1 Samuel 30

1Deevid ale wa nuruma a jam paari Ziklag ka daa ŋata dai. Amalek demma a jam siti Negev ale Ziklag kama. Ba jam siti Ziklag kama a ju ka, 2ale yik nipooma ale baai meena ale bo ka po la, bisa ale ŋankpagsa meena. Ba an ko waai ya, ba jam ta ba meena a cheŋ kama.

3Deevid ale wa nuruma ale jam Ziklag la, ba yaa nya ayen tɛŋka ju kama ale ta ba pooma ale ba nidoabilisaŋa ale ba liema a cheŋ. 4Deevid ale wa nuruma a jam kum kama a ga jiak a ŋman ka pagrim a kum. 5Ba jam yik Deevid pooma bayewa Ayinoam ale nyini Jezreel la ale Abigail Nabal pukɔgini ale nyini Karmel la. 6Ku jam daani Deevid ka nna yegayega diila nuruma jaa biisi kama ayen ba le yuk wa ale tana. Waai meena sui jaa dom kama ba nidoabilisaŋa ale ba liema nyiŋ. Alege Deevid jam nya pagrim kama Naawen wa Wenni jigi.

7Deevid yaa weeni Abiata Naawen yenni kaabteerɔwa, waai ale ka Ayimelek biik la ayen, <<Ta garuk genni a jam te mu. Abiata yaa ta jam te wa.>> 8Deevid yaa bek Naawen ayen, <<M vi baai ale yik dɔkdemma la yaa? M le yik ba?>> Naawen yaa tulisi ayen, <<Vi ba. Fi le yik ba, fi be vari fi dɔkdemma.>>

9Deevid ale wa nuruma kobsiyuebiwa yaa jam Besor vooliŋka ate ba gela wari dula. 10Diila nuruba kobsiye a jam jiak kama an baga a lo benni a jueli. Alege Deevid ale nuruba kobsinaansi a cheŋ.

11Ba yaa nya Ejipiti denɔ talim po a yaa ta wa jam Deevid jigi. Ba yaa te wa nyiam ate wa nyu ale ŋandiinta ate wa dɛ. 12Ŋandiintaŋa jam ka maasa. Wa jam dɛ kama a nya nyiŋ pagra dii nyiŋla wa an jam dɛ ŋandiinta, wa an nyu nyiam daa ŋata.

13Deevid yaa bek wa ayen, <<Ka wana le soa fu, fi be nyini ka be?>> Wa yaa tulisi ayen, <<Mi ka Ejipiti denɔ. Amalek denɔ yɔma ale nye mi. Mi a yuak kama da ŋata ale nna ate m nyɔnɔwa a zɛri mu. 14Ti yaa siti Negev ate Keret demma a soa la ale kab tii ate Juda a soa la ale Negev ate Kaleb a soa la. Ti yaa ju Ziklag.>>

15Deevid yaa bek wa ayen, <<Fi le baga a ta mu cheŋ baai ale siti a yik la jigi ya.>> Wa yaa tulisi ayen, <<Pe te Wen mi niŋ ayen fi kan ko mu yaase fi pai mu te m nyɔnɔwa, ate m ta fu a cheŋ ba jigi.>>

16Wa yaa ta Deevid a cheŋ dula ate wa nya ba waaŋ jigi meena a dɛ ale a nyu a naŋ dii nyiŋla ba le pai ŋan baai nna yegayega Filistia demma ale Juda demma jigi la. 17Deevid yaa kpaliŋ a nyini wenbalinni a jam veenti vari a taam ga siŋ wen, ba waai a yuli bɛ ya. Ka nuruba kobsinaansi ale do laalaakomiba a chali. 18Deevid a tuesi jaab meena ate Amalek demma a pai la kama ale wa pooba bayewa meena. 19Jaab an jam bɛ ya. Ba jam tuesi bimbaansa ale ŋankpagsa, nidoabilisa ale nipokbilisa ale ŋan baai meena ate ba pai la kama. Deevid jam ta jaab meena kama a ŋmani. 20Deevid yaa yik niiŋa ale duŋsaŋa meena ate wa nuruma a yiak ŋa ale duŋ yonsa meena ale a weeni ayen, <<Deevid ale soa ŋan baai meena la ale nna.>>

21Deevid yaa jam nuruba kobsiyewa ale jiak an baga va la ale baai ale wari Besor beli vooliŋka la jigi. Ba yaa nyini a tu Deevid ale wa nuruma. Deevid ale wa nuruma ale paari la, wa yaa puusi ba. 22Alege nuru baataŋa ale baai ale a daani a bo Deevid nuruma po la a yaa weeni ayen, <<Ba le kan va ti a cheŋ la nyiŋ ti kan te ba ŋan baai ate ti tuesi la. Alege waai meena a tuesi wa pok ale wa bisa a cheŋ.>>

23Deevid yaa tulisi ayen, <<Aaya, m suata. Ni kan nye di ale ŋan baai ate Naawen a te ti la. Wa lik ti kama alege pai tugurik tɔŋdɔba baai ale ta chaab ale ti la a nyo ti nisa po. 24Ka wana ale wa wom dii ate ni a weeni la? Waai ale wari a nya ti ŋantaŋa ale waai ale cheŋ kpaliŋka la charuku ka bunyi. Ba meena a dɛ a soa ase ka chaab la.>> 25Deevid a basi ate kude a chim ka wari a doa a te Izirali demma a jam paari jinla.

26Deevid ale ga paari Ziklag la, wa yaa ta ŋantaŋa gela a ga te Juda nisɔmma, baai ale ka wa doaba la ale weeni ayen, <<Tiirim ale nna a nyini Naawen dachaasaŋa ŋantaŋa ate ti tuesi la.>>

27Wa ta gela a ga te baai ale bo Betel ale Aramat Negev ale Jattir, 28ale baai ale bo Aroer, ale Sifmot, ale Estemoya, 29ale Arekel, ale baai ale bo Jerameel ale Ken tɛŋsaŋa la, 30ale baai ale bo Yorma ale baai ale bo Bor Asan, ale Atak, 31ale Yebron, ale baai ale bo kab tii meena ate Deevid ale wa nuruma gilim la.

Currently Selected:

1 Samuel 30: BWU

Highlight

Copy

Compare