1 Samuel 17

1Filistia demma yaa tigsi ba tugurik tɔŋdɔma a magsi kpaliŋ. Ba jam tu chaab ka Sokoyo ale bo Juda po la. A yaa nye goomu jigini Efes Dammim, Sokoyo ale Azeka suŋsuŋ po. 2Sɔɔl ale Izirali demma a jam tu ka Elaya Viaka a nye ba goomu jigini dula ayen ba kpaliŋ Filistia demma. 3Filistia demma a jam soa ka guuk kunyi, Izirali demma mɛ a soa kunyi ate viaka yaa bo suŋsuŋ.

4Filistia demma a jam ta ka ganduok, wa yuei jam le Goliat a nyini Gat. Wa yaa nyini Filistia demma tuka jigini a nyini. Wa jam wɔŋa ase ka anamagib pi ale buta la. 5Wa jam vuk ka kutuk mɔnuŋ zukchin, ale kutuk mɔnuŋ garuk ate ku dobra ase ligbie dobrim tusa ŋanu (5,000). 6Wa jam jo ka kuta ŋanta lik wa naŋsaŋa ale ta kuta gbaluk wa ŋaaŋ. 7Wa gbaluku dueku a jam zuak ase ka chib la, ate gbaluku kutukku nɔnni a dobra ase ligbie dobrim kobsiyuebi la. Waai ale jam yik jaab buuni ate wa pai a chɔgsi ŋanta la jam bo ka wa niŋ.

8Goliat yaa nyini zaani a kaari weeni Izirali demma, <<Ka boa ate ni tu ayen ni nye kpaliŋŋa? Mi ka Filistia denɔ nama Sɔɔl tomteerɔba? Ni lueri waai ate wa jam kpaliŋ ale mi. 9Wa dan baga a ko mi tama ale chim ni yɔm. Mi abe dan baga a ko wa nama chim tama tomteerɔba.>> 10Wa yaa weeni ayen, <<Jinla mi za a nak nanpaga ale Izirali demma, ni lueri waai ate ti kpaliŋ chaab.>> 11Sɔɔl ale Izirali demma ale wom Filistia denɔwa biika la yɔgsum yaa yik ba nna yegayega.

12Deevid jam ka Jese biik Jese jam ka Efrat denɔ a nyini Betiliyem ale bo Juda po la. Jese a jam ta ka bisa naaniŋ. Sɔɔl daaŋa po Jese a jam kpaŋ kama yɔgla. 13Wa bi kpaŋŋa batawa jam va Sɔɔl kama a cheŋ kpaliŋka. Wa bikpagni yuei jam le Eliab, waai ale pai saŋ la yuei jam le Abinadab, nwala yuei jam le Sammaya. 14Deevid jam le baaŋka. Jese bi kpaga ŋatawa a jam va Sɔɔl kama cheŋ 15alege Deevid a nyini Sɔɔl jigi a cheŋ Betiliyem a kasim a nya wa kowa piisaŋa ale a ŋmani.

16Daa pisinaansi meena saluik ale junɔi Goliat a nyiem nyini kama a zaani a nak nanpaga ale Izirali tugurik tɔŋdɔma.

17Jese yaa weeni wa biika Deevid ayen, <<Pa ŋandiintaŋa de boorik genni ale borobotta pi a kpabi ga te fi suataŋa kpaliŋka jigini. 18Pa maasa piwa de a ga te tugurik tɔŋdɔma kpagni ale fi suataŋa abe fi nya ase ba ka se abe fi jam weeni mu. 19Fi suataŋa a bo ale ka Sɔɔl ale tugurik tɔŋdɔma Elaya Viaka po ayen ba kpaliŋ ale Filistia demma.>>

20Saluik yokyok Deevid yaa basi piisaŋa a te naapeerik ka choa. Wa yaa ta ŋandiintaŋa a cheŋ ase wa kowa ale weeni diila. Deevid ale paari du la ale tugurik tɔŋdɔma a nyini kama a cheŋ ba zaanaŋa jigi ale a kaari kpaliŋ kaarik. 21Izirali demma ale Filistia demma a yik ba tugurik tɔŋdɔma zaani a tuk chaab. 22Deevid yaa basi ŋandiintaŋa ate nuru waai ale a nya ba ŋandiintaŋa zuk la ale cheŋ kpaliŋka jigini ayen wa puusi wa suataŋa. 23Wa le diem boro a biisi ale ba la, Goliat Filistia demma ganduoku ale nyini Gat la, a yaa nyini za a na a le Izirali demma ase wa le poom a nye diila ate Deevid wom. 24Izirali demma ale nya Goliat la, yɔgsum yik ba nna yegayega ate ba chali.

25Izirali demma a yaa weeni chaab ayen, <<Nya nuruwa de ale kasim a nyini diila? Wa nyini kama a nak nanpaga ale Izirali. Waai ale a ko nuruwa de la naawa ale basi ate wa jigsi. Naawa ale pai wa liewa te wa mɛ abe wa basi ate wa dɔkdemma meena a kaa tuni lampoo Izirali po.>>

26Deevid yaa bek nuru baai ale za moata wala ayen, <<Ba le nye ka boa a te nuru waai ale baga a ko Filistia denɔwa de la a yeeri chivieŋa de Izirali jigiya? Filistia denɔwa de waai ale kaa a te Naawen la ate a poli wa baga a nak nanpaga ale Naawen dii ale vua la tugurik tɔŋdɔma kama yaa?>>

27Izirali demma yaa weeni Deevid naawa le wa nye dii a te waai ale a ko Goliat la.

28Deevid suok kpagni Eliab ale wom Deevid ale a biisi ale tugurik tɔŋdɔma la, wa sui yaa puuri ale Deevid, wa yaa bek Deevid, <<Ka boan ti fi jam dela? Ka wana ale a nya piisaŋa magadekka zuwa gɔnni po? Mi seba fi le ta kanjanta la kama. Mi seba fi nyeka tuemu kama. Fi jam kama ayen fi nya kpaliŋka.>>

29Deevid yaa bek ayen, <<M nye ka boan wari kaasi? M kan ŋman biisi?>> 30Wa le cheen nuru mbala jigi la, wa ŋman bek ayen ba le nye ka boa a te waai ale a ko nuruwa de la? Ate ba tulisi wa naawa le wa nye diila. 31Deevid ale jam weeni diila, ba jam weeni Sɔɔl kama. Ate Sɔɔl tom wi wa.

32Deevid yaa weeni Sɔɔl, <<Kan te waai jɔgi nyiŋbiiri. Mi, fi tomteerɔwa ale cheŋ a ga kpaliŋ ale Filistia denɔwa de.>>

33Sɔɔl yaa weeni ayen, <<Fi an baga a ga a nye kpaliŋ ale Filistia denɔwa de. Fi ka biik. Goliat abe nye kpaliŋ a nyini ka wa biik po.>>

34Alege Deevid a weeni Sɔɔl ayen, <<Mi fi tomteerɔwa a nya ka m kowa piisa zuk. Ase gbeŋli yaase piuk a dan jam yik piisaŋa kunyi, 35Mi nyiem vi di kama a vari posuku a basi. Gbeŋli yaase piuk a dan siti mi, mi nyiem yik ka di zukku a nak ko. 36Mi waai ale ka fi tomteerɔ la, a ko gbeŋli ale piuk kama. Filistia denɔwa de bɔgluk kaarika m le ko wa ase ka gbeŋli yaase piuku la, dii nyiŋla wa biisi a kaasi Naawen dii ale vua la tugurik tɔŋdɔma kama. 37Naawen ale vari mi gbeŋli ale piuku jigi a basi la ale vari mi Filistia denɔwa de jigi a basi.>> Sɔɔl yaa weeni Deevid, <<Cheŋ ale Naawen ale bo ale fu.>>

38Sɔɔl yaa pai wadek kɔlimaŋa a jo Deevid. Wa jam pai wa kuta zuk chinni a vuk wa ale pai kpaliŋ kɔlimaŋa a jo wa. 39Deevid yaa pai Sɔɔl gebika a cheŋ gilim alege wa an pai ŋan baai ate Sɔɔl a pai jo wa la a nye wari nya ya. Wa yaa weeni Sɔɔl ayen, <<Mi an baga a ta ba a cheŋ, dii nyiŋla mi an pai ba nye wari nya ya.>> Deevid yaa yeeri ŋantaŋa meena. 40Deevid yaa pai wa doani a nyo nisa po ale pisi tana ŋanu beli naŋka po. A yaa pai nyo wa naapeerik foruku po ale pai wa visiŋka. Wa yaa cheŋ ayen wa tu chaab ale ganduoku.

41Filistia denɔwa yaa cheŋ a ga tu wa. Nuru waai ale jam yik wa jakasimu la a dɛ ka wa niŋ. 42Goliat ale nya Deevid ale wa ka biik ale nala la, wa deri kisi wa. 43Wa yaa weeni Deevid ayen, <<Fi pai mi a chim ka biaga ate fi cheen mi jigi ale doari ya.>> Wa yaa wi ba bɔgtaŋa wie a ka a te Deevid. 44Wa yaa weeni Deevid ayen, <<Jam dela. M le ko fu a te wenzuk nuinsa ale duŋsa.>>

45Alege Deevid yaa weeni wa ayen, <<Fi cheen ale ka gebik ale gbatta tiye. Mi bɛ cheena ale ka Naawen Dii Ale A Dɛ Tugurik Tɔŋdɔma Niŋ La, Izirali tugurik tɔŋdɔma Wenni yuenni nyiŋ. Fi biisi kaasi Wen dila kama. 46Jinla Naawen dii ale ta pagrim la ale pai fu nyo m nisa po ate m ko fu a gebi fi zukku. Jinla m le ko Filistia tugurik tɔŋdɔma ate nuinsa ale duŋsa a de ba. Ate tɛŋka meena seba ayen Wen a bo ale Izirali. 47Waai meena ale tigsi dela la ale seba ayen Naawen dii ale ta pagrim la a kan pai daa gebisa ale gbatta a vari wa nuruba a basi. Kpaliŋka ka Naawen ale soa, wa bɛ le pai fu te mu.>>

48Goliat ale torisi moata wa la, Deevid yaa chali nwuli a tu wa. 49Wa yaa yeeri tain wa foruku po, a pai nyo wa visiŋka po a nak. Tintanni yaa ga yik dinni a vuri jo, ate Goliat a lo nyue nyiŋ.

50Deevid a pai ka visiŋ ale tain a nak dɛ Goliat. Wa jam nak kama a ko wa. Wa jam ka gebik wa nisa po.

51Deevid yaa chali ga zaani wa tɛŋ. Wa yaa yeeri Goliat dek gebik ka fook po a gebi wa zukku. Filistia demma ale nya ayen ba ganduok a kpi la, ba deri cheen pai chala choa. 52Izirali ale Juda nuruma yaa kaari zik zik a vi Filistia demma a ga paari viaka ale Ekron tɛŋka nɔi. Filistia demma a jam kpi dua ka nna bilabila Saaraim suiku po a ga paari Gat ale Ekron. 53Izirali demma yaa vi ba pilim ŋmani Filistia demma tuka jigini a pai ba ŋantaŋa. 54Deevid yaa pai Goliat zukku a ta cheŋ Jerusalem. Wa jam pai Goliat kpaliŋ kɔlimaŋa a dueni ka wadek viuku po.

55Sɔɔl ale nya Deevid ale wa cheŋ ayen wa tu Goliat la, wa yaa bek Abner, Tugurik tɔŋdɔma kpagni ayen, <<Abner biika nna ko ale wana?>> Abner yaa tulisi ayen, <<Mi zɛ.>>

56Naawa yaa weeni ayen, <<Bek wom ase ka wana biik.>>

57Deevid ale ko Goliat a ŋmani la, Abner yaa ta wa jam Sɔɔl jigi. Deevid jam diem yik ka Goliat zukku tara.

58Sɔɔl yaa bek wa ayen, <<Biiga, fi ko ale wana?>> Deevid yaa tulisi ayen, <<Mi ka fi tomteerɔwa Jese ate wa nyini Betiliyem la biik.>>

Currently Selected:

1 Samuel 17: BWU

Highlight

Copy

Compare