1 Samuel 29

1Filistia demma yaa tigsi ba tugurik tɔŋdɔma meena Afek ate Izirali mɛ tigsi chaab a moata bulika ale bo Jezreel la. 2Filistia tugurik tɔŋdɔma kpaŋŋa ale a gɔk santiri kobsa ale tusa la Deevid mɛ ale wa nuruma mɛ a gɔk santiri a vi Akis. 3Filistia tugurik tɔŋdɔma kpaŋŋa yaa bek ayen, <<Alege Yiburu demma dɛ?>> Akis yaa tulisi ayen, <<Daa Deevid waai ale jam chim Izirali naawa Sɔɔl tugurik tɔŋdɔma kpagi la ale la? Wa poom bo ale mi a gaam ka bein, wa be le basi Sɔɔl a jam paari yɔgyɔgla de la mi an nya wakaasuŋ wa jigiya.>>

4Alege Filistia kpaŋŋa sui yaa puuri ale wa ate ba weeni wa ayen, <<Te ti nuruwa ŋman cheŋ kauk kuui ate fi te wa ayen wa boro la. Wa kan va ti cheŋ kpaliŋka, dan kan daa di wa le cheem ta chaab ale ti kpaliŋka po. Wa baga kama a ko tama dek nuruma a peenti wa naawa sui. 5Daa Deevid wa de ate ba siak yiilaŋa a pak wa ba gɔgtaŋa po ayen, Sɔɔl a ko ka wa tusaŋa, alege Deevid a ko wa tusa piika la?>>

6Akis yaa wi Deevid a weeni wa ayen, <<Naawen ale boro la nyiŋ, fi ta wensie kama. Mi sui ate a peenti ase fi ale a tom ale mi tugurik tɔŋdɔma. A nyini da dii dai ate fi jam mi jigi la mi an nya wakaasuŋ fi jigiya alege nalima m ŋala a ka siaka ale fu. 7Ŋmani kuli ale suiyɔgni, kan nye wari ate nalimaŋa sui puuri.>>

8Deevid yaa bek ayen, <<Boan wari ate m nye kaasi? Boan biem ate fi nya mi jigi a nyini da dii dai ate mi a jam dela la. Boa ale soa ate mi an baga cheŋ a ga kpaliŋ fi dachaasaŋa, m nyɔnɔwa ale m naaba?>>

9Akis yaa tulisi ayen, <<Mi seba fi ka nuru maŋ ase Wen maarɔ la. Alege Filistia kpaŋŋa a weeni kama ayen, ku a fɛ kama ayen fi kan cheŋ kpaliŋka. 10Saluik yokyokwa yiti ale fi nuruma a cheŋ. Yiti diipo ate ku a nya la a cheŋ.>>

11Dila nyiŋ Deevid ale wa nuruma yaa yiti saluik yokyokwa a ŋman cheŋ Filistia demma tɛŋka. Ate Filistia demma yaa cheŋ Jezreel.

Currently Selected:

1 Samuel 29: BWU

Highlight

Copy

Compare