2 Samuel 2

1Kude ŋaaŋnyiŋ, Deevid yaa bek Naawen ayen, <<M cheŋ jueli Juda tɛŋsaŋa kanyi?>> Naawen yaa tulisi ayen, <<Cheŋ jueli.>> Deevid ŋman bek ayen, <<M cheŋ bɛ?>> Naawen yaa tulisi ayen, <<Cheŋ Yebron.>>

2Deevid yaa cheŋ jueli dula ale wa pooba bayewa, Ayinoam ale nyini Jezreel la ale Abigail, Nabal ale nyini Karmel la pukɔgini. 3Deevid yaa ta nidoama ale bo le wa la mɛ a cheŋ, waai meena ale wa dɔkdem, ate ba kali Yebron ale ka tɛŋsaŋa. 4Ate Juda yaa jam Yebron ate ba bobi Deevid naab Juda yenni zuk dula. Ba le weeni Deevid ayen ka Jabes Gilead demma ale gu Sɔɔl la. 5Deevid yaa tom nuruba Jabes Gilead demma jigi ayen ba weeni ba ayen, <<Naawen a niak ni ni ale sak jiirimu de ale Sɔɔl ni nyɔnɔwa a gu wa la. 6Yɔgyɔgla de Naawen abe sak ni ŋmanteka ale wensie, abe mi mɛ a sak ni nalim dii nyiŋla ni le nye kude la. 7Yɔgyɔgla de, ni yaa be pagra abe ni tua, ni nyɔnɔwa Sɔɔl a kpi kama, ate Juda yenni a bobi mi naab ba zuk.>>

8Dila po dek Abner Ner nidoabinni, waai ale a nya Sɔɔl tugurik tɔŋdɔma zuk la, a yaa yik Isboset Sɔɔl nidoabinni a ta wa jam Mayanaim. 9Wa yaa nye wa naab Gilead ale Asuri ale Jezreel ale Ɛfraim mɛ ale Benjamin ale Izirali meena zuk.

10Isboset Sɔɔl nidoabinni a jam ka bena pisinaansi ale chim naab Izirali zuk, a dɛ naamu bena ŋaye. Alege Juda yenni a jam va ka Deevid, 11Deevid a jam chim naab a bo Yebron a nya Juda yenni zuk ka bena ŋayopɔi ale chiisa siyuebi.

12Ner nidoabinni Abner ale Isboset, Sɔɔl nidoabinni nuruma a gum chaab a basi Mayanaim ale cheŋ Gibeon. 13Zeruiya nidoabinni Joab ale Deevid nuruma a yaa nyini a tu ba Gibeon beli gilinni. Nuruma beŋ kanyi a kali benni kauk ate beŋ kinkala a kali kauk kunkula.

14Abner yaa weeni Joab ayen, <<Ti te ti nidoa paalukku gela a yiti a tu chaab a kpaliŋ ti niŋ.>> Joab yaa tulisi ayen, <<Ku magsi, te ti ba nye.>>

15Ba yaa yiti zaani ate ba chiini ba, nuruba pi ale baye a magsi Benjamin ale Isboset, Sɔɔl nidoabinni, ate pi ale baye mɛ a magsi Deevid tomteerɔma. 16Ate nuru meena a bo wa dachiak zuk a pai wa gebika a chub feri wa dachiaka gauŋku, ate ba meena a lo. Dula jigini Gibeon po ba jam a wi ayen ka Yelkat Yazzurim.

17Kpaliŋka dai dila danni jam pagra kama, ate Deevid nuruma jam nak de Abner ale Izirali nuruma.

18Zeruiya nidoabilisaŋa batawa, Joab ale Abisai ale Asayel a jam boro kama. Asayel a jam baga a chali kama ase kaab la. 19Wa jam vi Abner kama a kan viriŋ juga yaase gala. 20Abner yaa cheem ŋaaŋ a bek ayen, <<Ka fi Asayel ale la?>> Wa yaa tulisi ayen, <<Ka mi ale la.>>

21Abner yaa weeni wa ayen, <<Cheem juga yaase gala, yik nuru paalukku wanyi a yeeri wa kpaliŋ kɔlimaŋa.>> Alege Asayel a kan basi wa vi ka.

22Abner a ŋman kaam wa ayen, <<Basi m vi ka. Ka boa ale soa ate mi a chubi fi a lɔnsi? Ku ale nye ka sɛ ate mi nya fi suoku Joab nina po?>>

23Alege Asayel an siak basi wa vi ka. Abner yaa pai wa gbaluku zukku a chub Asayel lɔgni ate gbaluku a vuri a taam nyini wa ŋaaŋka. Wa yaa lo dula a kpi. Ate nuru meena a wari zaani juijui ate Asayel a lo a kpi la.

24Alege Joab ale Abisai a vi Abner, junɔi ba yaa jam Ammaya guuku, a moata Gia a bo suik kuui ale a cheŋ Gibeon tɛŋka ale doa kinla la. 25Ate Benjamin nuruma yaa va Abner ŋaaŋ. Ba yaa gum chaab a chiib zaani guuku zuk.

26Abner yaa kaari wi Joab a weeni ayen, <<Gebika a magsi ayen ka kasim a ko taam wuu? Fi kan poli ayen kude ale kpeglim ale suikaasuŋoa? Ku le beni ka sɛ alege ate fi te fi nuruma suik ate ba basi ba suataŋa vika?>>

27Joab yaa tulisi ayen, <<Wensie, Wen ale boro la nyiŋ, fi dan kan biisi ya, nuruma ate kasim a vi ba suataŋa kama a ga paari saluik.>>

28Joab yaa peeri damuniŋka, ate nuruma meena a pai basi. Ba an ŋman vi Izirali yaase ba nye kpaliŋŋa.

29Yok kula meena Abner ale wa nuruma yaa gɔk santiri a va Araba po. Ba lo Jodan benni jueli, a va Bitron meena po a jam Mayanaim.

30Joab yaa nyini Abner vika a ŋmani a tigsi wa nuruma meena. Deevid nuruba pi ale neok ale jam kpi a gum Asayel po. 31Alege Deevid nuruma a jam ko ka Benjamin dem kobsita ale pisiyuebi baai ale jam bo ale Abner. 32Ba yaa pai Asayel a gu wa kowa vɔrumu po Betiliyem. Joab ale wa nuruma yaa gɔk santiri yokku meena a ga paari Yebron varivientidi.

Currently Selected:

2 Samuel 2: BWU

Highlight

Copy

Compare