1 Samuel 20

1Deevid yaa basi Naiot ale bo Arama po la ale chali cheŋ Jonatan jigi. Wa yaa bek Jonatan ayen, <<M nye ka sɛ? M kaasuŋku ale boa? M tin nye ka sɛ a kaasi fi kowa? Ka boa ate wa yaali ayen wa ko mu?>>

2Jonatan yaa tulisi ayen, <<Aaya, fi kan kpi. Nya, mi kowa kan nye wa kpienni yaase wa fiik alege kan weeni mi. Boan le soa ate wa a suk kude mi jigiya? Ku daa wensie.>>

3Alege Deevid yaa pɛ, a weeni ayen, <<Fi kowa seba kama nalimnyiini ayen fi a yaali mi kama. Wa le weeni wadek ayen, <Jonatan an magsi wa seba kan daa di wa sui ale kaasi.> Deevid, Naawen ale vua ate fi mɛ vua la mi an yalima ale kum.>>

4Jonatan yaa weeni Deevid ayen, <<M le nye dii meena ate fi a yaali ayen m nye la.>>

5Deevid yaa weeni ayen, <<Nya, chum ale Chiik Paalika tigini. Ku magsi ka m dɛ ŋandiinta ale naawa, alege basi ate m suk peelim a paari daa ŋata junɔi. 6Fi kowa a dan kan nya mu weeni wa ayen m cheŋ ka Betiliyem. Ben meena ase nna po de la wa dɔkdemma a tigsi ka chaab a nye kaabka. 7Fi kowa dan weeni ayen, <ku nala>, m soa m dek kama. Alege wa sui a dan puuri, fi seba ayen wa le nye mu wari. 8Jonatan ta wensie ale mi fi tomteerɔwa. Fi nye ka nɔiyeŋ ale mu Naawen niŋ. M dan nye kaasi fu ko mu fidek! Boan nyiŋ ate fi a pai mu a te fi kowa?>>

9Jonatan yaa tulisi ayen, <<Aaya, kula kan nye! Mi dan seba ayen m kowa a zɔk ayen wa nye fu biem, m le kaam fu.>>

10Deevid yaa bek wa ayen, <<Fi kowa a dan kan tulisi fu magsi ya, ka wana le wa basi ate mi seba?>>

11Jonatan yaa weeni Deevid ayen, <<Basi ate ti cheŋ wuuku po.>> Ba nɔi bayewa yaa cheŋ wuuku po.

12Jonatan yaa weeni Deevid ayen, <<Mi a puulim kama Naawen, Izirali Wenni niŋ. Vɔnuŋ nna po dɛ m le nya m kowa popola ale ka diila. Mi dan biisi fi wari ate wa ta popola maŋsa m le basi ate fi seba. 13Alege wa daa poli ayen wa nye fu biem m le basi ate fi seba abe m basi ate fi chali bɛ. M dan kan nye ya Naawen namsi mu nna yegayega. Naawen a bo ale fu ase wa le bo ale mi kowa diila. 14Alege mi ale vua la nyiŋ sak Naawen ŋmanteka ale mu ate m kan kpi. 15Kan basi ŋmanteka sakka ale m dɔkdemma, ase Naawen a nin poom kaasi fi dachaasaŋa meena tɛŋka.>>

16Dila la Jonatan yaa nye nɔiyeŋ ale Deevid. Wa weeni ayen, <<Naawen ate ti ku jo Deevid dachaasaŋa nyiŋ.>> 17Ate Jonatan a weeni Deevid ayen wa pilim weeni pumpuulimaŋa ayen wa le kasim a yaali wa, dii nyiŋla wa a yaali Deevid ka nna yegayega ase wa ale a yaali wadek diila.

18Jonatan yaa weeni Deevid ayen, <<Chum ale Chiik Paalika Tigini. Fi kalika jigini za ku dua kama. M kowa za wa jɔk fu kama. 19Daa ŋatawa danni nye nwuli cheŋ juijui ate daanika de daam piilim ate fi suk la. Limisi Ezel piuŋku tɛŋ. 20Daa ŋatawa danni m le tɔŋ pee ŋata a basi piuŋku geŋ ase mi a tuk ka jaab nyiŋ a tɔŋ la. 21M dan nye dila m yaa le tom biik ate wa gisi peeŋa. M dan weeni wa ayen, <Peeŋa a moata fu kama, ta ŋa jam de,> fi baga a nyini fi sukka jigini kama. Wari kan nye fu. Naawen ale tɔlim vua la biem ka. 22Alege m dan weeni biika ayen, <Nya, peeŋa bo ka niŋ,> ku a fɛ ate fi cheŋ, dii nyiŋla Naawen a weeni fu kama ayen fi chali bɛ. 23Teeri dii ate ti biisi la wari. Naawen ka seerɔ mi ale fi suŋsuŋ taa cheŋ.>>

24Deevid yaa suk wuutaŋa po. Chiik paalika Tigini ale paari la, naawa yaa kali ayen wa dɛ ŋandiinta. 25Wa kali ka wa nyiem ale a kali juijui la a moata siaka. Jonatan yaa za tuk naawa alege Abner kali naawa gauŋ nyiŋ. Deevid jigini doa koruk. 26Dai dila danni Sɔɔl an weeni wari ya. Wa poli kama ayen, <<Dai dii dai wari ale nye Deevid ate wa an nala.>> 27Alege dai dii ale paasaŋ la ka chiika daa ŋaye dai alege Deevid jigini a diem doa koruk. Sɔɔl yaa bek Jonatan ayen, <<Ka boa ale soa ate Jese nidoabinni deemwa ale jinla an jam tigini?>>

28Jonatan yaa tulisi ayen, <<Deevid a saalim mi kama ayen m basi ate wa cheŋ Betiliyem. 29Wa weeni ayen, <Ba a yaali ba nye ka kaabka tɛŋka po, ate m suoku a yaa tom ayen m jam. Yɔgyɔgla de mi dan ka fi doa, be basi ate m ga nya m suataŋa.> Dila ale soa ate wa an jam wa dɛ ale naawa.>>

30Ate Sɔɔl sui yaa puuri nna yegayega ale Jonatan. Sɔɔl yaa weeni Jonatan ayen, <<Fi ka nipok waai nyeka ale tua ale ka kiri la biik. Mi seba ayen fi za ka Jese biika Deevid ŋaaŋ a maari wa. Fi a te tidek ale fi mawa ale biak fu la ka chivie. 31Jese biika ale tɔlim vua a boro la, fi kan chim naaba yaase fi nya naammoa. Yɔgyɔgla tom ate ba ta Deevid jam te mu. Se m ko wa.>>

32Jonatan yaa bek wa kowa ayen, <<Ka boa ale soa ate fi ayen fi ko Deevid? Ka boan jaab wari ate wa kaasi?>> 33Sɔɔl yaa pai wa gbaluku a yuk Jonatan ayen wa ko wa. Jonatan jam seba kama ayen wa kowa a yaali ayen wa ko Deevid kama.

34Jonatan sui yaa puuri nna yegayega ate wa basi kalika jigini. Daa ŋayewa danni Jonatan jam zɛri ŋandiintaŋa dɛka kama. Chivie ale jam yik wa ale wa kowa ale a nye Deevid diila.

35Vari ale veenti la saluik Jonatan yaa cheŋ Deevid jigi ase ba le poom nye nɔiyeŋka diila. Wa jam te ti ka biik a va wa cheŋ. 36Jonatan yaa weeni biika ayen, <<M dan tɔŋ peeŋa fi chali ga gisi pai ta jam.>> Biika ale chali a cheŋ la. Jonatan yaa tɔŋ peeŋa a basi wa niŋ. 37Biika yaa chali cheŋ Jonatan ale tɔŋ peeŋa ate ŋa lo juijui la. Jonatan yaa wi weeni ayen, <<Penni a bo ka fi niŋ.>> 38Wa yaa na weeni ayen, <<Mwuli, cheŋ nwuli, kan zaani.>> Biika yaa pai penni a ta jam wa kpagni jigi. 39Biika jam zɛ ku kiri ya, ka Deevid ale Jonatan nyiini ale seba. 40Jonatan yaa pai wa tommu ale wa peeŋa a te biika ayen, <<Ta ŋman cheŋ tɛŋka po.>>

41Biika ale cheŋ la, Deevid yaa nyini wuuku po yeseok geŋ a nyini. Wa yaa koori tɛŋ buta a puusi Jonatan. Jonatan ale Deevid a gbaari chaab ale a kum, alege Deevid ale jam kum yega.

42Jonatan yaa weeni Deevid ayen, <<Cheŋ ale suiyɔgni. Ti puulim kama ale Naawen ayen ti ka doaba. Ti weeni kama ayen, Naawen ale wa chim seerɔ fi ale mi suŋsuŋ, ale ti ŋaaŋbisaŋa po a cheŋ.>> Deevid yaa cheŋ alege ate Jonatan ŋman cheŋ tɛŋka po.

Currently Selected:

1 Samuel 20: BWU

Highlight

Copy

Compare