1 Samuel 14

1Dai yeŋ Jonatan yaa weeni waai ale a yik wa kpaliŋ kɔlimaŋa la ayen, <<Te ti gaam taam Filistia tugurik tɔŋdɔma ale za juijui limisi a nya la.>> Alege wa an jam weeni wa kowa.

2Dila po, Sɔɔl jam bo ka gaab tɛŋ Migron ale bo Gibea nakpiak geŋ la. Tugurik tɔŋdɔba kobsiyuebi ale jam bo ale wa. 3Ba po jam ka Ayija waai ale jam jo garuk geli la.#14:3 Nyinika 28:28-30; Teerika 33:8 Wa jam ka Ichabod suoku Ayitub nidoabili. Ayitub jam ka Fineyas nidoabili. Fineyas be jam ka Eli waai le jam ka Naawen kaabteerɔ a bo Siilo la nidoabili. Jonatan tɔga nuru jam zɛ diipo ate wa basi Izirali demma tuka jigini.

4Vuuku ale va guutaŋa po a taam ate Jonatan a jam a poli ayen wa va paari Filistia tugurik tɔŋdɔma ale za a limisi a nya la a ta ka pina ŋaye nakpaasaŋa, kunyi ba a wi ayen ka Bozez m kula ba a wi ayen Sene. 5Piuŋku kunyi a jam tuk ka wiiluk geŋ a tuak Mikmas. M kula mɛ a tuk yeseok geŋ a tuak Geba.

6Jonatan yaa weeni waai ale a yik wa kpaliŋ kɔlimaŋa la ayen, <<Jam ti ti cheŋ Filistia tugurik tɔŋdɔma baai ale kaa va Naawen la jigini. Da dii dai Naawen ale maari ate ti nak dɛ ba. Ti piisi yoo ti an piisi yoo jaab karo a kasi Naawen ate ti kan nak a dɛ.>>

7Waai ale a yik Jonatan kpaliŋ kɔlimaŋa la a weeni ayen dɛ niŋ, <<Fi ale a yaali ayen fi nye diila, m siak te fu ka meena.>>

8Jonatan yaa weeni ayen, <<Mi ale a poli diila ale nna. Ti le basi ate Filistia tugurik tɔŋdɔma a nya ti ase ti le a jueli guuku. 9Ba dan weeni ti ayen, <Ti limisi ate ba jam ti jigi,> ti le zaani kauk kula abe ti kan jueli cheŋ ba jigi ya. 10Alege ba dan weeni ti ayen ti jueli a jam ba jigi, ku ka wa dii ale a sak ayen Naawen le basi ate ti nak a dɛ ba.>>

11Ba yaa zaani ayen Filistia tugurik tɔŋdɔma a baga a nya ba. Filistia tugurik tɔŋdɔma yaa weeni ayen, <<Nya! Izirali demma ale la kuug nyini vie ŋaai po ate ba suk la a nyini.>> 12Filistia tugurik tɔŋdɔma yaa zaani ba tuka jigini a kaari a weeni Jonatan ale wa maarɔwa ayen, <<Ni jam dela ate ti sak ni yam.>> Jonatan yaa weeni wa maarɔwa ayen, <<Va mu jueli. Naawen ale maari tama Izirali demma ate ti nak ba dɛ.>>

13Jonatan yaa kuug jueli ŋmazukku ate wa maarɔwa mɛ a vi. Jonatan a che ba ale wa gebi kpieŋka a lɔnsi ate wa maarɔwa a vi a ko ba. 14Piilim sitika Jonatan ale waai ale a yik wa kpaliŋ kɔlimaŋa la, a ko ka nuruba pisiye yinki geli peelim po.

15Ate Filistia tugurik tɔŋdɔma meena ale tigsi bo juijui la ale baai ale diem a limisi a nya la jigini la ale baai ale cheŋ tɛŋsaŋa a vari la yɔgsum yik ba. Tɛŋka a choa ate ba nyiŋsa a gɔk. Naawen dek ale jam basi ate yɔgsum a yik ba.

16Sɔɔl ale wa tugurik tɔŋdɔma ale diem jam bo Gibea ale bo Benjamin po la, wa tugurik tɔŋdɔba baai ale a limisi la yaa nya Filistia tugurik tɔŋdɔma ale ba a chali a waaŋ jigi meena. 17Sɔɔl yaa weeni tugurik tɔŋdɔba baai ale bo dula ale wa la ayen, <<Ni tigsi tugurik tɔŋdɔma a kpesi waai ale kan bo ti po la.>> Ba yaa nya ayen Jonatan ale wa maarɔwa a ka ba po.

18Sɔɔl a jam weeni Ayija ayen, <<Ta Wen nɔiyeŋka dakanni a jam.>> Dila po di jam bo ale ka Izirali demma. 19Sɔɔl ale a biisi ale kaabteerɔwa Ayija la, nuemka Filistia demma po kasim a jueli. Sɔɔl yaa weeni wa ayen, <<Basi ale suik karo yɔgyɔgla ate fi bek a seba Naawen yaalika.>>

20Sɔɔl ale wa nuruma yaa tigsi chaab a siti Filistia demma. Ba le ga paari kpaliŋka jigini la, ba yaa nya ayen Filistia demma popola tulim kama ate ba a ko chaab ale ba gebisaŋa. 21Izirali dem baai nyiem ale gum Filistia tugurik tɔŋdɔma po la ale ga nya ku ale ka diila, ba deri gum Izirali demma po a va Sɔɔl ale Jonatan. 22Izirali demma gela ale jam suk bo Ɛfraim ate guutaŋa a gilim la, ba le wom ayen Filistia demma a chali la, ba deri gum kpaliŋka po. 23Ba jam nak Filistia tugurik tɔŋdɔma dɛ kama, ale tusi ba ta gaam Bet Aven a basi. Naawen ale jam vari Izirali demma dii a basi la ale nna.

24Izirali tugurik tɔŋdɔma a jam jiak kama dii nyiŋla Sɔɔl a jam pɛ kama ayen waai a kan dɛ jaaboa se ka wa a nin nak yiak wa dachaasaŋa. Waai a dan zɛri ale dɛ jaab alege ate junɔi a paari kikaasa a va ku nyɔnɔ. Dila nyiŋ tugurik tɔŋdɔma waai an dɛ jaaboa.

25Tugurik tɔŋdɔma meena a jam jo tiisaŋa po ate siita jam bo tɛŋka. 26Ba le ga jo tiisaŋa po la, ba nya siita kama alege ba waai an dɛ ya. Ba jam a chali ka yɔgsum dii nyiŋla Sɔɔl ale pɛ la, wari nin zaan nye ba. 27Alege Jonatan a jam karo diipo ate wa kowa a jam pɛ la, dila nyiŋ wa jam zɛ. Wa le nya siitaŋa la wa yaa pai wa tachekka a lusi ti po. Wa yaa dɛ a nya nyiŋ pagra. 28Alege tugurik tɔŋdɔma wanyi yaa weeni wa ayen, <<Ti an magsi ti dɛ ŋandiinta jinla diila fi kowa a ka kama. Wa ka kama ayen waai ale a dɛ ŋandiinta jinla la kikaasa a va wa. Dila ale soa ate ti jiak a wobsa.>>

29Jonatan ale wom la wa yaa weeni ayen, <<Mi kowa ale nye diila an nala te nuruma, ku le daani ba. Nama kan nya mi ale dɛ siitaŋa maga a zunchoŋ la. 30Ba le pai ŋandiin tii ba dachaasaŋa jigi la ba dan dɛ ka maga ku ti zunchoŋ kama. Ba ti ta pagrim a nak ba dachaasaŋa a ko ba a gaam di.>>

31Dai dila danni ate Izirali demma a nak dɛ Filistia demma a zaani Mikmas a ga paari Aijalon la ba kasim jam jiak ka meena. 32Duŋ sii ate ba jam tuesi Filistia demma jigi kpaliŋka po la, ba jam ko si kama a boani deri a ŋɔbi benaŋa ale ziimu. 33Waai yaa weeni Sɔɔl ayen nuruma ale a ŋɔbi lammu ale ziimu la, ba nye a kaasi Naawen kama. Sɔɔl yaa weeni ayen, <<Wensie ni nye kaasi kama, ni bilim tintain kpieŋ ta jam dela.>> 34Wa yaa weeni ayen, <<Nyiem weeni ba ayen, <Ni ta ni niiŋa ale ni piisaŋa a jam dela a ko a ŋɔbi. Ni ka suik a ŋɔbi lammu ale ziimu. Dila ni nye a kaasi ka Naawen.> >> Ba meena yok kula yaa ta ba niiŋa ale ba piisaŋa jam ko Sɔɔl nimbie po. 35Yok kula Sɔɔl yaa se kuŋkuŋ a te Naawen. Ku piilimka ni la ate Sɔɔl a nye dila.

36Sɔɔl yaa weeni ayen, <<Ni basi ate ti cheŋ a ga ko Filistia demma meena yokku de a ga paari saluik. Ate ti baga a pai ba ŋantaŋa yokku meena.>> Ba yaa tulisi ayen, <<Fi le poli diila a nala kama.>> Alege Wen kaabteerɔwa yaa weeni ayen, <<Basi ate ti dɛ niŋ bek Wen ase ka wa yaalika.>>

37Sɔɔl yaa bek Wen ayen, <<M ga siti Filistia demma? Fi le basi ate tama Izirali demma a nak dɛ?>> Alege Wen an tulisi Sɔɔl.

38Sɔɔl yaa weeni ayen, <<Da dii dai waai ale tom kaasi. Tugurik tɔŋdɔma niŋdeerɔma meena jam dela ate ti nya waai ale tom biemu jinla la. 39Naawen dii ale vari tama Izirali demma a basi la nyiŋ, waai ale tom biemu dɛ la, dan poom ka mi biika Jonatan se wa kpi.>> Alege waai an weeni wari ya.

40Sɔɔl yaa weeni Izirali demma, <<Ni zaani dela mi ale Jonatan mɛ ale zaani dela.>> Nuruma mɛ yaa weeni ayen, <<Fi ale poli diila a nala kama.>>

41Sɔɔl yaa puusi te Naawen, Izirali Wenni ayen, <<Tulisi ti a magsi. Ate ba yaa nak gbaŋ ate Wen dak Sɔɔl ale Jonatan. 42Sɔɔl yaa weeni ayen, ti be nya ase ka mi yaase Jonatan ale kaasi. Ate ba yaa nak gbaŋ ate Wen dak Jonatan.

43Sɔɔl yaa weeni Jonatan ayen, <<Weeni mu fi le nye diila.>> Jonatan yaa weeni Sɔɔl, <<Ka mi tachekka nɔnni ate mi a pai lusi siita po a dɛ maga. M bɛ kpi yɔgyɔgla de dila nyiŋŋa?>>

44Sɔɔl yaa weeni ayen, <<Jonatan fi dan kan kpi dila nyiŋŋa, Wen bɛ nye ale mi chekki.>>

45Alege tugurik tɔŋdɔma yaa weeni Sɔɔl ayen, <<Jonatan magsi wa kpi kama? Dila kan nye. Wala ale vari Izirali jinla basi. Naawen ale vua la nyiŋ wa zuik yeŋ mɛ la kan lo tɛŋŋa. Wen maarika ale soa ate Jonatan a kpaliŋ ale Filistia demma jinla.>> Tugurik tɔŋdɔma yaa vari Jonatan basi ate wa an kpi ya.

46Sɔɔl yaa basi Filistia demma vika alege ate ba ŋman kuli ba tɛŋka.

47Sɔɔl ale chim Izirali naab la wa kpaliŋ kama ale Izirali dachaasaŋa meena gilim. Wa kpaliŋ ale Moab ale Ammon ale Edom ale Zoba naawa ale Filistia demma. Jigi meena ate Sɔɔl a cheŋ la wa nak a dɛ ba kama. 48Wa jam kpaliŋ kama ale suinum pagrik a nak dɛ Amalek demma. Wa vari Izirali demma ba dachiak sii ale jam a vari ba la nisa po kama basi.

49Sɔɔl nidoabilisaŋa jam le Jonatan ale Isvi ale Malki Sua. Wa lie kpagni yuei jam le Merab. Wa lie baaŋka yuei jam le Michal. 50Sɔɔl powa yuei jam le Ayinoam. Wa jam ka Ayimaaz lie. Sɔɔl tugurik tɔŋdɔma kpagni yuei jam le Abner. Abner jam ka Ner biik. Ner abe jam ka Sɔɔl kowa suok. 51Sɔɔl kowa Kis ale Abner kowa Ner jam ka Abiel bisa.

52Sɔɔl boka po meena wa chiib kpaliŋ kama ale Filistia demma. Wa dan nya nuru pagrisa yaase nuru tuasa Izirali demma po wa nyiem pai basi ka wa tugurik tɔŋdɔma po.

Currently Selected:

1 Samuel 14: BWU

Highlight

Copy

Compare