1 Samuel 28

1Da ŋala po Filistia demma yaa tigsi ba tugurik tɔŋdɔma ayen ba nye kpaliŋ ale Izirali. Akis yaa weeni Deevid ayen, <<Se fi seba ayen fi ale fi nuruma a magsi ni gum ka mi tugurik tɔŋdɔma po.>>

2Deevid yaa weeni ayen, <<Fidek ale nya fi tomteerɔwa ale wa nye diila.>> Akis yaa weeni ayen, <<Ku nala m le basi ate fi chim midek limisidɔ.>>

3Yɔgyɔgla de Samuel a kpi kama ate Izirali demma meena a kum wa ale gu wa wadek tɛŋka Arama po. Sɔɔl jam yiak chichirik wiirisaŋa ale sampoporisaŋa meena kama tɛŋka po.

4Filistia demma a yaa jam tigsi a bo Sunem alege ate Sɔɔl a tigsi Izirali demma ate ba bo Gilboa. 5Sɔɔl ale nya Filistia tugurik tɔŋdɔma la yɔgsum yaa yik wa ate wa kpaziim a nak. 6Wa yaa bek Naawen ayen wa wom wari alege Naawen an tulisi wa wa gɔdaasima po yaase wa gbaŋ Urim a tulisi wa yaase wa va biisiteerɔma a tulisi wa. 7Sɔɔl yaa weeni wa tomteerɔma ayen, <<Ni gisi nipok waai ale a porisi, ate m cheŋ a ga kpesi.>> Ba yaa weeni wa ayen, <<Wanyi a bo Endor.>>

8Sɔɔl a yaa tagri wadek a jo garuk yonta ate yokku wa le nidoaba baye a cheŋ nipowa jigi. Wa yaa weeni nipowa ayen, <<Mi a yaali ayen m biisi ale ka nuru waai ale kpi, wi wa chiika a te mu.>>

9Alege nipowa yaa weeni ayen, <<Fi seba Sɔɔl ale nye diila kama. Wa yiak Sampoporisaŋa ale chichirik wiirisaŋa kama tɛŋka po. Ka boa ale soa ate fi a bari ayen fi yik mu ate ba ko mu.>>

10Sɔɔl yaa pɛ Naawen nyiŋ ayen, <<Naawen ale boro la nyiŋ ba kan namsi fu kude nyiŋŋa.>>

11Nipowa yaa bek ayen, <<M wi wana a te fu?>> Wa yaa tulisi ayen, <<Wi Samuel ate wa jueli a te mu.>>

12Nipowa ale nya Samuel la, wa yaa kaari ate wa lueluku a jueli a weeni Sɔɔl ayen, <<Ka boa ale soa ate fi paasi mu? Fi ka Sɔɔl.>>

13Naawa yaa weeni wa ayen, <<Kan chali yɔgsum. Fi nya ka boa?>> Nipowa yaa tulisi ayen, <<Mi nya ka chiik ale ka a jueli.>>

14Wa yaa bek ayen, <<Wa a nye ase ka boan la?>> Nipowa yaa tulisi ayen, <<Wa ka nisɔmma a jo garuk woŋ a jueli.>> Sɔɔl yaa seba ayen ka Samuel ate wa yaa koori tɛŋ a pai zuk a kpi tɛŋ.

15Samuel yaa weeni Sɔɔl ayen, <<Ka boa ale soa ate fi daani mu a ta mu a jueli?>> Sɔɔl yaa weeni ayen, <<Dii nyiŋla m bo ka daani kpieŋ po. Filistia demma ale a nye kpaliŋ ale mu, Naawen abe basi mi kama. Wa an ŋmaa tulisi mi ale gɔdaasima yaase biisiteerɔba. Dila nyiŋ mi yaa wi fu ayen fi weeni dii ale magsi ayen m nye la.>> 16Samuel yaa weeni ayen, <<Boa ale soa ate fi a bek mi, yɔgyɔgla de ate Naawen a basi fu la a yaa chim fi dachiak la? 17Naawen a nye dii ate wa va mi a weeni fu la kama. Naawen a dari naamu a cheeri kama fi nisa po a pai te fi vaanchaama wanyi. Wa te ka Deevid. 18Dii nyiŋla fi an zuli Naawen ya, wa suinni ale a puuri ale Amalek demma ayen fi nye diila fi an nye ya. Naawen nye fu ka nna wa jinla. 19Naawen ale pai fi ale Izirali meena ate Filistia ate chum fi ale fi bisaŋa a bo ale mi. Naawen ale pai Izirali tugurik tɔŋdɔma mɛ a te Filistia demma.>>

20Samuel ale biisi diila yɔgsum a deri yik Sɔɔl ate wa lo tɛŋ. Pagrim ŋman jam ka wa jigi ya diila wa an jam dɛ jaab kantueŋka ale yokku.

21Nipowa yaa jam Sɔɔl jigi a nya ayen yɔgsum ale jo wa yega. Nipowa yaa weeni ayen, <<Mi fi yɔmawa a zuli fu kama. Mi pai ka m nyuvuri a da a nye dii ate fi weeni ayen m nye la. 22Yɔgyɔgla de wom dii ate mi a weeni la. Basi ate m te fu ŋandiinta ate fi dɛ a nya pagrim a baga a cheŋ.>>

23Alege Sɔɔl zɛri ayen, <<M kan dɛ.>> Wa yɔmma a maa gum nipowa po a weeni wa ayen wa dɛ, ate wa yaa wom a siak. Wa yaa yiti ŋmai a kali gaduokku zuk.

24Nipowa a jam ta ka naab paalib a yaa ko bu. Wa yaa pai boroborok zom a nye boroborok kuui ale kan ta dabinta la. 25Wa yaa nye ŋandiintaŋa a zaani Sɔɔl ale wa nuruma niŋ ate ba dɛ. Yok kula ba yaa nyini cheŋ.

Currently Selected:

1 Samuel 28: BWU

Highlight

Copy

Compare