1 Samuel 3
3
1Samuel ale jam diem ka biik la, wa jam tom a te Naawen kama a va Eli sinsaŋŋa. Da ŋala po Naawen a jam a biisi ale nuruba ka ka dapo dapo. Wa an jam pai wadek kasim a sak nuruba.
2Eli an ŋman jam nya a chagi. Yɔk kunyi wa yaa dua juijui ate wa duak a goa la. 3Samuel yaa duak Naawen yenni po ayen wa goa. Ku an jam diem sobi ya. Zeuŋku bolimu a diem a dɛ kama. Wen nɔiyeŋka dakanni mɛ za ka yenni po. 4Dila po Naawen yaa wi Samuel yuenni. Samuel yaa wom tulisi ayen, <<Mi ale nna.>> 5Wa yaa chali cheŋ Eli jigi ayen, <<Fi le wi mu la mi ale nna.>> Eli yaa weeni ayen, <<Mi an wi fu. Ga duak,>> Samuel yaa ŋman ga duak.
6Naawen yaa ŋman wi ayen, <<Samuel!>> Samuel ŋman cheŋ ga ayen, <<Fi le wi mu la mi ale nna.>> Eli yaa weeni ayen, <<Aaya, m biiga, mi an wi fu. Ga duak goa.>>
7Dila po Samuel diem jam zɛ Naawen ya, diila wa an diem a biisi ale wa nya ya.
8Naawen yaa ŋman wi Samuel nye buta. Ate Samuel yiti ŋman cheŋ Eli jigi, a weeni wa ayen, <<Fi sum wi mu kama, mi ale nna.>> Eli yaa miŋ ayen ka Naawen ale a wi biika. 9Eli yaa sak Samuel ayen, <<Ga duak. Wa dan ŋman wi fu weeni ayen, <Biisi, Naawen, ale fi yɔmawa a wom kama.> >> Samuel yaa ŋman cheŋ wa goomu jigini a duak.
10Naawen yaa jam zaani wa tɛŋ a wi ayen, <<Samuel! Samuel!>> Samuel yaa weeni ayen, <<Biisi, ale fi yɔmawa a wom kama.>>
11Ate Naawen yaa weeni Samuel ayen, <<Wom mi, mi a yaali ayen m nye Izirali demma ka wari ate waai a dan wom abe wa nyiŋ a gɔk. 12Dila m le nye dii ate m weeni la. M le namsi Eli dɔkdemma. M kan ŋman te wa, m le nye dii ate m weeni ayen mi le nye la. 13M kpaam wa kama ayen m le kasim a namsi wa dɔkdemma, dii nyiŋla Eli seba wa bisaŋa wabaataŋa nyeka ka leeta te mu alege wa an toariŋ ba. 14Dila nyiŋ mi pɛ kama ayen waba tii ate ba nye la m kan vɔŋ te ba diipo, diipo. Ba dan poom te mu tiirim diidii ya.>>
15Samuel yaa duak ate vanni veenti. Ate wa yaa lak Naawen yenni tuataŋa. Wa jam a chali ka yɔgsum ale wa le weeni Eli Naawen ale weeni wa diila. 16Alege Eli yaa wi Samuel ayen, <<M biiga.>> Samuel yaa jam ayen, <<Nya mi ale nna.>> 17Eli yaa bek wa ayen, <<Naawen weeni fu ayen ka boa? Kan suk wari ale mu. Fi dan suk wari mi jigi Wen ale nye ale fu. Weeni mu wari meena ate wa weeni fu la.>> 18Samuel jam weeni wari meena kama wa an suk wari ya. Eli yaa weeni ayen, <<Wa ka Naawen, wa bɛ nye dii ale nala la.
19Samuel chimta po Naawen jam a niak wa kama. Wa jam a nye dii meena ate Samuel a weeni nuruma la kama. 20Izirali tɛŋka po, a zaani Dan a ga paari Beerseba a jam miŋ kama ayen Samuel ka biisiteerɔ ate Naawen a tom. 21Naawen a jam kasim pai wadek a sak Samuel kama Siilo tɛŋka po. Dula jigini wa pai wa wanni a sak wa kama ate wa a biisi.
Currently Selected:
1 Samuel 3: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
