1 Samuel 2

1Yanna yaa puusi a weeni ayen, <<M sui peenti ale Naawen kama. M pagrimu a nyini ka fi jigi. Mi a la m dachaasaŋa kama dii nyiŋla m sui peenti kama fi le vari mu ba jigi a basi la. 2Naawen, waai karo a welema ase fi la. Fi nyiini ale Wen. Fi a nye ase ka piuŋ la, a lik ti. 3Naawen, basi ate baai ale a kuulim a biisi ale kanjanta la a nye diki. Diila fi Naawen ka Wen dii ale seba wari meena ale a bo nuru meena ale a nye diila buusa. 4A basi ate tugurik tɔŋdɔba tima a wɛ, alege baai ale wobsa la, fi ale a te ba pagrim. 5Baai ale jam ta ŋandiinta yegayega a dɛ la a nyini kama a tom a yaali ŋandiinta. Alege baai ate kɔm jam ta ba la, a yaa dɛ kama a chak. Waai ale jam kaa biak la, yaa biak ka bisa bayopɔi, Alege waai ale jam ta nidoabilisa piisi la ba meena a kpi. 6Naawen ale ta kum a jam, wa abe le a te nyuvuri. Wa le te nuruba a cheŋ kpiluŋ, wa le te ba a yiti. 7Naawen ale basi ate jaŋsa a jam ale basi ate jigsika a jam. Wa le basi ate nuru a chim nuru fiik wa abe le basi ate nuru a chim nuru kpioŋ. 8Naawen ale zak jajak wa niniga po ate wa a yiti. Naawen ale a te ba kpaŋta ale yuei. Wa le a nye tɛŋka nyubaŋa. Wa be nye tɛŋka ka nyubi ŋala zuk. 9Naawen ale a lik wa nuruma baai ale a va wa ale wensie la juijui meena ate ba a cheŋ la, alege ku daa di wabaata nyama jigi ya. Ba le kpi a cheŋ kpiluŋ. Ku daa pagrim ate nuru dek a baga a nye wari ya. 10Baai ale ta chaab ale Naawen la wa le kaasi ba. Wa ale na wenŋmazuk a ta chaab ale ba. Naawen ale bo baai meena ale bo tɛŋzuk la buusa. Wa le lueri naab waai la, wa le te wa pagrim ate wa a nya tɛŋka zuk abe wa te wa yuei.

11Elkana ale wa powa Yanna yaa kuli ba yenni ale bo Arama la. Alege ba biika Samuel yaa wari Siilo ate Eli a sak wa ate wa tom a te Naawen.

12Eli nidoabilisaŋa a jam ka bi baata. Ba jam kan zuli Naawen. 13Kaabteerɔma ale jam a nye nuruma diila ale nna. Ase nuru a dan jam nye kaabka, ba le pai ka samɔniŋ a dik lammu. Kaabteerɔwa yɔmawa nyiem yaa pai duisuk nyina ŋata, 14a su samɔniŋka po. Duisuku ale lu yeeri lam buui a ta jueli la kaabteerɔwa ale soa. Alege ba le jam a nye Izirali demma meena ale a jam Siilo a nye kaabka la ale nna. 15Alege ate ba ju kpaamu la, kaabteerɔwa yɔmawa a nyiem jam waai ale a nye kaabka la jigi kama a weeni ayen, <<Te kaabteerɔwa lam ate wa se. Wa kan yaali lam digmoa.>>

16Waai ale a nye kaabka la a dan weeni ayen, <<Basi ate kpaamu a se nueri ase ku le magsi diila abe fi yaa lueri dii ate fi a yaali la,>> kaabteerɔwa yɔmawa a tulisi kama ayen, <<Te mu kpaamu yɔgyɔgla dan kan daa di m le fɛ yeeri.>>

17Naawen yaa nya ayen Eli bisaŋa biemu a zuak ka yega dii nyiŋla ba kan sak zula ale kaabka ate ba nye a te Naawen la.

18Alege Samuel jam kasim tom a te Naawen kama. Wa jam ka biik a jo garuk geli ate ba pai garuk naluŋ a nye. 19Ben meena wa mawa nyiem baali ka garuk woŋ a te wa. Wa le wa chorɔwa nyiem dan cheŋ ayen ba nye benni kaabka wa yaa deri pai te wa. 20Eli nyiem yaa weeni niauŋ a te Elkana ale wa powa ayen, <<Mi a yaali ayen ka Naawen niak fi ale fi powa ale bisa ate ba tagri waai ate wa bek ale pai wa te Naawen la.>> Ku ŋaaŋnyiŋ ate ba yaa kuli. 21Ate Naawen sak jiirim ale Yanna ate wa biak nidoabilisa bata ale nipokbilisa baye. Samuel jam kasim tom a te Naawen kama alege a chim.

22Eli jam kpaŋ kama ale kasim a wom biem buui meena ate wa bisaŋa a nye Izirali demma la. A wom ba le a goa ale nipooma baai ale a nya ŋantaŋa ale bo juijui ate Naawen a tu wa nuruma la nansuiŋku nɔi. 23Eli yaa weeni wa nidoabilisaŋa ayen, <<Ka boa ale soa ate ni a nye wieŋa de? Nuruma jam a weeni mu waba tii meena ate ni a nye la kama. 24Ni kaa nye wieŋa de chaaba. Ba a biisi ate ku a cheŋ kama biem buui meena ate ni a nye la. 25Ni seba ayen nuru a dan nye kaasi wa choa, Wen a baga yik ba a niak chaab kama, alege nuru a dan potim nye kaasi Naawen dii karo a maari wa?>> Alege wa nidoabilisaŋa zɛri ba an wom wa kaamka. Dii ate ba zɛri la, Naawen poom poli kama ayen wa basi ate ba kpi ba wabaataŋa nyiŋ.

26Alege Samuel jam kasim a chim kama. Naawen sui a peenti ale wa kama. Izirali demma mɛ sui a peenti ale wa.

27Dila po Wen nuru yaa jam Eli jigi a weeni wa ayen, <<Naawen ale weeni fu diila ale nna. <Fi seba ayen diipo ate fi kokpieŋsaŋa a jam chim Faaro yɔm Ejipiti la, Mi pai m dek kama a sak Aaron ale wa dɔkdemma. 28Mi lueri wa kama ale ayen wa chim Naawen Yenni kaabteerɔba kpagi a tom a te mu. Ku jam ka wa tuini ayen wa nye kaabka kuŋkuŋku zuk abe wa ju ŋan baai nyum ale masa a te mu zula. Wa mɛ jam nya suik kama a jo Naawen Yenni kaabteerɔba kpagi garuk geli, ayen wa a gisi m yaalika. Daa dila nyiini, m jam te wa suik kuŋkuŋku zuk kama la. 29Alege fi ale fi nidoabilisaŋa a kan zuli tiiritaŋa ate mi weeni m nuruma Izirali demma ate ba ta jam a nye kaabka la. Ka boa ale soa ate fi zuli fi nidoabilisaŋa a gaam mi basi ate ba luk a yeeri ŋan baai ale zunchoŋ la a te ba dega?

30<< <Mi Naawen Izirali Wenni ale puulim ayen ni buuni ale kasim a chim ka Naawen Yenni kaabteerɔba kpaga. Alege yɔgyɔgla, Mi Naawen ale a weeni ayen ku ŋman daa di fi ale fi dɔkdemma jigiya. Baai ale a zɛri mi la, mi mɛ ale zɛri ba. Mi a zuli ka baai ale a zuli mi la. 31Ku cheena ate nidoabili paalukku fi buuni po m le ko ba. Ba wanyi mɛ la a kan pagi. 32Izirali demma ate mi a bo ale ba la ale nya niaka alege nama a kan nya jaaboa alege ka daanika yegayega. 33M le tali ni po wanyi ate wa a tom ase Naawen yenni kaabteerɔba kpagi la, alege fi le kum ate ninyaata a sueri fi ninaŋa ate ku a daani fu. Ku le ka diila, fi ŋaaŋsaŋa a kan pagi, ba le kpi ale ba diem paala kama.

34<< <Fi bisa bayewa Yofni ale Fineyas a dan maa chaab kpi dai yeŋ, ku la le sak ayen m le weeni diila ka wensie. 35M le lueri ka waai ale ta wensie m a nya wa ale wa ŋaaŋsaŋa ate ba tom a te naab waai ate m lueri la. 36Kude dan nye fi ŋaaŋsa baai ale kan kpi la ale cheŋ kpagi dila jigi a ga a juisi ŋandiinta ale ligra. Ba le saalim a yaali ayen ba nya suik a tom a dɛ vuuk.> >>

Currently Selected:

1 Samuel 2: BWU

Highlight

Copy

Compare