1 Samuel 15

1Samuel yaa weeni Sɔɔl ayen, <<Naawen ale tom mi ayen m bobi fi naab ate fi a nya Izirali zuk. Yɔgyɔgla de wom wa le ta dii ayen wa weeni fu la. 2Naawen dii ale ta pagrim meena la ale weeni diila ale nna. <Izirali demma ale nyini Ejipiti nyini la, Amalek demma a jam kasi ba kama ayen ba kan cheŋ Keenan. Dila nyiŋ m le namsi ba. 3Ni cheŋ a ga siti Amalek demma a kaasi jaab meena ate ba ta la. Ni kan basi jaaboa ate wa boro. Ni ko nidoaba ale nipooba, bimbaansa ale buluata, niiga ale piisa, laalaakomiba ale bonsa.> >>

4Sɔɔl yaa wi wa tugurik tɔŋdɔma ate ba tu Telaim. Tugurik tɔŋdɔma a jam ka tusa kobsiye (200,000) ale nidoaba tusa pi (10,000) a nyini Juda. 5Sɔɔl yaa cheŋ Amalek tɛŋka a ga gu dua viaka po. 6Wa yaa weeni Ken demma ayen, <<Ni basi Amalek demma ate ti kan maa ko ni ale ba, dii nyiŋla ni jam sak jiirim ale Izirali demma kama diipo ate ba jam nyini Ejipiti a nyini la.>> Ken demma yaa yiti dula alege Amalek demma.

7Sɔɔl yaa nak dɛ Amalek demma. Wa jam nak ba kama nyini Yavila a ga paari Sur a moata Ejipiti. 8Wa jam yik Amalek naawa Agag kama alege an ko wa. Wa jam ko Agag nuruma ka meena ale gebik. 9Sɔɔl ale wa tugurik tɔŋdɔma an jam ko Agag, ale pai ŋan naliŋsaŋa ale naa ŋaai ale biigi ale piisa. Duŋ naliŋsaŋa meena ba an jam ko ya alege duŋ gbaaliŋsaŋa buuni ba jam ko kama.

10Naawen yaa biisi ale Samuel ayen, 11<<Mi a ŋma ka m dek m le basi ate Sɔɔl a chim naab la, dii nyiŋla wa basi m vaka kama alege an zuli mu.>> Ate ku yaa daani Samuel ate wa kum yok meena a te Naawen.

12Vari ale veenti la saluik Samuel yaa yiti a cheŋ ayen wa tu Sɔɔl. Alege nuruma yaa weeni Samuel ayen, <<Sɔɔl a cheŋ ka Karmel kauk kuui ate wa se wadek jaab ayen wa nya yuei la. Yɔgyɔgla de wa cheŋ ka Gilgal.>> 13Samuel ale jam Sɔɔl jigi la, Sɔɔl yaa weeni ayen, <<Naawen niak fu. Mi va Naawen nɔi kama a nye wa yaalika.>>

14Alege Samuel yaa weeni ayen, <<Ka boa abe le soa ate mi a wom niiga ale piisa kumsa?>>

15Sɔɔl yaa tulisi ayen, <<Tugurik tɔŋdɔma ale tuesi Amalek demma jigi. Niiga ale piisa ŋaai ale nala la ti ta jam ayen ti nye kaabka a te fi Naawen fi Wenni alege duŋ yonsaŋa ti ko kama.>>

16Samuel yaa weeni Sɔɔl ayen, <<Limisi ate m weeni fu Naawen ale weeni mi dii deemwa yokku la.>> Sɔɔl yaa weeni ayen, <<Weeni mu.>>

17Samuel weeni ayen, <<Fi an jam pai fidek a chim nuru, alege yɔgyɔgla de fi chim Izirali buuni niŋdeerɔ. Naawen ale lueri fu ate fi chim naab a nya Izirali zuk. 18A yaa tom fu wari nyiŋ. Wa weeni ayen, <Cheŋ a ga ko Amalek demma#15:18 Teerika 25:17-19 ŋanbaataŋa. Nye kpaliŋ ale ba a ko ba meena.> 19Ka boa ale soa ate fi an va Naawen nɔi yaa? Ka boa ale soa ate fi wuuri lueri ŋanmaŋsaŋa? Ka boa ate fi nye dii ate Naawen ayen ku an nala la?>>

20Sɔɔl yaa weeni ayen, <<Alege mi va Naawen nɔi kama? Mi nye Naawen ale weeni ayen mi nye diila kama. Mi ko Amalek demma ka meena ale ta ba naawa Agag jam. 21Tugurik tɔŋdɔma a lueri ka naa maŋsaŋa ale pai maŋsaŋa ayen ti nye kaabka a te Naawen fi Wenni Gilgal tɛŋa po.>> 22Alege Samuel yaa tulisi wa ayen, Ka boa ale a peenti Naawen sui ya, kaabka yaa wa nɔi vaka? Wa nɔi vaka a zunchoŋ fi le pai pada naliŋsa a kaab te wa. 23Kan wom Naawen nɔi a bie ase ka sampoporinni la. Kanjanta a bie ase ka bɔgta kaabka la. Wa zɛri fu kama ase naab la, fi le zɛri wa wanni la nyiŋ.

24Sɔɔl yaa weeni Samuel ayen, <<Mi tom kaasi kama. Mi an va Naawen nɔi ale fi le weeni diila. Mi chali ka nuruma yɔgsum a nye ba le weeni diila. 25Yɔgyɔgla de, mi a saalim fu, vɔŋ a te mu. Va mu a jam dɛ ate ti puusi Naawen.>> 26Alege Samuel a weeni Sɔɔl, <<Mi kan va fu. Fi zɛri Naawen nɔi kama ate wa yaa zɛri fu ase Izirali naab la.

27Samuel ale cheen wa cheŋ la, Sɔɔl yaa yik wa garukku tɛŋka ate ku cheeri. 28Samuel yaa weeni wa ayen, <<Naawen a cheeri Izirali naamu fi jigi kama jinla a pai te nuru yoŋ waai ale zunchoŋ fu. 29Waai a Ale Ka Izirali Zulaŋa La a kan velimu yaase wa tagri wa popola. Wa daa nuru biiga dila nyiŋ wa kan tagri wa popolaŋa.>>

30Sɔɔl yaa weeni ayen, <<M tom kaasi kama. Alege zuli mu ŋankpagsaŋa ale Izirali demma niŋ. Va mu jam ate m puusi Naawen fi Wenni,>> 31Samuel yaa va Sɔɔl a cheŋ, ate Sɔɔl a puusi Naawen.

32Samuel yaa ŋman weeni ayen, <<Ta Amalek demma naawa Agag jam te mu.>> Alege Agag yaa poli ayen wa nyini kum po nyini kama. 33Samuel yaa weeni Agag ayen, Fi gebika basi kama ate maba a jɔg ba bisa. Yɔgyɔgla de fi mawa a kan ta bisa. Samuel yaa che Agag munamuna Naawen niŋ Gilgal tɛŋka po.

34Samuel yaa basi dula ale cheŋ Arama alege ate Sɔɔl mɛ a kuli Gibea. 35Samuel an ŋman jam nya Sɔɔl wa boka po meena alege Sɔɔl wie jam a daani wa kama. Naawen jam a ŋma ka wadek wa le basi ate Sɔɔl a chim Izirali naab la.

Currently Selected:

1 Samuel 15: BWU

Highlight

Copy

Compare