1 Samuel 25

1Dai yeŋ ate Samuel yaa kpi ate Izirali demma meena tigsi a kum wa le kpi la. Ba jam gu wa ka wa tɛŋka Arama. Deevid yaa jam cheŋ ga bo Paran gɔnni po. 2Nuru ale jam nyini Maon a ta tɛŋ Karmel. Wa jam jigsi ka nna yegayega. Wa jam ta ka bua tusidi ale piisa tusa ŋata (3,000). Wa jam boro a gebi ka wa piisaŋa kɔbtaŋa Karmel. 3Nuruwa de yuei jam le Nabal. Wa be jam ka Kaleb ŋaaŋbiik. Wa powa yuei jam le Abigail. Wa ka nipok waai ale jam ta yam ale nala nna yegayega alege Nabal jam ka nyeka tuem nyɔnɔ. Wa kan nye nuruba a magsi.

4Deevid ale jam diem bo gɔnni po la wa yaa wom ayen Nabal a boro a chari wa piisaŋa. 5Wa yaa tom nuruba pi ayen, <<Ni cheŋ Nabal jigi Karmel a ga puusi wa te mu. 6Ni weeni Nabal ayen, <Fi ale fi dɔkdemma ale baai meena ate fi soa la ale ta nyiŋyɔgsa.

7<< <M wom kama ayen fi boro a chari fi piisaŋa. Fi naapeerisaŋa ale jam bo le ti la, ti an nye ba wari ya. Fi piisaŋa ale jam kasim bo Karmel la ti an zu ŋa. 8Bek fi tomteerɔma ba le weeni fu. Ti jam ka suipeentik dai ta jiirim ale m nuruma. Fi le ta jabuui meena la pai te ba ale fi biika Deevid.> >>

9Deevid nuruma ale ga paari du la, ba yaa weeni Nabal Deevid ale weeni ba diila alege a limisi.

10Wa weeni ba ayen, <<Deevid ka wana? Ka wana ale Jese biiga? Jinla tomteerɔba yegayega ale a chali ale a ge ba kpaga. 11Mi ta ŋandiinta ale nyiam kama ale lanta a magsi m tomteerɔma ale a gebi m piisaŋa kɔbtaŋa la. Alege mi kan pai a te nuru baai ate mi zɛ ba.>>

12Deevid nuruma yaa ŋman weeni wa dii meena ate Nabal a weeni la. 13Deevid yaa weeni ba ayen, <<Ni pai ni gebisaŋa.>> Ba yaa pai ba gebisaŋa, ate wa mɛ a pai wa gebika. Nuruba kobsinaansi ale jam va Deevid cheŋ alege kobsiye wari a nya ba ŋantaŋa.

14Nabal tomteerɔma wanyi yaa weeni Nabal powa Abigail ayen, <<Deevid ale tom nuruba gɔnni po ayen ba jam puusi ti kpagni alege Nabal a lɛ ba. 15Nuruma de ka nuru maŋsa a nye ti a magsi ba kan nye ti a kaasi. Ti le ta ti piisaŋa a bo gɔnni po ale ba la ba an zu ŋa. 16Yɔk ale kantueŋ meena ba kasim a lik ti kama. Ti le jam bo le ba a nya ti piisaŋa la ba jam a nye nna ase ka parik la a gilim ti. 17Yɔgyɔgla de be poli ku wari a nya ti le ti nye diila. Daani kpieŋ ale za ka jam ti kpagni ale wa dɔkdemma zuk. Nabal nyeka tua ka nna yegayega ate nuru an baga a biisi ale wa.>>

18Abigail yaa nye nwuli a pai borobotta kobsiye ale daam bunlɔgta tiye, ale piisa ŋanu lam diŋta, ale ŋandiinta ti chaab a yaa pai ba meena a vi bonsa zuk. 19A yaa weeni wa ayen, <<Cheŋ ate mi a vi ni.>> Alege wa an jam weeni wa chorɔwa.

20Abigail yaa do wa boniŋka a ga paari gɔnni po guuku jigini. Dula jigini wa yaa tu Deevid ale wa nuruma a siŋ cheen wa jigi. 21Deevid poom weeni kama ayen, <<Nabal ŋantaŋa ate mi a nya ba zuk gɔnni po la ka koa. Mi nya ŋa zuk kama ate kunyi mɛ la an bɛ ya. Mi nye wa ka nalim alege ate wa pai biem a tuni mi. 22Wen a namsi mi Deevid nna yegayega. Ase mi nin basi ate Nabal nuruma wanyi mɛ la a bɛ alege ate vari a veenti.>>

23Abigail ale ga nya Deevid la, wa yaa kpabi nyini wa boniŋka zuk a siŋ a koori tɛŋ a puusi wa. 24Wa yaa kpi duna Deevid niŋ a weeni ayen, <<M nyɔnɔ, pai wari meena a ji mi. Mi a saalim, basi ate m biisi ale fu. Wom m le ta dii ayen m biisi ale fu la. 25M nyɔnɔ, Nabal ka kiriya. Kan basi ate wa le nye diila a daani fu. Wa yuenni ale ka diila, wadek ka dila. Wa yuenni kiri ale beruk. Wa bɛ sum ka beruk. Alege mi fi tomteerɔwa, nina an tu baai ate fi tom la.

26<<Naawen a kasi fu kama ate fi an ko nuru fi abe an namsi waai ya. Naawen ale ka waai ale sum vua la, wa basi ate fi dachaasaŋa a chim betta ase Nabal. 27M ta ka tiirim a jam ayen m te nuru baai ale va fu la. 28Mi a saalim, vɔŋ m kaasuŋku a te mu. Naawen ale basi ate fi dɔkdemma a ta nalima yegayega, dii nyiŋla fi ale a kpaliŋ wa kpaliŋsaŋ. Fi le vua la nyiŋ, Kan nye wabiowa. 29Nuru a dan poom a vi fu ayen wa ko, alege Naawen fi Wenni ale yik fu tara ate fi vua. Wa le yuk fi dachaasaŋa nyuvooŋa a basi ase wa le pai tintain a nyo visiŋ po a nak a basi diila. 30Naawen ale yik ŋanmaŋ sii meena ate wa puulim ayen wa te fu la a ta. Wa le basi ate fi chim Izirali niŋdeerɔ. 31Ate fi kan ko nuru baai ale kan seba wari nɔi po la a nya kaasuŋ yaase daanika. Mi a saalim, Naawen a dan nye wamaŋsaŋa de meena a te fu, teeri m wari.>>

32Deevid yaa tulisi Abigail ayen, <<Pak Naawen, Izirali Wenni dii ale tom fu mi jigi la. 33Fi le nya niauŋ fi yammu nyiŋ. Fi kasi mu kama ate mi an ko nuruba yaase m namsi nuruba jinla. 34Naawen, Izirali Wenni ale vua la nyiŋ, wa kasi mu kama ate mi an nye fu wari ya. Fi dan kan kpabi jam tu mu kama nna, Nabal nuruma wanyi mɛ ti kan vua paari chum saluiwa.>>

35Deevid yaa tuesi Abigail tiiritaŋa. Wa weeni Abigail ayen, <<Kuli yeri ale suiyɔgni. M wom fi biika kama, m be le nye fi le weeni diila.>>

36Abigail ale ŋman kuli ga a paari yeri la, Nabal kali kama a dɛ ase naab la. Wa jam nyu ka daam buk ate wa sui a peenti. Wa an jam weeni wa wari alege ate vari a veenti. 37Saluik ate wa daamu a yiinti la, wa powa yaa weeni wa wari meena. Wa le wom la suinum tuem deri yik wa ate wa gbariŋ. 38Daa pi ŋaaŋnyiŋ Naawen yaa ka te Nabal ate wa kpi.

39Deevid ale wom ayen Nabal a kpi la, wa yaa weeni ayen, <<Pak Naawen. Nabal a lɛ mi kama, alege Naawen a maari mu. Wa kasi mu kama ate mi an nye wari a kaasi ya. Naawen a namsi Nabal kama wa kaasuŋku nyiŋ.>> Deevid yaa tom a weeni Abigail ayen wa chim wa pok. 40Wa tomteerɔma yaa cheŋ Karmel a ga weeni Abigail ayen, <<Deevid ale tom ti ayen ti ta fu jam ate fi chim wa pok.>>

41Abigail yaa koori tɛŋ a weeni ayen, <<Mi ka ni tomteerɔ. Mi gomsi kama ayen m tom a te ni abe m sugri m kpagni tomteerɔwa naŋsa.>> 42Abigail yaa nye nwuli a do boniŋ a va Deevid ale tom baai la ale wa dɔkliema banu a cheŋ. Wa yaa jam chim Deevid pok. 43Deevid jam faari ka Ayinoam mɛ. Wa jam nyini ka Jezreel. Ba noa baye wa jam ka Deevid pooba. 44Sɔɔl liewa Michal jam ka Deevid pok mɛ, alege Sɔɔl a jam pai wa te ka Lais biika Paltiel waai ale nyini Gallim.

Currently Selected:

1 Samuel 25: BWU

Highlight

Copy

Compare