2 Samuel 12

1Naawen yaa tom Natan Deevid jigi. Wa le jam wa jigi la, wa yaa weeni ayen, <<Nuruba baye ale jam bo tɛŋ kanyi, wanyi a chim jigsirɔ alege m wala a chim jajak. 2Jigsirɔwa a jam ta ka piisa ale niiga a piisi, 3alege nuru jakka a ka jaaboa ka pasari biik ate wa da. Wa yaa wuuk ate di pak ale wa ale wa bisaŋa. Di maara dɛ wa ŋandiintaŋa ale a nyu nyiam wa beerika po ale a kpagli wa nisima a goa. Di jam a nye ase ka wa lie la.

4Nuru yaa nyiem jam jigsirɔwa jigi, alege jigsirɔwa a zɛri wa an yik wadek posuk yaase naab ayen wa nye ŋandiinta a te nichaanɔwa ale jam wa jigi la. Wa goanti yik ka pasanni ate nuru jakka a soa la a nye ŋandiinta a te waai ale jam wa jigi la.>>

5Deevid sui yaa a dɛ nna pɔkpɔk ale nuru wala a yaa weeni Natan ayen, <<Naawen ale boro la nyiŋ, nuru waai ale nye nna la a magsi ka wa kpi. 6Ku a fɛ ate wa tuni pa kula nyiŋ naŋtuok nɔi bunaansi, dii nyiŋla wa an nye wanni de ale jiirimmoa.>>

7Natan yaa weeni Deevid ayen, <<Fi abe le nuru wala. Naawen dii ale ka Izirali Wenni, ale weeni diila ale nna. <Mi bobi fu ka naab Izirali zuk, ale vari fu Sɔɔl nisa po a basi. 8Mi pai fi nyɔnɔwa yenni a te fu kama, ale pai fi nyɔnɔwa pooma a nyo fi nisima po. Mi pai Izirali yenni ale Juda a te fu. Ate kude meena a dan fiisa a te fu, mi ate le te fu yega a gum du. 9Ka boa ale soa ate fi valiŋ Naawen wanni a nye dii ale kan nala wa nina po la? Fi ko Yuraya Yit denɔwa ale gebik ale pai wa powa ate wa chim fi pok. Fi ko wa ale Ammon demma gebika. 10Yɔgyɔgla de gebika a kan maa basi fi yenni, dii nyiŋla fi valiŋ mi kama alege pai Yuraya Yit denɔwa powa ate wa chim fi pok.

11Dii ate Naawen a weeni la ale nna. <Fidek yenni po m le ta kaasuŋ a jam fidek zuk. Fidek nimbie po mi le pai fi pooma a te waai ale moata fu la, ate wa duak ale fi pooma kantueŋ. 12Fi suk a nye kude kama, alege mi le nye kude ka kantueŋ Izirali meena nimbie po.

13Deevid yaa weeni Natan ayen, <<Mi nye kaasi Naawen kama.>> Natan mɛ yaa tulisi ayen, <<Naawen a yeeri fi biemu kama. Fi kan kpi. 14Alege fi le nye nnawa la nyiŋ fi basi kama ate Naawen dachaasaŋa a kan sak zula, nidoabi dii ate fi biak la ale kpi.

15Natan ale kuli la ŋaaŋnyiŋ, Naawen a yaa basi ate biika Yuraya powa a biak te Deevid la a yuagi. 16Deevid a saalim Wen a te biika. Wa bobi nɔi a jo wa yenni po a doa tɛŋ a puusi yɔktaŋa. 17Wa yenni nisɔmma a za wa gauŋ ayen wa yiti, alege wa zɛri a kan yaali wade ŋandiinta ale ba.

18Daa ŋayopɔiwa danni biika a kpi. Deevid tomteerɔma a chali yɔgsum ale ba le weeni wa ayen biika a kpi, diila ba poli kama ayen, <<Biika ale diem vua la, ti biisi ale Deevid kama alege wa an wom ti. Ti le nye ka sɛ a weeni wa ayen biika a kpi ya? Wa le nye wari dii ale kan nala la.>>

19Deevid yaa miŋ ayen wa tomteerɔma a waasi ale chaab ate wa miŋ ayen biika a kpi kama. Wa yaa bek ayen biika a kpi kama? Ba yaa tulisi ayen, <<Wa kpi kama.>>

20Deevid yaa yiti ŋmai. Wa le so wa nyiŋka la ŋaaŋnyiŋ, wa yaa sa kpaam ale tagri wa gattaŋa, a jo Naawen yenni a puusi. Wa yaa cheŋ wadek yenni, wadek yaa bek ŋandiinta ate ba te ate wa dɛ.

21Wa tomteerɔma yaa bek wa ayen, <<Ka boa ate fi a nye nna? Biika ale diem vua la, fi bobi ka nɔi a kum, alege yɔgyɔgla de ate biika kpi la, fi yiti a dɛ kama.>>

22Wa yaa tulisi ayen, <<Biika ale diem vua la, mi bobi ka nɔi a kum. Mi poli kama, wana ale seba? Naawen ale ta ŋmanteka ale mu a basi ate biika a vuuk. 23Alege yɔgyɔgla de ate wa kpi la, ka boa ale soa ate mi a bobi nɔi ya? M ŋman baga a ta wa a ŋmani? Mi le cheŋ wa jigi, alege wa kan ŋmani a jam mi jigi ya.>>

24Deevid yaa biisi suiyɔgni wie a te wa powa Batseba, ale cheŋ wa jigi a goa ale wa. Wa yaa biak nidoabili ate ba te wa yuei ayen Solomon. Ate Naawen a yaali wa. 25Naawen abe le a yaali wa la nyiŋ, wa yaa tom wari a va Natan biisiteerɔwa ayen wa te wa yuei ayen Jedidiya.#12:25 Jedidiya kiri ale Naawen a yaali wa.

26Dila meena Joab a kpaliŋ kama ale Arabba ale ka Ammon demma tɛŋ la a tuesi naamu yie pagrika. 27Joab yaa tom nuruba Deevid jigi a weeni ayen, <<Mi kpaliŋ ale Arabba kama a tuesi nyiamu teka jigini. 28Yɔgyɔgla de tigsi tugurik tɔŋdɔ mbala a ga gilim tɛŋka, a tuesi ka. Dan kan daa di mi le tuesi tɛŋka, ate ba pai mi yuenni te ka.>>

29Deevid yaa tigsi tugurik tɔŋdɔma meena a cheŋ Arabba, a siti ka ale tuesi ka. 30Wa yaa lak naam zutɔkka ba naawa zukku po, ka dobrimu jam ka ligmɔniŋ boorik dobrim, ate ba kali tintain naliŋsa ka nyiŋ. Ba yaa pai ka a vuk Deevid zukku po. Wa jam kɔlim ka ŋanta nna yegayega tɛŋka po. 31Ate wa yaa ta nuruma a nyini jam dula, a te gebi nyina ale pengaasa ale laasa ayen ba a tom tuima. A basi ate ba a nak peela. Wa jam nye ka nna Ammon demma tɛŋsaŋa meena. Ate Deevid ale wa tugurik tɔŋdɔma meena yaa ŋman cheŋ Jerusalem.

Currently Selected:

2 Samuel 12: BWU

Highlight

Copy

Compare