1 Samuel 24

1Sɔɔl ale nye kpaliŋka ale Filistia demma ale pilim ŋman la, waai yaa weeni wa ayen, <<Deevid a bo ka En Gedi Pinaŋa po.>> 2Wa yaa lueri nuruba tusa ŋata (3,000) Izirali tɛŋka meena ate ba ga a gisi Deevid ale wa nuruma, Gɔi Bua Pinaŋa niŋ.

3Sɔɔl yaa jam piisa geruku ale moata manpanni la piuŋ vɔrup ale jam bo dula, ate wa jo ayen wa basi yaata. Deevid ale wa nuruma abe jam boka vɔrup bula dek po niŋniŋŋa. 4Nuruma yaa weeni Deevid ayen, <<Jinla ale dai dii dai ate Nyɔnɔwa a biisi di wari la, wa weeni ayen, <M le pai fi dachiaka a te fu. Nye wa fi ale a yaali diila.> >> Deevid yaa mak a kuuk a ga gebi Sɔɔl garukku nɔnni.

5Ku ŋaaŋnyiŋ Deevid ŋman ŋma wadek wa le gebi Sɔɔl garukku nɔnni la. 6Wa yaa weeni wa nuruma ayen, <<Naawen a maari mu ate m kan ŋman nye m kpagni wanni de choa. Naawen ale lueri Sɔɔl naab. Ku an magsi m nye wa wari a kaasi dii nyiŋla Naawen ale lueri wa ate wa chim naab.>> 7Deevid jam biisi ka nna a kasi wa nuruma ate ba an nye Sɔɔl wari ya. Ate Sɔɔl yaa nyini vɔrumu po a nyini a cheŋ.

8Deevid yaa saŋ va nyini a kaari wi ayen, <<M nyɔnɔ naaba.>> Sɔɔl yaa cheen ŋaaŋ nya ate Deevid a koori tɛŋ a zuli wa. 9Wa yaa weeni Sɔɔl ayen, <<Ka boa ale soa ate fi a wom nuru baai ale a weeni fu ayen, <Deevid a yaa wa ko fu kama la.> 10Ku daa wensie mi nya suik kama magsi m ko fu vɔrumu po. Mi nuruma gela weeni ayen ka m ko fu, alege mi zɛri ale basi fu, dii nyiŋla Naawen ale lueri fu. 11M dek koa, nya mi gebi ka fi garukku nɔnni, alege an ko fu. Yɔgyɔgla de be miŋ a seba ayen mi ka popola baata ale fu. Mi an zɛri fi nɔi ya. Mi an nye fu wari a kaasi ya, alege fi a vi mu ayen fi ko. 12Naawen namsi fu fi le nye mu diila, mi tɔgni ka wari ale fu. 13Daam ale weeni ayen, <Nuru baata ale a nye wabaata.> Alege kan te ku daani fu mi kan nye fu wari ya.

14<<Ka mi ate Izirali naawa a vi? Biak kpiukwa, yaase m ka kabik ga. 15Naawen be bo mi ale fi buusa a nya ti waai ale kaasi la. Naawen maa maari mu abe wa sak ayen m nye magsi. Wa bɛ vari mu fi jigi a basi.>>

16Deevid ale biisi nueri la, Sɔɔl yaa bek ayen, <<Ka fi lueluk ale la, m dek biiga?>> Ate wa yaa kum ate ku jueli. 17A weeni ayen, <<Fi ka nuru maŋ a gaam mi. Fi nye a magsi kama alege mi nye a kaasi. 18Fi weeni mu wamaŋ sii meena ate fi nye la. Naawen a pai mu te fu kama, alege fi an ko mu. 19Nuru a dan nya wa dachiak wa basi ate wa a cheŋ yaa wa kan basi? Naawen ale tuni fu a magsi wamaŋ kaai ate fi nye mu la. 20Mi seba ayen fi le sum chim naab a nya Izirali tɛŋka zuk. 21Yɔgyɔgla de puulim ale Naawen ayen fi kan ko m ŋaaŋsaŋa abe fi kan yeeri m yuenni m kowa dɔkdemma po.>>

22Deevid yaa puulim a te Sɔɔl. Ate Sɔɔl yaa ŋman kuli, alege ate Deevid ale wa nuruma a ŋman ga suk guuku zuk.

Currently Selected:

1 Samuel 24: BWU

Highlight

Copy

Compare