1 Samuel 22

1Deevid yaa basi Gat ale ga Adullam a suk piuŋ vɔrup po. Wa suataŋa ale wa mabisaŋa ale wom ayen wa bo du la la, ba yaa cheŋ ayen ba nya wa. 2Baai meena ale jam bo daanika po ale ta pama ale baai nina ale kan sueri ale ba boka la a yaa gum Deevid ŋaaŋviirɔma po ate wa chim ba niŋdeerɔ. Nuru baai ale jam bo ale wa la a paari ase ka kobsinaansi.

3Deevid yaa zaani dula a cheŋ Mizpa tɛŋka ale bo Moab po la a yaa biisi ale Moab naawa. Wa weeni wa ayen, <<Mi a saalim ayen fi basi ate m kowa ale m mawa a jam bo ale fu ate mi yaa baga miŋ Wen ale a yaali ayen wa nye dii a te mu la.>> 4Wa yaa basi ba ate ba bo le Moab naawa, alege ate Deevid a suk bo juijui ate wari a kan nye wa la.

5Alege biisiteerɔwa Gad yaa weeni Deevid ayen, <<Kan bo juijui ate fi boro nna. Cheŋ Juda tɛŋka.>> Deevid yaa cheŋ Yeret tiisaŋa po.

6Dai yeŋ ate Sɔɔl a yaa kali tiib tɛŋ guuk zuk a moata Gibea. Wa jam ta ka gbaluk wa nisa po alege ate wa tugurik tɔŋdɔba kpaŋŋa a za gilim wa. Ba jam weeni Sɔɔl kama ayen waai seba Deevid ale wa nuruma ale suk kauk kuui la kama. 7Sɔɔl yaa weeni ba ayen, <<Ni wom de, nama Benjamin buuni. Nama taa poli ayen ni nye ka sɛ? Ni a poli ayen ni basi mi kama abe ni cheŋ Deevid jigi yaa? Wa le te ni meena tɛŋsa ate ni a kpa? Wa le basi ate ni chim kpaga tugurik tɔŋdɔba tusa zuwa yaase tugurik tɔŋdɔba kook zuwa? 8Chichama karo ni meena a zɔk kama ayen ni yeeri mi naamu po. Midek biik a nye ka nɔiyeŋ ale Deevid alege ni waai an weeni mi. Waai an weeni ayen mi biika a te Deevid ka nyiŋbiiri ayen wa mak a ko mi.>>

9Doeg waai ale ka Edom denɔ a jam za dula ale tomteerɔma ate wa a nya ba zuk la a yaa weeni wa ayen, <<Mi nya Deevid. Wa jam kama ayen wa nya Ayimelek, Ayitub biika ale bo Nob la. 10Ayimelek yaa puusi te Deevid ale te wa ŋandiinta a ŋman pai Goliat Filistia denɔwa gebika te wa.>>

11Sɔɔl yaa tom ayen ba ta kaabteerɔwa Ayimelek waai ale ka Ayitub biik la ale Ayimelek dɔkdemma meena ale kaabteerɔba ale bo Nob la a jam. Ate ba meena jam naawa jigi. 12Sɔɔl yaa weeni Ayimelek ayen, <<Ayitub biika wom yɔgyɔgla de.>> Ayimelek yaa weeni ayen, <<Mm m nyɔnɔ.>>

13Sɔɔl yaa weeni ayen, <<Ka boa ale soa ate fi ale Jese biika a ta chaab ale mi? Fi te wa boroborok ale gebik. Fi bek Wen te wa mɛ. Deevid basi mi kama ale ta chaab ale mi a limisi ayen wa siti yɔgyɔgla de.>>

14Ayimelek yaa weeni ayen, <<Fi ka tomteerɔ ŋmana ate wa ta wensie ase Deevid fidek chicham biika a ŋman chim fi tugurik tɔŋdɔma kpagi la. Waai meena ale bo fi yenni po la a zuli wa kama. 15Daa mi piilimka ale la ate m bek Wen a te wa la. Kaa ŋma mi yaase mi dɔkdemma. Mi, fi tomteerɔwa zɛ dii meena ale a nye la.>>

16Alege naawa weeni ayen, <<Ayimelek, se fi ale fi dɔkdemma a kpi.>>

17Wa yaa weeni tugurik tɔŋdɔma ale za wa gauŋ la ayen, <<Ni cheŋ ga ko Naawen kaabteerɔma, dii nyiŋla ba a maari ka Deevid. Ba jam seba wa le chali a bɛ la kama alege an weeni sak mu.>> Alege tugurik tɔŋdɔma zɛri ba an ko Naawen kaabteerɔma.

18Naawa yaa weeni Doeg ayen, <<Cheŋ a ga ko kaabteerɔma.>> Ate Doeg Edom denɔwa yaa cheŋ ga ko kaabteerɔma. Dai dila danni wa ko kaabteerɔ baai ale jo ba garuk gela la ka pinaanuŋ ale banu. 19Wa maa ko Nob demma mɛ juijui ate kaabteerɔma a nyini la. Wa jam ko nidoaba ale nipooba ale bisa ale buluata ale niiga ale bonsa ale piisa meena.

20Alege Ayimelek biika Abiata jam chali bɛ kama. Wa jam chali cheŋ a ga gum ka Deevid ale wa nuruma po. 21Wa yaa weeni Deevid ayen Sɔɔl a ko Naawen kaabteerɔma kama. 22Deevid yaa weeni wa ayen, <<Doeg Edom denɔwa ale bo Nob ku danni. Mi seba ayen ka wala ale sum weeni Sɔɔl. Mi ale soa fi kowa dɔkdemma kummu. 23Bo dela ale mu. Kan chali yɔgsum. Nuru waai ale a yaali ayen wa ko fu la a yaali ayen wa ko ka mi. Jaab kan nye fi ale mi.>>

Currently Selected:

1 Samuel 22: BWU

Highlight

Copy

Compare