1 Samuel 4
4
1Ate Izirali demma meena jam a siak ayen Samuel wieŋa ka wensie. Da ŋala po Filistia demma ya tigsi ba tugurik tɔŋdɔma ayen ba nye kpaliŋ ale Izirali. Izirali demma a tigsi Ebenezer alege ate Filistia demma a tigsi Afek. 2Filistia tugurik tɔŋdɔma a jam siti ba kama ale pagrim a nak dɛ Izirali demma. Filistia tugurik tɔŋdɔma a jam ko Izirali tugurik tɔŋdɔma a paari ka tusa ŋanaansi (4,000). 3Izirali tugurik tɔŋdɔba baai ale tali a ŋman cheŋ ba tigsika jigini la Izirali niŋdeerɔma yaa bek chaab ayen, <<Ka boa ate Naawen a basi ate Filistia demma a nak dɛ ti jinla? Ti ga pai Naawen nɔiyeŋka dakanni Siilo ate wa va ti cheŋ kpaliŋka ate ti dachaasaŋa a kan ŋman nak dɛ ti.>>
4Ba meena yaa siak a tom nuruma ate ba cheŋ Siilo ayen ba pai Naawen Dii Ale A Dɛ Tugurik Tɔŋdɔma Niŋ La ale gaam jaab meena la nɔiyeŋ dakanni. Dakanni nanlikka zuk maarɔba baye ale ba mɛ a zaani ka zuk. Naawen a jam bo ka maarɔma suŋsuŋ. Ba le ta dakanni a jam Izirali tigsika jigini la, Yofni ale Fineyas a maa va jam.
5Izirali tugurik tɔŋdɔma ale nya dakanni la, ba yaa kaari ate ku jueli ate tɛŋka a choa. 6Filistia demma ale wom kaarika la, ba yaa bek chaab ayen, <<Ka boa ate Izirali tugurik tɔŋdɔma a kaari ba jigini?>> Ba yaa miŋ ayen Naawen nɔiyeŋka dakanni ale ba ta jam ba jigini. 7Ba yaa jam a chali yɔgsum. Ba yaa weeni ayen, <<Ti bo wari po, ba ta wen a jam ba jigini. Wanni de choa an nye nya ya. 8Ku bie. Ku tua kama ale waai ale vari ti Izirali wen kpiemaŋa de jigi a basi. Wena ŋaai ate ba ta jam ba jigini la ale wena ŋaai ale ko Ejipiti demma gɔnni po la. 9Dila nyiŋ, ni piiri nyiŋ. Ni kpaliŋ ase tugurik tɔŋdɔba tuasa la, dan kan daa di Izirali demma ale nak dɛ ti ate ba a nya ti zuk ase tama ale a nya ba zuk diila. Ni chim nidoaba a nye kpaliŋka.>>
10Filistia tugurik tɔŋdɔma a jam chiib kpaliŋ kama ale ninpagra a nak dɛ Izirali demma. Izirali demma baai ale tali la meena yaa basi kpaliŋka ale chali kuli. Nakdeka jam bie ka nna yegayega ate Izirali tugurik tɔŋdɔba tusa pisita (30,000) a kpi. 11Naawen nɔiyeŋka dakanni mɛ ba jam tuesi kama ale ko Eli bisa bayewa Yofni ale Fineyas.
12Da dila danni dek nuru a yaa nyini Benjamin buuni po a chali nyini kpaliŋka po a cheŋ Siilo. Wa dari wa gattaŋa kama cheeri ale pai buntuem a basi wa zukku po a sak wa sui ale kaasi la. 13Wa le jam paari la, Eli jam kali ka wa zukpaglika zuk suiku nɔi a limisi wa wom diila wa jam a chali ka yɔgsum wari a nin nye nɔiyeŋka dakanni. Nuruwa ale jo tɛŋka po a weeni dii ale nye la, nuruma meena a yaa kaari. 14Eli yaa wom kaarika a yaa bek ayen, <<Nuemka de kiri ale boa?>> Nuru yaa chali cheŋ Eli jigi. 15Eli jam ka bena pineok ale naaniŋ ate wa ninaŋa an ŋman jam a nya. 16Wa weeni Eli ayen, <<Mi nyini ka kpaliŋka jigini. Mi chali nyini dula ka jinla dek.>> Eli yaa bek ayen, <<Ka boa ale nye yaa, m biiga?>>
17Wa yaa tulisi ayen, <<Filistia tugurik tɔŋdɔma nak yiak Izirali tugurik tɔŋdɔma kama ate ba chali. Ti tugurik tɔŋdɔma yega ale kpi. Fi bisa bayewa Yofni ale Fineyas a maa kpi kama. Daa dila nyiini, ba tuesi Naawen nɔiyeŋka dakanni kama.>>
18Eli ale wom dii ale nye nɔiyeŋka dakanni la, wa deri lo ŋaaŋnyiŋ tɛŋka nansuiŋku nɔi. Wa le lo la wa ŋinni yaa wɛ ate wa kpi, diila wa jam kpaŋ kama ale biigi. Wa jam chim Izirali niŋdeerɔ a paari ka bena pisinaansi.
19Eli sampowa, Fineyas powa a jam maa bo ka tɛŋka po. Wa jam ta ka lɔgi a moata biam. Wa le wom dii ale nye nɔiyeŋka dakanni la ale wa chorɔwa ate wa ŋiak nidoawa a kpi la, wa deri a dom. Wa deri biak diila domka jam pagra ka yega. 20Wa jaa kpi kama alege nipok baai ale jam yik ate wa biak la a weeni ayen wa kan te ku daani wa biak ka nidoabili. Alege wa an jam tulisi yaa.
21Wa jam te wa yuei ayen ka Ichabod. Di kiri ale Naawen zulaŋa a basi Izirali kama. Wa jam weeni dila kama dii nyiŋla ba tuesi nɔiyeŋka dakanni kama ate wa chorɔwa ale wa ŋiak nidoawa mɛ a kpi. 22Wa weeni ayen, <<Naawen zulaŋa a basi Izirali kama diila nɔiyeŋka dakanni ba tuesi kama.>>
Currently Selected:
1 Samuel 4: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
