1 Samuel 16

1Naawen yaa weeni Samuel ayen, <<Sɔɔl wie ale daani fi a paari ka dimpo? Mi zɛri wa kama, wa ŋman daa Izirali naaba. Pa kpaam a sueri nyiini a cheŋ. Mi a tom fu ka Jese jigi Betiliyem, dii nyiŋla mi lueri ka wa nidoabilisaŋa wanyi ayen wa chim naab.>>

2Alege Samuel yaa weeni ayen, <<M dan cheŋ Sɔɔl ale wom a ko mu.>> Naawen yaa weeni ayen, <<Yaali naab paalik a ta cheŋ. Weeni ayen, <M jam kama ayen m nye kaabka a te Naawen.> 3Wi Jese ate wa jam kaabka jigini. Ate m yaa weeni dii ate fi le nye la. Waai ate mi a dak la, kpiiri kpaamu basi wa zukku po a lueri wa.>>

4Samuel yaa nye dii ate Naawen weeni la. Wa le ga paari Betiliyem la nisɔmma nyiŋsa deri a gɔk. Ba yaa tu wa a bek wa ayen, <<Fidek ti fi cheena?>>

5Samuel yaa weeni ayen, <<Ka m dek. M jam kama ayen m nye kaabka a te Naawen. Ni be gomsi nidek magsi a jam.>> Ate wa yaa poori Jese ale wa bisaŋa a yaa wi ba ayen ba jam kaabka.

6Ba le jam la, Samuel yaa nya Jese biika Eliab a poli ayen Naawen a lueri ka waai ale za nna.

7Alege Naawen yaa weeni Samuel, <<Kan nya Eliab ale ka diila yaase wa le wɔŋŋa la, mi an lueri wa. Naawen kan nya wie ase nuruba ale a nya ŋa diila. Nuruba a nya ka peelim alege Naawen a nya suinummu po.>>

8Jese yaa wi Abinadab a weeni wa ayen wa taam ate Samuel nya wa. Alege Samuel weeni ayen, <<Naawen an lueri nuruwa de mɛ.>> 9Jese a ŋman basi ate Sammaya a taam. Alege Samuel a weeni ayen, <<Aaya, Naawen an lueri wa de.>> 10Jese yaa basi ate wa bisaŋa bayopɔi a taam. Alege Samuel a weeni ayen, <<Naawen an lueri ba de.>> 11Samuel yaa bek Jese, <<Ka fi bisaŋa meena ale nna.>> Jese yaa tulisi ayen, <<M ta bi baaŋ. Wa ta ka piisa nyini a nya.>> Samuel yaa weeni ayen, <<Tom wi wa ate wa jam ti kan kali ka wa nin jam.>>

12Jese yaa tom ate ba ta wa bi baaŋka a jam. Wa jam ka bi kaai ale nala a chim duerɔ. Naawen yaa weeni Samuel ayen, <<Ga bobi wa dii nyiŋla wala ate mi a lueri.>>

13Samuel yaa pai kpaamu ale nyiini a kpiiri basi Jese bi baaŋka zuk po a lueri wa wa suataŋa niŋ. A zaani da dila danni Naawen chiika jam sueri Deevid ale pagrim. Samuel yaa basi dula ale ŋman cheŋ Arama.

14Alege Naawen Chiika yaa basi Sɔɔl ate chiik biok a nyini Naawen jigi a jam namsi Sɔɔl nna yegayega.

15Sɔɔl tomteerɔma yaa weeni wa ayen, <<Nya, Naawen basi ate ka chiik biok a daani fu nna yegayega. 16Te ti suik ate ti yaali nuru waai ale baga a nak kpanuŋ. Ate Naawen a dan basi ate chiik biok jam a daani fu, abe wa a nak ate ku zunchoŋ fi jigi.>>

17Sɔɔl yaa weeni wa tomteerɔma ayen, <<Ni gisi ta waai ale baga a nak nalimnyiini a jam te mu.>>

18Tomteerɔma wanyi yaa weeni ayen, <<Wa nya Betiliyem denɔwa Jese. Wala nidoabinni ale a nak kpanuŋ. Wa ka waai ale ka tugurik tɔŋdɔ tuak. Wa biik nala ale chim nuru maŋ ate Naawen mɛ bo ale wa.>>

19Sɔɔl yaa tom wa tomteerɔma a weeni Jese ayen, <<Te ti fi biika Deevid waai ale a nya piisaŋa zuk la a jam.>> 20Jese yaa yaali boroborok ale bunlɔk ale daam ale buuk a vi boniŋ zuk a tom Deevid ate wa cheŋ Sɔɔl jigi.

21Deevid ale cheŋ Sɔɔl jigi la, wa yaa tom a te wa. Sɔɔl jam a yaali Deevid ka nna yegayega a yaa basi ate wa a yik wa kpaliŋ kɔlimaŋa. 22Sɔɔl yaa tom weeni Jese ayen, <<Basi ate Deevid a bo ale mu a tom a te mu diila mi a yaali wa ka nna yegayega.>>

23Chiik bioku a dan nyini Naawen jigi jam a daani Sɔɔl, Deevid nyiem pai ka wa kpanuŋku a nak ate chiik bioku a basi Sɔɔl ate ku zunchoŋ wa jigi.

Currently Selected:

1 Samuel 16: BWU

Highlight

Copy

Compare