1 Samuel 26

1Zif demma yaa cheŋ Sɔɔl jigi Gibea tɛŋka a yaa weeni wa ayen, <<Deevid an suk daa Yachila guuku ale tuk Jesimon la zuwa?>>

2Sɔɔl yaa cheŋ Zif gɔnni po ale Izirali nuruba tusa ŋatawa (3,000) ate wa lueri la, ayen ba gisi Deevid dula. 3Sɔɔl ale wa nuruma yaa tigsi bo suiku ale bo Yachila guuku zuk a tuk Jesimon nyiŋla, alege Deevid a bo gɔnni po. Wa le nya ayen Sɔɔl a va wa a jam dula la, 4wa yaa tom nuruba ate ba nyini kpesi nya ayen Sɔɔl a jam kama.

5Ate Deevid yaa cheŋ Sɔɔl ale bo juijui la, wa yaa nya Sɔɔl ale Abner, Ner biika waai ale ka tugurik tɔŋdɔma kpagi la ale ba doa. Sɔɔl yaa doa ba tigsika jigini ate tugurik tɔŋdɔma a doa gilim wa.

6Deevid yaa bek Ayimelek Yit denɔwa ale Zeruiya biika Abisai waai ale Joab suok la, ayen, <<Ka wana ale wa va mi cheŋ Sɔɔl jigi ba tigsika jigini?>> Abisai yaa weeni ayen, <<Mi le cheŋ ale fu.>>

7Deevid ale Abisai yaa cheŋ tugurik tɔŋdɔma jigi yok a yaa nya Sɔɔl ale wa doa a goa tigsika jigini ate wa gbaluku a chiksi feri za wa zuk geŋsa. Abner ale tugurik tɔŋdɔma ale jam doa a gilim wa.

8Abisai yaa weeni Deevid ayen, <<Jinla Wen a pai fi dachiaka a nyo fi nisa po kama yɔgyɔgla de basi ate m pai m gbaluku a chubi wa a feri tɛŋ bunyi dekki daa buye.>>

9Alege Deevid a weeni Abisai, <<Kan ko wa. Ka wana ale wa pai nisa a tiri waai ate Naawen a lueri la alege kan nye a kaasi?>> 10Deevid yaa weeni ayen, <<Naawen ale boro la nyiŋ, Naawen dek ale wa ko wa. Da dii dai wadek dai ale paari ate wa kpi yaase wa le cheŋ kpaliŋ a ga kpi. 11Alege Naawen a kisi kama ayen mi pai nisa a tiri waai ate wa lueri la. Yɔgyɔgla de pai wa gbaluku ale wa nyiamu leŋka ale moata wa zukku la ate ti cheŋ.>>

12Deevid yaa pai gbaluku ale nyiamu leŋka ale moata Sɔɔl zukku la, ate ba cheŋ. Waai an nya ya yaase wa seba ku nɔi po, yaase waai yiti ya. Ba meena a jaa goa kama diila Naawen ale basi ate goom a chiak ba.

13Deevid yaa gaam taam kauk kunkula a zaani guuku zuk ate ku yalima maga. Peelimmu jam lagri kama ba suŋsuŋ. 14Wa yaa kaari wi tugurik tɔŋdɔma ale Abner Ner biika ayen, <<Ni kan tulisi mu, Abner?>> Abner yaa tulisi ayen, <<Ka fi wana ale a wi naawa?>>

15Deevid yaa weeni ayen, <<Fi ka nidoa, fi daa nidoa? Ka wana ale a nye si fi la Izirali po? Ka boa ate fi kan nya fi nyɔnɔwa naawa zuwa? Waai ale jam ayen wa ko fi nyɔnɔwa naawa. 16Fi le nye diila an nala. Naawen ale boro la nyiŋ fi ale fi nuruma a magsi ni kpi kama, dii nyiŋla ni an nya ni kpagni ate Naawen lueri la zuwa. Ni gisi nya gilim. Naawa gbaluku ale wa nyiamu leŋka ale moata wa zukku la a bo ka bɛ?>>

17Sɔɔl yaa miŋ Deevid lueluku a yaa weeni ayen, <<Deevid m biiga ka fi lueluk ale la?>> Deevid yaa tulisi ayen, <<Ka mi m nyɔnɔ naaba.>> 18Deevid yaa weeni gum du ayen, <<Ka boa ate mi tomteerɔma a vi wa yɔmawa? Mi nye ka sɛ, be ka boan wakaasuŋ ate m nye kaasi? 19Yɔgyɔgla de mi nyɔnɔwa naawa abe wom wa tomteerɔwa ale a biisi diila. Dan ka Naawen ale choa fu ate fi ta chaab ale mi wa be tuesi tiirim m jigi. Alege be dan ka nurubiik nyeka, baai abe le a nye dila la Naawen kikaasa a bo ba zuk, diila fi yiak mi kama ate mi nyini m yenni po ate mi an baga a bo ale Naawen nuruma a puusi ku le magsi ayen m puusi diila. 20Yɔgyɔgla de kan basi ate mi a kpi tɛŋ yoŋŋoa a yalima ale Naawen. Izirali naawa a nyini kama a vi jayirim ase waai ale a vi yeŋ guuta zuima la.>>

21Ate Sɔɔl yaa weeni ayen, <<Mi nye kaasi kama. Deevid, m biiga, ŋman jam. Dii nyiŋla fi nya kama ayen m nyuvunni a nye wari ka yega jinla. M kan nye fu wari ŋmana. Mi nye nna ase m ka beruk la. M nye bɛ kama yega.>> 22Deevid yaa tulisi ayen, <<Naawa gbaluku ale nna. Basi ate fi nuruma wanyi a jam tuesi. 23Naawen a tuni waai meena wa wamaŋsa ale wa wensie nyiŋ kama. Naawen ale pai fu a nyo m nisa po jinla, alege mi kan pai nisa a tiri Naawen ale lueri waai la. 24Mi ale nya fi nyuvunni a ta tuilum jinla la, Naawen a nya mi mɛ nyuvunni tuilum a vari mu daanika po a basi.>>

25Ate Sɔɔl a yaa weeni Deevid ayen, <<Naawen niak fu, Deevid m biiga, fi le nye wakpiema abe fi nya pagrim. Deevid yaa cheŋ alege ate Sɔɔl a ŋman kuli.>>

Currently Selected:

1 Samuel 26: BWU

Highlight

Copy

Compare