2 Samuel 10

1Kude ŋaaŋnyiŋ, Ammon demma naawa yaa kpi, ate wa nidoabinni Yanun a tuesi naamu. 2Deevid yaa poli ayen, <<M le sak jiirim ale Nayas nidoabinni Yanun, ase wa kowa ale jam sak jiirim ale mi diila. <<Deevid yaa tom nuruba ayen ba weeni Yanun wa kowa kummu ale daani wa diila. Deevid nuruma ale jam Ammon demma tɛŋka la, 3Ammon demma nuru kpienta yaa weeni ba nyɔnɔwa Yanun ayen, <<Fi a poli ayen Deevid a zuli fi kowa kama ale wa le tom nuruba ayen wa sak sui kaasuŋ la? Deevid an tom ayen nuruma kpesi a nya ka tɛŋka abe wa kpaliŋ a yiak ka? 4Yanun yaa yik Deevid nuruma, a chiiri nuru meena teeŋ geli ale gebi ba gattaŋa suŋsuŋ butagkolaŋa geŋ ale basi ate ba cheŋ. 5Deevid ale wom nna la, wa yaa tom nuruba ate ba tu nuruma, diila ba nye ba chivie ka nna yegayega. Naawa yaa weeni ba ayen, <<Ni bo Jeriko ate ni teeŋsaŋa a chim, ate ni yaa ŋman jam.

6Ammon demma ale poli ayen ba chim ka nyum Deevid nyue po la, ba yaa pai Araam tugurik tɔŋdɔba tusa pisiye (20,000) a nyini Bet Areyob ale Zoba, ale Maaka naawa ale nuruba tusidi, ale nuruba tusa pi ale ŋaye (12,000) a nyini Tob.

7Deevid ale wom kude la wa yaa te Joab a nyini ale tugurik tɔŋdɔma meena. 8Ammon demma yaa nyini a zaani miminuŋ tɛŋka nansuiŋku a tuak ba tɛŋka tuoku nɔi alege Araam demma ale nyini Zoba ale Areyob la ale Tob ale Maaka nuruma a nyini zaani badek a magsi ba kpaliŋ peelimmu niŋ.

9Joab yaa le jam nya ayen kpaliŋka miminuŋ a bo wa niŋ ale wa ŋaaŋ la, wa yaa yeeri tugurik tɔŋdɔba dek ale bo Izirali la a te ba ga tu Araam demma. 10Wa yaa pai nuru mbala a te ate Abisai wa suoku a nya ba zuk a basi ate ba ga tu chaab ale Ammon demma. 11Joab yaa weeni ayen, <<Araam demma a dan pagra yegayega a te mi, ni be jam vari mi a basi, alege Ammon demma a dan pagra a te ni, mi ale jam vari ni a basi. 12Ni pagra abe ni tua ate ti kpaliŋ a te ti nuruma ale ti Wenni tɛŋsaŋa. Naawen ale nye dii ale nala la wa nina po.>>

13Joab ale wa tugurik tɔŋdɔma yaa duŋ Araam demma nyiŋ ayen ba kpaliŋ ale ba, ate ba chali ba nimbie po. 14Ammon demma ale nya ayen Araam demma a chali la, ba mɛ yaa chali Abisai nimbie po a ga jo tɛŋka po. Joab yaa nyini kpaliŋka po a ŋman cheŋ Jerusalem.

15Ku ŋaaŋnyiŋ ate Araam demma a nya ayen Izirali demma a yiak ba la, ba yaa ŋman tigsi. 16Yadadezer yaa ta Araam demma a nyini Benni ŋaaŋnyiŋ a jam, ba yaa cheŋ Yelam, ate Yadadezer tugurik tɔŋdɔma kpagni Sobak a de ba niŋ.

17Ba le weeni Deevid kude la, wa yaa tigsi Izirali meena, a lo Jodan Benni jueli a cheŋ Yelam. Araam demma yaa zaani miminuŋ ayen ba tu Deevid a kpaliŋ ale wa. 18Alege ba chali Izirali demma nimbie po, ate Deevid a ko ba toroko duerɔma kobsiyopɔi ale tugurik tɔŋdɔ baai ale a cheŋ naŋta la tusa pisinaansi (40,000). Wa nak Sobak mɛ ba tugurik tɔŋdɔma niŋdeerɔ wa a lɔnsi, ate wa kpi dula. 19Nalim ŋaai meena ale jam siak a te Yadadezer la ale nya ayen Izirali a nak ba a de la, ba yaa nye suiyɔgni nɔiyeŋ ale Izirali demma a siak te ba. Dila nyiŋ Araam demma a jam a chali ka yɔgsum ale Ammon demma maarika ŋmana.

Currently Selected:

2 Samuel 10: BWU

Highlight

Copy

Compare