1 Samuel 11

1Ku ŋaaŋnyiŋ naab Nayas Ammon denɔwa a yaa dɛ wa tugurik tɔŋdɔma niŋ ate ba ga gilim Jabes ale bo Gilead la. Jabes nidoama meena yaa weeni wa ayen, <<Fi dan siak nɔiyeŋka ayen fi kan ko ti, ti le siak te fu.>>

2Nayas yaa tulisi ayen, <<M siak ya, alege nama mɛ a dan siak ayen m kpeti waai meena juga ninaŋa a basi ate chivie yik Izirali demma meena.>>

3Jabes nisɔmma ale wom la, ba yaa weeni wa ayen, <<Basi ate ti tom nuruba ate ba cheŋ Izirali tɛŋka meena a nya nuruba ate ba dan kan jam vari ti a basi abe ti yaa siak te ni.>> Nayas yaa siak.

4Ba le tom baai la yaa cheŋ. Ba le paari Gibea juijui ate Sɔɔl boro la ba yaa weeni nuruma dii ate naawa a yaali ba jigi la. Nuruma meena deri a kum.

5Dila po ale Sɔɔl a nyini ka talim a vi naakpaama ŋaaŋ a kuli a yaa wom nuruma Kumsaŋa. Wa yaa bek ayen, <<Ka boa? Ka boa ate nuruma a kum?>> Ba yaa weeni dii ate nuruma a ta nyini Jabes a jam weeni la.

6Sɔɔl ale wom dii ate ba weeni la, Wen Chiika a deri sueri wa ate wa sui a puuri ale Nayas ale weeni diila. 7Wa yaa ko naakpaama ŋaye a boani. Wa yaa chari lanta a te nuruma ale weeni ba ayen ba cheŋ tɛŋsaŋa meena Izirali po ale moolika de, <<M le nye ni naab kpaamaŋa ka nna ase ni nin zɛri an va mi Sɔɔl ale Samuel.>> Ate Naawen basi ate yɔgsum yega yik nuruma ate ba meena a chim bunyi a nyini. 8Sɔɔl yaa tigsi wa nuruma meena Bezek. Izirali nuruma meena jam ka tusa kobsita (300,000), Juda nuruma mɛ meena tusa pisita (30,000).

9Ba yaa weeni nuru baai ale jam la ayen, <<Ni weeni Jabes Gilead demma ayen, <Wenni ale di jueli ka ti le vari ni basi.> >> Baai ate ba tom la ale ga weeni Jabes demma la, ba sue yaa peenti nna yegayega. 10Jabes demma yaa weeni Nayas ayen, <<Chum ti le siak te ni ate ni nye dii meena ate ni a yaali la.>>

11Yok kula Sɔɔl yaa poori wa nuruma buta. A nyini vari veentidi ba yaa siti Ammon demma a ko ba. Ba jam ko ba ka dila a paari kantueŋ. Baai ale vua la jam chali waaŋ ka tɛŋ kala meena. Ba jam waaŋ ka wanyi wanyi.

12Kpaliŋka ŋaaŋnyiŋ, Izirali demma yaa bek Samuel ayen, <<Alege baai ale zɛri ayen Sɔɔl kan chim ba naab, la? Ta ba jam ate ti ko ba.>> 13Sɔɔl me yaa tulisi ayen, <<Ti kan ko waai jinla, jinla daani ale Naawen a vari Izirali ba dachaasaŋa nisa po basi.>>

14Samuel yaa ŋman weeni nuruma dula jigini ayen, <<Ni te ti ŋman cheŋ Gilgal a ŋman ga mooli ayen Sɔɔl ale tama naab.>> 15Ba yaa cheŋ Gilgal. Dula jigini, Naawen niŋ ba yaa siak ayen Sɔɔl ale ba naab. Ba yaa nye suiyɔgni tiirita kaabka a te Naawen alege pai lantaŋa chari chaab. Sɔɔl ale Izirali demma yaa dɛ masim ale chaab.

Currently Selected:

1 Samuel 11: BWU

Highlight

Copy

Compare