1 Samuel 27

1Alege Deevid yaa ŋman poli a ta ga wadek jigi ayen, <<Daaŋa de po dinyi Sɔɔl ale ko mu. Dii ale magsi ayen m nye la ale m chali cheŋ Filistia tɛŋka. Dila ale Sɔɔl a basi m gisika Izirali po ate m baga a bɛ wa nisa po.>>

2Deevid ale wa nuruba kobsiyuebi a yaa cheŋ Akis jigi. Akis jam ka Gat naawa Maok nidoabinni. 3Deevid ale wa nuruma jam bo ale ka Akis Gat tɛŋka. Nuru meena ale wa dɔkdem ale Deevid ale wa pooba bayewa Ayinoam ale nyini Jezreel la ale Abigail ale nyini Karmel la. Nabal pukɔgini. 4Sɔɔl ale wom ayen Deevid a chali cheŋ ka Gat la wa an ŋman jaa gisi wa.

5Deevid yaa weeni Akis, <<Fi sui a dan peenti ale mu yaali jigi a te mu tɛŋsaŋa kanyi po ate m ga bo dula. Ka boa ale soa ate mi a bo naamu tɛŋka po ale fu?>>

6Dai dila danni Akis yaa te wa Ziklag tɛŋka. Juda nalimaŋa yaa deri soa dula. 7Deevid a bo Filistia tɛŋka po ka bein ale chiisa sinaansi.

8Deevid ale wa nuruma a yaa siti Gesur ale Girzi ale Amalek demma. (Nuruma de jam bo dula a ga paari Sur ale Ejipiti a beni). 9Deevid ale nye kpaliŋka ale ba la wa ko nidoama ale nipooma ka meena ale yik ba piisaŋa ale niiŋa ale bonsaŋa ale laalaakomiba ale pai ba gattaŋa a yaa le ŋman cheŋ Akis jigi.

10Akis nyiem yaa bek wa, <<Fi cheŋ ka be a ga siti jinla?>> Deevid yaa tulisi ayen wa cheŋ ka Juda yeseok geŋka, yaase Jerameel, yaase wa cheŋ ka Ken tɛŋka. 11Deevid an jam ta nidoaba yaase nipooba vuuta a jam Gat tɛŋka. Wa poli kama ayen, <<Ti dan ta nuru vuuta a jam, ba le weeni Akis ayen, <Deevid ale nye diila ale nna.> >> Deevid a jam nye ka nna wa diipo meena ate wa bo Filistia tɛŋka la. 12Dila la Akis yaa mariŋ Deevid nna yegayega a yaa weeni wadek ayen, <<Deevid dek nuruma, Izirali demma a poom kisi wa kama nna yegayega. Wa le kasim tom a te mu.>>

Currently Selected:

1 Samuel 27: BWU

Highlight

Copy

Compare