1 Samuel 31

1Filistia demma a jam kpaliŋ ale Izirali demma. Izirali demma a jam chali kama, ate ba yega a kpi Gilboa Guuku zuk. 2Filistia demma jam a vi Sɔɔl ale wa nidoabilisaŋa ka nna kparikpari a ko wa nidoabilisaŋa Jonatan ale Abinadab ale Malki Sua. 3Kpaliŋka a jam pagra kama a gilim Sɔɔl ate tɔŋdɔma a tɔŋ wa ale ba peemaŋa, ba jam koani wa ka biobiowa.

4Sɔɔl a jam weeni wa kpaliŋ kɔlima jiirɔwa kama ayen, <<Yeeri fi gebika a chub mu, kan daa di Filistia demma ale kan gebi ba yoaŋa la ale jam a chub mu a nyo mu chivie po.>> Alege wa kpaliŋ kɔlima jiirɔwa a jam yɔgsa kama ale wa le nye dila, dila Sɔɔl yaa yeeri wadek gebika a yɔk lo ka zuk. 5Ase kpaliŋ kɔlima jiirɔwa ale nya ale Sɔɔl a kpi la, wa mɛ yaa lo wa gebika zuk a kpi. 6Sɔɔl ale wa nidoabilisa batawa ale waai ale ta wa kpaliŋ kɔlimaŋa la ale wa nuruma a maarika chaab kpi da dila danni.

7Izirali demma ale bo viaka nɔi la ale baai ale bo Jodan benni kunkɔŋka la ale nya Izirali tugurik tɔŋdɔma ale chali alege ate Sɔɔl ale wa nidoabilisaŋa a kpi la, ba mɛ basi ba tɛŋsaŋa ale chali. Ate Filistia demma a jam bo si po.

8Dai dii ale pasaŋ la, ase Filistia demma ale jam ba kɔlim kpiema ŋantaŋa la, ba yaa nya ale Sɔɔl ale wa nidoabilisaŋa batawa a kpi doa Gilboa Guuku zuk. 9Ba jam gebi Sɔɔl zukku ale yeeri wa kpaliŋ kɔlimaŋa a cheŋ ale tom nuruba Filistia tɛŋka po meena ate ba ga mooli wapaalaŋa a te ba wenaŋa ale ba nuruma. 10Ba pai wa kpaliŋ kɔlimaŋa a dueni Astarot yenni po ale pai wa nyiŋka a yik Bet San siaka nyiŋ.

11Jabes Gilead nuruma ale wom Filistia demma ale nye Sɔɔl diila, 12ba nuru tuasaŋa meena yaa cheŋ Bet San yokku. Ba yaa yeeri Sɔɔl ale wa bisaŋa nyiŋsaŋa Bet San siaka nyiŋ a ta cheŋ Jabes a ga ju. 13Ba yaa pai kobaŋa a ta ga gu tamarisk tiib tɛŋ Jabes tɛŋka po, alege bobi nɔi daa ŋayopɔi.

Currently Selected:

1 Samuel 31: BWU

Highlight

Copy

Compare