma ale nyini kpaliŋ ale Joab la, nuruma gela Deevid tugurik tɔŋdɔma po a yaa lo kpi, Yuraya Yit denɔwa yaa kpi.

18Joab yaa tom dii meena ale nye kpaliŋka po la a te Deevid. 19Wa yaa sak waai ate wa tom la ayen, <<Fi dan te naawa dii ale nye kpaliŋ ka po la a nueri, 20naawa sui a baga a yiti kama, ate wa baga a bek fu ayen, <Ka boa ale soa ate fi cheŋ moata tɛŋka ayen fi kpaliŋ? Fi zɛ ayen ba le tɔŋ peema ate ŋa nyini parika jamu? 21Ka wana ale ko Jerub Beset nidoabinni Abimelek? Daa nipok ale zaani parika zuk a pai niri a yuk lɔnsi wa zuk ate wa kpi Tebez? Ka boa ale soa ate fi cheŋ a moata parika? Wa dan bek fu nna yaa be weeni wa ayen, <Fi tomteerɔwa Yuraya Yit denɔwa mɛ a kpi kama.>>

22Waai ate wa tom la yaa basi dula, wa le paari la wa weeni Deevid dii meena ate Joab a tom wa ayen wa weeni la kama. 23Waai ate Joab a tom la yaa weeni Deevid ayen, <<Nuruma a nya pagrim tama zuk kama a nyini a ta chaab ale tama peelimmu po, alege tama a yiak ba a ta ŋmani cheŋ tɛŋka nansuiŋku nɔi. 24Ate tɔŋdɔma a zaani parika a tɔŋ fi tomteerɔma peema ate naawa nuruma gela a kpi. Fi tomteerɔwa Yuraya Yit denɔwa mɛ a kpi kama.

25Deevid yaa weeni waai ale ta tontomiŋka a jam la ayen weeni Joab ayen, <<Kan te kude daani fu, gebika a ko ka m wa ale a ko m wa. Duŋ a siti tɛŋka ate fi ga kaasi ka. Weeni nna a te Joab nyiŋbiiri.

26Yuraya powa ale wom ayen wa chorɔwa a kpi la, wa yaa kum wa nyiŋ. 27Kumsaŋa ale ga taam la, Deevid yaa te ba ta wa jam wa yenni, ate wa chim wa pok a biak nidoabili a te wa. Alege wa dii ate Deevid nye la an peenti Naawen sui ya.

Currently Selected:

2 Samuel 11: BWU

Highlight

Copy

Compare