1 Samuel 19

1Sɔɔl yaa weeni wa biika Jonatan ale wa nuruma meena ayen ba ko Deevid, alege Jonatan jam a yaali Deevid ka nna yegayega. 2Wa yaa kaam Deevid ayen, <<M kowa a gisi ka suik ayen wa ko fu. Saluik kpesi a nya abe fi yaali jigi a suk. 3M le nyini ga za ale m kowa juijui ate fi suk la abe m yaa biisi fi wie ale wa. Dii meena ale boro la m le basi ate fi seba.>>

4Jonatan ale biisi ale wa kowa la wa yaa biisi wa maŋsa nyiini a ta va Deevid jigi. Jonatan yaa weeni ayen, <<Naawa kan nye wa yɔmawa Deevid wari kaasi diila Deevid an nye wari kaasi wa. Wa le nye diila a maari fu ka nna yegayega. 5Deevid a pai wadek nyuvuri a da ate Naawen basi ate Izirali meena nya nak dekka. Fi nya ku kama ate fi sui jam peenti. Ka boa ate fi le nye Deevid kaasi? Wa an kaasi wari ya. Wari karo a magsi wa ko ka.>>

6Sɔɔl yaa wom Jonatan ale biisi diila a yaa puulim ayen, <<Naawen ale vua la nyiŋ, m kan ko Deevid.>>

7Jonatan yaa wi Deevid a weeni wa dii meena ate Sɔɔl a biisi la. Wa yaa ta Deevid a jam Sɔɔl jigi ate Deevid a ŋman bo le Sɔɔl ase piilimka la.

8Kpaliŋ ale ŋman jam yiti ate Deevid nyini ga kpaliŋka ale Filistia demma. Wa jam nak dɛ ba kama ale ko ba yega ate ba gela a chali.

9Dai yeŋ ate Sɔɔl a jam kali wa yenni ate gbaluk a bo wa nisa po ate chichirik biok a yaa nyini Naawen pagrim Nyɔnɔwa jigi a jam jo Sɔɔl. Deevid jam kali ka wa tɛŋ a nak kpanuŋ. 10Sɔɔl yaa nye nyiŋbiiri ayen wa yuk Deevid a maŋ siaka ale gbaluku ale bo wa nisaŋa po la, alege Deevid yɔk ga nakpiak. Sɔɔl gbaluku jam vuri ka siaka alege ate Deevid chali bɛ yok kula.

11Sɔɔl yaa tom nuruba ayen ba ga Deevid yenni a kpesi nya abe ba ko wa saluiku. Alege Deevid powa Michal yaa kaam wa ayen, <<Yɔkku de se fi chali ti vummu nyiŋ. Fi dan kan chali ya, fi le kpi saluik.>> 12Wa yaa basi ate Deevid va tuokparuk a siŋ chali bɛ. 13Deevid powa Michal yaa pai bɔgluk a dueni gaduokku zuk, a pai buuk kɔbta a lik ku nyiŋka a ŋman pai buuku kɔbta mɛ a dueni zukku geŋ.

14Sɔɔl yaa tom nuruba ayen ba ga yik Deevid, ale ge Michal yaa weeni ayen, <<Wa a yuak kama.>>

15Sɔɔl a ŋman tom nuruma ayen ba ŋman ga nya Deevid, a weeni ba ayen, <<Ni pai wa le gaduokku meena a ta jam ate m ko wa.>> 16Nuruma ale ga jo Deevid dɔkku po la, ba yaa nya bɔgluk ale dua gaduokku zuk ate kɔbta lik ku zukku.

17Sɔɔl yaa weeni Michal ayen, <<Ka boa ale soa ate fi paasi mu nna? Fi basi ate m dachiaka a nyini ayen wa chali bɛ.>> Michal yaa tulisi Sɔɔl, <<Deevid weeni mi kama ayen m dan kan maa wa ate wa chali bɛ ya, wa le ko mu.>>

18Deevid ale nyini Sɔɔl jigi a chali bɛ la, wa yaa cheŋ Samuel jigi Arama tɛŋka a ga weeni wa dii meena ate Sɔɔl a nye wa la. Deevid ale Samuel yaa cheŋ Naiot a bo dula. 19Sɔɔl yaa wom ayen Deevid a bo ka Naiot ale bo Arama tɛŋka la. 20Wa yaa tom nuruba ayen ba ga yik wa. Alege ba yaa ga zik biisiteerɔba ale ba tigsi za a mooli wie, ate Samuel a dɛ ba niŋ. Naawen chiika yaa jo Sɔɔl nuruma ate ba maari a mooli wieŋa. 21Sɔɔl ale wom dii meena ale nye la, wa yaa tom nuruba yega, alege ba mɛ a maa mooli. Wa ŋman tom nuruba nye buta, alege ba mɛ mooli. 22Sɔɔl dek yaa cheŋ Arama, a paari vili kpienni ale bo Seku la a yaa bek ayen, <<Samuel ale Deevid a bo ka bɛ?>> Ba yaa weeni ayen, <<Ba bo ka Naiot ale bo Arama la.>>

23Sɔɔl ale cheŋ Naiot ale bo Arama la, Wen Chiika yaa jo wa. Ate wa yaa mooli a cheŋ a ga paari Naiot ale bo Arama la. 24Wa yaa yeeri wa gattaŋa alege za Samuel niŋ a mooli. Wa duak ka dila yokku ale kantueŋka meena. Dila ale soa ate nuruba a bek ayen, <<Sɔɔl mɛ maa ka biisiteerɔma po wanyi yaa?>>

Currently Selected:

1 Samuel 19: BWU

Highlight

Copy

Compare