1 Samuel 23

1Nuru yaa weeni Deevid ayen, <<Nya, Filistia demma a kpaliŋ kama ale Keila demma ale a zu ba kpanni ŋantaŋa ate ba fɔbi dueni la.>> 2Deevid yaa bek Naawen ayen, <<M cheŋ a ga nye kpaliŋ ale Filistia demma?>> Naawen yaa tulisi wa ayen, <<Cheŋ ga siti ba a vari Keila demma basi.>>

3Alege Deevid nuruma yaa weeni wa ayen, <<Yɔgsum ale ta ti dela Juda tɛŋka po. Yɔgsum ale yik ti gaam di ase ti nin cheŋ Keila juijui ate Filistia tugurik tɔŋdɔma a boro la.>>

4Deevid yaa ŋman bek Naawen ate Naawen tulisi wa ayen, <<Cheŋ Keila tɛŋka. M le maari fu ate fi nak dɛ Filistia demma.>> 5Deevid yaa cheŋ Keila a ga nye kpaliŋ ale Filistia demma a tuesi ba niiŋa. Deevid a jam ko Filistia demma ka nna yegayega a vari Keila demma a basi. 6Ayimelek nidoabinni Abiata a jam ta ka garuk geli#23:6 Nyinika 28:28-30; Teerika 33:8 a jam diipo ate wa jam Deevid jigi Keila tɛŋka po la.

7Waai yaa weeni Sɔɔl ayen, <<Deevid yɔgyɔgla de a boka Keila.>> Sɔɔl yaa weeni ayen, <<Wen pai Deevid a nyo m nisa po kama. Wa bari yik ka wadek dii nyiŋla wa jo ka tɛŋ kaai ale ta kuta tuata.>> 8Sɔɔl yaa wi wa tugurik tɔŋdɔma meena ate ba jam jigi ayen ba ga nye kpaliŋ. Ba yaa gomsi ayen ba cheŋ Keila a ga siti Deevid ale wa nuruma.

9Deevid mɛ yaa wom ayen Sɔɔl a ta ka popola baata zɔga a yaa wa siti wa. Dila nyiŋ wa yaa weeni kaabteerɔwa Abiata ayen ta garuk genni a jam. 10Deevid yaa puusi ayen, <<Naawen, Izirali Wen yaa, mi wom kama ayen Sɔɔl a zɔk kama ayen wa jam kaasi Keila tɛŋka mi nyiŋ. 11Keila tɛŋka niŋdeerɔma ale pai mi a te Sɔɔl? Sɔɔl ale jam Keila ase mi ale wom diila? M Naawenni, Izirali Wen yaa, weeni a sak mi fi tomteerɔwa.>> Naawen yaa tulisi ayen, <<Sɔɔl ale jam.>>

12Deevid yaa ŋman bek ayen, <<Keila niŋdeerɔma ale pai mi ale m nuruma a nyo Sɔɔl nisima po?>> Naawen yaa tulisi ayen, <<Ba le pai te.>>

13Deevid ale wa nuruba kobsiyuebiwa yaa basi Keila alege a nyiem a diak tɛŋsaŋa. Sɔɔl ale wom ayen Deevid a basi Keila la, wa an cheŋ du la.

14Deevid jam suk bo ka pinaŋa po guuk zuk Zif gɔnni po. Sɔɔl jam kasim a gisi Deevid ka daaŋa meena alege Wen an pai Deevid a te wa.

15Deevid ale jam bo Yores Zif gɔnni po la, wa jam wom kama ayen Sɔɔl a cheen wa ko wa. 16Alege Sɔɔl biika Jonatan yaa cheŋ Deevid jigi Yores a te wa nyiŋbiiri ate wa siaka a pagra ale Wen. 17Jonatan yaa weeni wa ayen, <<Kan chali yɔgsum, dii nyiŋla mi kowa kan tiri fu. Fi le chim Izirali naab ate mi pai a vi fu. Mi kowa Sɔɔl dek poom seba kude kama.>> 18Ba nɔi bayewa yaa nye nɔiyeŋ Naawen niŋ. Ate Jonatan yaa kuli alege Deevid a bo Yores tɛŋka.

19Zif demma yaa cheŋ Sɔɔl jigi Gibea tɛŋka a weeni wa ayen, <<Deevid a suk bo ka tama tɛŋka po. Wa bo ka Yores pinaŋa po, Yachila guuku zuk, Jesimon yeseok geŋ. 20Yɔgyɔgla de, naaba, jam diipo ate fi a yaali la. Ku ka tama tuini ayen ti pai Deevid a te fu.>>

21Sɔɔl yaa tulisi wa ayen, <<Naawen a niak fu fi le ta jiirim ale mu la nyiŋ. 22Cheŋ a ga kpesi nya chak. Nya ase wa bo ka be dek chekki abe fi bek ase ka wana ale nya wa. Mi wom ayen wa seba ka nna yegayega. 23Kpesi bek wom wa sukka jiŋŋa meena abe fi ŋman jam weeni mu wari meena. Ate m yaa cheŋ ale fu. Deevid a dan bo dula dan poom ka m gisi Juda buuni po meena m le nye.>>

24Ba yaa dɛ Sɔɔl niŋ a cheŋ Zif. Yɔgyɔgla de Deevid nuruma jam ga bo ka Maon gɔnni po, Jesimon yeseok geŋ. 25Sɔɔl ale wa nuruma yaa cheŋ ba gisi Deevid, alege Deevid a wom ba wari a yaa cheŋ siŋ piuŋ po Maon gɔnni po. Sɔɔl ale wom la, wa yaa va Deevid naŋsa a jam Maon gɔnni po.

26Sɔɔl a jam sali va ka piuŋku gauŋ nyiŋ alege Deevid ale wa nuruma mɛ a bo gauŋ kunkula. Ba jam a kpabi kama ayen ba chali bɛ Sɔɔl, dii nyiŋla Sɔɔl ale wa nuruma a jam moata ba kama. 27Alege ba yaa tom waai Sɔɔl jigi ate wa weeni ayen, <<Nye nwuli a jam. Filistia demma a jam siti ti tɛŋka kama.>> 28Sɔɔl yaa basi Deevid vi ka ale cheŋ ayen wa tu chaab ale Filistia demma. Dila ale soa ate ba a wi dela ayen piuŋ kuui jigi ate ti chali bɛ ti dachaasaŋa la. 29Deevid yaa basi Maon gɔnni ale cheŋ ga bo En Gedi pinaŋa po.

Currently Selected:

1 Samuel 23: BWU

Highlight

Copy

Compare