1 Samuel 21

1Deevid yaa cheŋ Nob ayen wa nya kaabteerɔwa Ayimelek. Ayimelek ale nya Deevid la yɔgsum yaa yik wa ate wa nyiŋ a gɔk. Wa yaa bek Deevid ayen, <<Ka boa ate fi cheen fidek fi nyiini? Ka boa ate nuru an va fu?>>

2Deevid yaa tulisi wa ayen, <<Naawa ale tom mu ayen m nye wari a te wa. Wa bɛ weeni kama ayen m kan weeni waai wa le weeni ayen m nye diila. M weeni m nidoama kama ba le ba tu mu juijui la. 3Yɔgyɔgla de, ka boan ŋandiinta ate fi ta? Te mu borobotta tinu yaase jabuui meena ate fi ta la.>>

4Kaabteerɔwa yaa weeni Deevid ayen, <<Mi ka boroborok kuui ate nuru meena a ŋɔbi la, alege ka tuilum boroborok. Ni baga a ŋɔbi kama ase fi nuruma a nin kan goa ale nipooba.>>

5Deevid yaa tulisi ayen, <<Mi nidoama a nyiem kasim a yik badek kama a ta tuilum ase ti ni poom cheŋ tuima tomka. Alege ka yɔgyɔgla de ate ti bo tuin dii ale chim di tɔga po.>> 6Kaabteerɔwa yaa te Deevid tuilum boroborok Naawen niŋ dii nyiŋla ku choa a jam karo. Daa meena ba nyiem pai Wen niŋ boroboroku kama ale pai boroborok tuiluk a dueni du.

7Sɔɔl tomteerɔma wanyi ate ba a wi ayen, Doeg ate wa nyini Edom la a yaa jam dula jigini diila wa jam ayen wa puusi Naawen. Wa jam ka Sɔɔl tomteerɔma po wanyi waai ale chim naapeenaab la.

8Deevid yaa bek Ayimelek, <<Fi ta gbaluk yaase gebik dela? Naawa tuntomika a nye wari ka nna yegayega ate mi an baga a pai gbaluk yaase gebika.>>

9Kaabteerɔwa yaa tulisi ayen, <<Goliat Filistia denɔwa ate fi ko Elaya Viaka po la gebika a bo dela. Ka pɔbi ale ka garuk a dua kaabteerɔwa garuk genni ŋaaŋ. Fi daa yaali fi baga a, pai kama. Gebik ka choa karo a gum kala po.>> Deevid yaa weeni ayen, <<Gebik karo ase ka la la. Pa te mu.>>

10Dai dila danni Deevid yaa chali cheŋ Gat naawa Akis jigi Sɔɔl nyiŋ. 11Alege Akis tomteerɔwa a weeni wa ayen, <<Daa Izirali tɛŋka naawa Deevid ale nna yaa? Daa wala ate ba jam lenni yiini ayen Sɔɔl a ko ka wa tusa ate Deevid a ko wa tusa piisa la yaa?>>

12Deevid a jam wom ba le a biisi la kama a yaa chali yɔgsum ale Gat naawa Akis. 13Wa yaa jam potim a nye ase wa a yesim la Akis ale wa tomteerɔma niŋ. Wa le jam diem bo le ba la, wa jam a nye ase ka yesiŋ la, a pai wa ninyeensaŋa a kpaari tuataŋa, ale basi ate tintueta a chali va wa teeŋka a siŋ.

14Akis yaa weeni wa tomteerɔma ayen, <<Ni nya nuruwa. Wa a yesim kama ka boan ti ni ta wa jam mi jigiya? 15Mi ta yesiŋsa piisi kama. Mi kan yaali ni ta wa jam ate wa a nye nna mi niŋŋa. Ni kan te wa jo mi yeri po.>>

Currently Selected:

1 Samuel 21: BWU

Highlight

Copy

Compare