1 Samuel 18
18
1Deevid ale biisi ale Sɔɔl a nueri la, Jonatan a jam mariŋ Deevid ka nna yegayega. Wa jam a yaali wa ase ka wadek la. 2Sɔɔl jam basi ate Deevid bo ale wa kama a nyini dai dila danni a kan siak ate wa a ga wa kowa yenni. 3Sɔɔl biika Jonatan ale Deevid yaa jam nye nɔiyeŋ dii nyiŋla wa jam a yaali Deevid ase ka wadek la. 4Wa jam yeeri wa garukku kama a te Deevid, ale wa kpaliŋ kɔlimaŋa ale wa gebika ale wa tommu ale wa chiak gbanni.
5Sɔɔl a jam tom Deevid kama ate wa ga nye kpaliŋ yonsa. Deevid jam nak kama dɛ. Ate Sɔɔl jam basi ate Deevid a chim tugurik tɔŋdɔma kpagi. Ku jam peenti Sɔɔl kpaŋŋa ale nuruma meena sui kama.
6Deevid ale ko Filistia denɔwa la, wa le nuruma meena ale jam ŋman kuli la, nipooma yaa nyini tɛŋsaŋa meena ale bo Izirali po la a nyini a tu naab Sɔɔl. Ba jam a yi ka yiila ale suipeentik a gɔk ale a yegsi ŋanta ale a nak kpanta. 7Ba le a nak la, ba yaa yi yiila ayen, Sɔɔl ko ka dachaasa tusa, alege Deevid a ko tusa piisa.
8Nipooma yiini a yaa daani Sɔɔl, ate wa sui a puuri. Wa yaa poli, <<Nipooma a weeni ayen Deevid a ko tusa piisa, alege a weeni ayen mi ko ka tusidi nyiini. Dii yaa le tali la ale wa tuesi naamu.>> 9A zaani dila Sɔɔl yaa jam dueni ka num tɛŋ a nya Deevid, dii nyiŋla wa jam a dɛ ka nyuri.
10Vari ale veenti la chiik biok yaa nyini Wen jigi a jam jo Sɔɔl, ate wa a porisi wie yenni po. Ate Deevid a jam pai kpanuŋ a nak ase wa nyiem le poom a nye diila. Sɔɔl abe jam ta ka gbaluk nisa po. 11Wa yaa yuk gbaluku ale poli ayen, <<M le yuk wa a maŋ ka siaka.>> Alege Deevid a nyini du nyini buye meena.
12Naawen dii ale ta pagrim la a jam bo le Deevid kama alege basi Sɔɔl. Dila nyiŋ Sɔɔl yaa jam a chali Deevid ka yɔgsum. 13Wa yaa basi ate Deevid a chim tugurik tɔŋdɔba tusidi kpagi, ate wa ta ba a cheŋ kpaliŋ. 14Wa jam nya nakdeka kama ale dii meena dii nyiŋla Naawen a jam bo le wa kama. 15Sɔɔl ale nya ale Deevid kasim a nya nakdeka la, wa yaa kasim a chali Deevid yɔgsum nna yegayega. 16Alege Izirali ale Juda nuruma meena a jam a yaali Deevid ka nna yegayega dii nyiŋla wa jam a dɛ ba niŋ kama nalimnyiini kpaliŋ po.
17Sɔɔl yaa weeni Deevid ayen, <<M lie kpagni Merab ale nna. M le basi ate fi faari wa. Mi a yaali ka fi tin tua abe fi a kpaliŋ Naawen kpaliŋsaŋa.>> Sɔɔl a jam poli kama ayen, <<Mi kan ko Deevid ka Filistia demma ale ba ko wa.>>
18Alege Deevid yaa tulisi ayen, <<Mi ka wana? Mi ale nyini dɔkdem baai po la an magsi mi chim naawa chicham biiga.>> 19Ku le jam paari diipo ate Sɔɔl liewa Merab a magsi wa yali Deevid la, Sɔɔl a gɔnti pai wa te Adriel ale nyini Meyola la.
20Sɔɔl liewa wa choawa, Michal a jam yaali Deevid kama. Ba le weeni Sɔɔl la, wa sui jam peenti kama. 21Sɔɔl yaa poli ayen, <<M le basi ate wa yali Deevid. Ate wa yaa chim wa baruk ate Filistia, demma a baga a ko wa.>> Sɔɔl yaa ŋman weeni Deevid nye buye ayen, <<Fi baga a chim m chicham biik kama.>>
22Sɔɔl yaa weeni wa tomteerɔwa ayen, <<Ni weeni Deevid dek wa nyiini ayen, <Nya, naawa sui a peenti kama ale fi ate wa tomteerɔma meena a yaali fu. Dila la yɔgyɔgla de chim wa chicham biik.> >>
23Ba weeni dila meena a te Deevid. Alege Deevid yaa weeni ayen, <<Nama a poli ayen ku ka wa fiik ate fi chim naawa chicham biiga? Mi ka jajak nuruba abe zɛ mu piisi ya.>>
24Sɔɔl tomteerɔma le weeni wa dii ate Deevid a weeni la, 25Sɔɔl yaa tulisi ayen, <<Ni weeni Deevid ayen, <Naawa a kan yaali jaab nipok fiaka nyiŋ a gaam fi ale ko Filistia demma kook a gebi ba yua gbantaŋa ate ku chim tutuna a te wa dachaasaŋa la.> >> Sɔɔl zɔŋŋa jam le Filistia demma a ko Deevid.
26Tomteerɔma ale weeni Deevid wieŋa de la, wa sui yaa peenti ayen wa chim naawa chichambiik. Abe daaŋa a paari la, 27Deevid ale wa nuruma yaa nyini a ga ko Filistia demma kobsiye. A yaa ta ba yua gbantaŋa meena a jam te naawa ayen wa chim naawa chicham biik. Sɔɔl yaa pai wa liewa Michal a yalisi wa.
28Sɔɔl ale miŋ ayen Naawen dii ale ta pagrim la a bo ale Deevid la ate wa liewa Michal mɛ a yaali wa la, 29yɔgsum yaa ŋmasi ta Sɔɔl nna yegayega ate Deevid yaa kasim chim wa dachiak a cheŋ.
30Filistia tugurik tɔŋdɔba kpaŋŋa a jam kasim a cheŋ kpaliŋka ka dila. Ba bɛ le a cheŋ diila Deevid a nya nakdeka mɛ ka dila a gaam Sɔɔl tugurik tɔŋdɔba kpaŋŋa. Deevid yuenni a yaa jam a yiti ate waai meena a sebi wa.
Currently Selected:
1 Samuel 18: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
