1 Samuel 12
12
1Samuel yaa weeni Izirali demma meena ayen, <<Ni le weeni ayen ni a yaali naab la, m te ni kama ayen wa a nya ni zuk. 2Wa ale ni niŋdeerɔ. Mi yaa kpaŋ kama ate zuk peenti. M bisaŋa abe bo ale ni. Mi chim ni niŋdeerɔ a nyini ka biik po a jam paari yɔgyɔgla. 3Ni sebi mi Samuel. Ti ni za Naawen ale naab waai ate wa lueri la niŋ la, ni waai baga a dak ayen, wanni de ate mi nye kaasi. Mi vari ni waai naab yaase wa boniŋa? M be gebi waai jaab dɛ? M fɛ ka wana? Waai a bo dela a baga a weeni ayen m basi ate nuruba a da mu? Waai a dan baga a dak ayen m nye wieŋa de dinyi, m le tuni.>>
4Nuruma yaa tulisi ayen, <<Fi an gebi ti jaaboa, fi be an fɛ ti. Fi an tuesi ti waai jaaboa.>>
5Samuel yaa weeni ba ayen, <<Jinla Naawen dek ale naawa ate wa lueri la ka seerɔ ba a wom dii ate ni weeni la kama. Mi an tuesi ni waai jaaboa.>> Ba yaa weeni ayen, <<Naawen ka seerɔ ayen fi an nye wari a kaasi ya.>>
6Ate Samuel yaa weeni nuruma ayen, <<Ka Naawen ale lueri Moosis ale Aaron ate ba ta ti kokpieŋsaŋa a nyini Ejipiti tɛŋka a nyini ate ba jam tɛŋka de. 7Yɔgyɔgla de ni zaani. M a yaali m weeni ni kama, Naawen niŋ, wayɔrisima ŋaai meena ate Naawen tom a te nama ale ni koma la.
8<<Ku ŋaaŋnyiŋ ate Jekob a jo Ejipiti, ate wa ŋaaŋbisaŋa a jam a tu ninam la ba kum kama a te Naawen a yaali maarika ate wa tom Moosis ale Aaron ayen ba vari ba basi. Ba dɛ ni kokpieŋsaŋa niŋ kama a ta ba nyini Ejipiti nyini a jam juijui ate ba boro nna.
9<<Alege ti kokpieŋsaŋa a baŋ Naawen, ba Wenni wari ate wa basi ate ba dachaasaŋa a nye kpaliŋ a nak dɛ ba. Dachaasaŋa de po a jam ka Sisera. Ba tugurik tɔŋdɔma kpagni a nyini Yazor. Dachiak ka choa ale Filistia demma. Moab naawa mɛ ale wa tugurik tɔŋdɔma jam nak dɛ ba. 10Ba yaa kum a te Naawen ayen, <Ti tom a kaasi fu kama ale zɛri Naawen abe tom a te Baal ale Astarot wenaŋa. Alege yɔgyɔgla de vari ti a ta nyini ti dachaasaŋa nisama po a basi ate ti tom a te fu ya.> 11Ate Naawen a tom Jerub Baal ale Barak ale Jepeta ale Samuel a vari ni ni dachaasaŋa nisa po jigi meena basi ate ni boro nalimnyiini.
12<<Alege ni le jam nya ayen naab Nayas ale nyini Ammon la a jam cheena ayen wa nye kpaliŋ ale ni la. Ni zɛri Naawen ni wenni kama ase ni naab la ale bek ayen ni a yaali nidek naab. 13Wa be le nna. Wa le naab waai ate ni bek ayen wa a nya ni zuk la. Ate Naawen a pai te ni. 14Nama a daa chali Naawen yɔgsum a tom a te wa ale siak a te wa ale ka tukpari ale wa wieŋa, nama ale ni naawa ale a nya ni zuk la a dan va Naawen ni Wenni, ku nala, 15alege ni dan kan siak a te Naawen, ni dan ta tukpari ale wa wieŋa wa le namsi ni le ni naawa meena, ase wa le nye ni kokpieŋsaŋa diila.
16<<Ni be kpesi a nya Naawen ale za wa nye wakperik kaai ni nimbie po la. 17Yɔgyɔgla de ba an boro a ŋari daa ŋanta? Ni seba ayen ŋmoruk a kan ni ŋanta ŋarika wen ya alege m le puusi ate ŋmoruk a jam ale nanpansa. Ate ni miŋ biem buui ate ni nye Naawen nina po ni le bek a yaali naab la.>>
18Ate Samuel yaa weeni Naawen ayen wa basi ate ŋmoruk a jam ale nanpansa. Da dila danni ate wa basi ate ŋmoruk a jam ale nanpansa. Ate ku cha nuruma nna yegayega Naawen ale Samuel ale nye diila.
19Ba yaa saalim Samuel ayen, <<Puusi te Naawen, fi Wenni ate wa kan ko ti. Ti a chali ka yɔgsum dii nyiŋla ti le weeni ayen ti a yaali naab ayen wa a nya ti zuk la a gum biem buui ate ti poom nye la kama.>>
20Samuel yaa weeni ayen, <<Ni kan chali yɔgsummoa. Ka wensie ayen ni nye wieŋa de meena a kaasi, alege ni kan ŋman basi Naawen vaka. Ni tom a te wa ale ni suiniima meena. 21Ni kan basi Naawen abe ni va bɔgta. Ti ka kiriya. Ti an baga a maari ni, ti bɛ an baga a vari ni ni dachaasaŋa nisa po a basi. 22Naawen sui a peenti kama ate wa basi ate ni chim wadek nuruba. Ni kan poli ayen wa le zɛri. Wa kan nye dila wa yuenni nyiŋ. 23Dan ka mi tɔga, m kan basi ni puusi te ka. M dan basi ni puusi te ka, ka Naawen ate m nye kaasi. M le kasim a sak ni ka dii ale magsi ale nala ayen ni a va la. 24Alege ni zuli Naawen abe ni tom ale ni suiniima meena a te wa. Ni poli wakperikaliik sii meena ate wa nye te ni la. 25Ni be dan kasim a nye biem, nama ale ni naawa meena ni dachaasaŋa ale nak yik ni ta cheŋ.>>
Currently Selected:
1 Samuel 12: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
