2 Samuel 1

1Sɔɔl kummu ŋaaŋnyiŋ, Deevid yaa nyini wa le nak a de Amalek demma la a jam bo Ziklag daa ŋaye. 2Daa ŋatawa danni nuru yaa nyini Sɔɔl tigsuŋku jigini a jam, ate wa gattaŋa a cheeri ate tanta a bo wa zukku po. Wa le jam Deevid jigi la, wa yaa lo tɛŋ a te wa zula.

3Deevid yaa bek wa ayen, fi nyini ka bɛ a jam? Wa yaa tulisi ayen, <<Mi a nyini ka Izirali tigsuŋku jigini a jam.>>

4Deevid yaa bek ayen, <<Weeni mu, ka boa ale nye ya? Wa yaa weeni ayen, Nuruma a chali kama alege kpaliŋka. Ba yega a lo kama a kpi. Ate Sɔɔl ale wa nidoabinni Jonatan a kpi.

5Ate Deevid a weeni nidoawa ale ta wanni jam weeni la ayen, <<Fi nye ka sɛ a seba ayen Sɔɔl ale wa nidoabinni Jonatan a kpi ya?>>

6Nidoawa yaa weeni ayen, <<Mi bo ka Gilboa Guuku zuk, ate mi nya Sɔɔl ale wa sali wa gbaluku, ate torokoba ale duerɔba a tali maga ate ba jueli wa zuk. 7Wa le cheemu a nya mi la, wa yaa wi mi, ate mi a weeni ayen, <<M nye sɛ?>>

8Wa yaa bek mi ayen, <<Fi ka wana?>> Mi yaa tulisi ayen, <<Amalek denɔ.>>

9Wa yaa weeni mi ayen, <<Zaani m zuk a ko mu. Mi bo ka kum po, alege a diem vua.

10Mi yaa zaani wa zuk a ko wa, dii nyiŋla mi seba kama ayen wa dan lo wa kan vuugi. Ate mi yaa lak wa naam zutɔkka wa zukku po ale yeeri pɔnni wa nisaŋa po a ta ba jam m nyɔnɔwa jigi.

11Ate Deevid ale nuruma meena ale bo ale wa la a yik ba gattaŋa a dari cheeri. 12Ba yaa kum ale bobi nɔi a ga paari junɔi a te Sɔɔl ale wa nidoabinni Jonatan ale Naawen tugurik tɔŋdɔba ale Izirali yenni, diila ba ko ba ale ka gebik.

13Deevid yaa weeni nidoa waai ale ta wanni a jam weeni wa la, <<Fi nyini ka bɛ?>> Wa yaa weeni wa ayen, <<Mi ka nichaanɔ biik, Amalek denɔ.

14Deevid yaa bek wa ayen, <<Ka boa ate fi an chali yɔgsum ale zak fi nisa a ko waai ate Naawen a lueri la?>>

15Deevid yaa wi wa nuruma wanyi a weeni ayen, <<Cheŋ a ga che wa lɔnsi. Ate wa che wa lɔnsi, ate wa kpi. 16Deevid a poom weeni wa kama ayen, <<Fi ziimu a bo fidek zuk. Fidek nɔnni ale bo mini fidek, fi ale weeni ayen, <Mi ale ko Naawen ale lueri waai la.> >>

17Deevid yaa kum kumsaŋa de a te Sɔɔl ale wa nidoabinni Jonatan 18ale weeni ayen ba sak Juda demma tommu de kumsaŋa. Si ŋmarisi doa ka Jasar Gbaŋka po.

19Izirali, fi zulaŋa a kpi kama a doa guutaŋa zuk. Nya tanjaŋŋa ale lo dii ya.

20Kan weeni di wari Gat po, kan mooli di Askelon suitaŋa po, fi dan nye dila Filistia liema sue ale peenti, fi dan nye dila baai ale kan gebi ba yua la lieba ale naŋ.

21Gilboa guutaŋa, ni kan nya maglim yaase ŋmoruwa, yaase laŋsa ŋanta a be ŋanbie. Diila dula ale pagrɔwa jaligimmu a taŋ, Sɔɔl jaligimmu an ŋman sa kpaammoa. 22A nyini baai ate ba ko la ziimu po, a nyini pagrɔma nyiŋ lantaŋa po, Jonatan tommu an ŋmani ya, Sɔɔl gebika an ŋmani kinla.

23Sɔɔl ale Jonatan boka po nuruba a jam yaali ba kama nalimnyiini, kum po ba an poori chaaba. Ba jam kpabi a gaam jiirita kama, ba jam pagra a gaam gbeŋma kama.

24Izirali lieba, ni kum te Sɔɔl, waai ale jo ni ale garuk mɔnta ale nalim, waai ale ŋmirisi ni gattaŋa ale ligmɔniŋ.

25Nya pagrɔma ale lo kpaliŋ po dii. Ba ko Jonatan a dueni ni guutaŋa zuk. 26Ku a daani m suinum fi nyiŋ, Jonatan m suokwa, fi jam ta yaalika ale mu. Fi yaalika ale mi jam ka nna kperikperiga, kperikperik nna yegayega a gaam nipooba.

27Nya pagrɔma ale lo dii. Tugurik tɔŋdɔba a kpi ya.

Currently Selected:

2 Samuel 1: BWU

Highlight

Copy

Compare