1 Samuel 10
10
1Samuel yaa pai kolini ale kpaam a kpiiri Sɔɔl zukku a gbaari wa ale weeni ayen, <<Naawen ale lueri fu ayen fi a nya wa nuruma Izirali demma zuk. 2Fi dan basi mi ale a kuli a ga paari Zelza Benjamin tɛŋka banni fi le tu nuruba baye a moata Arekel guka jigini. Ba le weeni fu ayen bonsaŋa ale bɛ la ba nya si kama. Bonsaŋa wari an ŋmaa daani ni kowa alege ka nama. Nuruma bayewa le weeni ayen, <Wa kasim a bek kama ayen wa le nya wa biika ka bɛ?>
3<<Ase ni le a cheŋ la, ni le ga paari tiib kpioŋ Tabor. Dula jigini ni le tu nuruba bata ale ba a cheŋ Betel ayen ba nye kaabka a te Wen. Ba wanyi a ta ka bua ŋata, nwala ta borobotta tita, wa choa mɛ a ta bunlɔk ale daam. 4Ba le puusi ni abe ba pai borobotta tiye a te ni. Ni tuesi.
5<<Kula ŋaaŋnyiŋ jueli Wen guuku ale bo Gibea po la. Filistia tugurik tɔŋdɔba limisi nyaka jigi ale moata dula. Ni dan paari ni cheŋ moata tɛŋka, ni le tu biisiteerɔba ale ba nyini guuku zuk ate ba a nye kaabka la a ŋmani. Nuruba ale dɛ ba niŋ a nak kpanta, ale paampuuŋta ale sinyaksa. Biisiteerɔma ale a cheŋ la ba za ba a biisi ka wie ŋaai ate Naawen Chiika a pai a sak ba la. 6Naawen Chiika ale jam sueri fu ale pagrim ate fi mɛ a biisi ase bala la ate fi chim fi tɔga. 7Wieŋa de a dan nye, yaa be a nye dii meena ate fi a poli ayen Naawen a yaali ayen fi nye la, ale Wen a bo le fu kama.
8<<Be dɛ niŋ a cheŋ Gilgal. M le jam dula a tu fu a nye kaabka a ju te Naawen ale suiyɔgni tiirim tii ate ti le kali dɛ ale chaab la. Kan nye wari ya ate ku ga paari daa ŋayopɔi ate m yaa jam weeni dii ale magsi fi nye la.>>
9Sɔɔl ale cheem basi Samuel la, Wen deri tagri wa suinummu. Wieŋa de meena a jam chim ka wensie da dila danni. 10Sɔɔl ale wa yɔmawa ale ga paari Gibea la, ba yaa tu biisiteerɔba suiku po. Wen Chiika deri sueri wa ale pagrim ate wa deri a biisi wie ale mbala. 11Nuru baai ale seba Sɔɔl la ale nya ale wa biisi wie ale biisiteerɔma la, ba yaa bek chaab ayen, <<Ka boa ale nye Kis biika? Sɔɔl mɛ ka biisiteerɔma po wanyi?>>
12Nuru ale jam bo dula a yaa bek ayen, <<Ka wana ale bo koa?>> Ku yaa deri chim sinsii ayen, <<Sɔɔl mɛ ka biisiteerɔma po wanyi?>> 13Sɔɔl ale nueri biika la, wa deri jueli pimpitini zuk.
14Sɔɔl kowa suok yaa bek wa ale wa tomteerɔwa wa ayen, <<Ni tin ga ka be?>> Sɔɔl yaa weeni ayen, <<Tama a gisi ka bonsaŋa alege ti le kan nya si la, ti yaa cheŋ ti biisi ale Samuel.>>
15Sɔɔl kowa suoku a ŋman bek ayen, <<Ni weeni mu, Samuel weeni nama ayen ka boa?>>
16Sɔɔl yaa tulisi ayen, <<Wa weeni ti kama ayen bonsaŋa ba nya si kama.>> Alege Sɔɔl an weeni wa kowa suoku Samuel ale weeni ayen wa le chim naab la.
17Samuel yaa wi Izirali demma meena ayen ba tu Naawen Mizpa. 18Wa weeni ayen, <<Naawen, Izirali Wenni ale weeni diila ale nna, <Mi ale ta ni a nyini Ejipiti nyini. M vari ni Ejipiti demma nisa po a basi, a vari ni mɛ tɛŋ sii ale a fɛ ni la nisa po a basi.> 19Alege yɔgyɔgla de ni zɛri ni Wenni. Wa vari ni kama a basi ni daani ka yegayega po meena, alege ni weeni ayen, <Aaya! Tama a yaali ka naab ayen wa a nya ti zuk.> Yɔgyɔgla de ni jam zaani Naawen niŋ. Dɔk meena ale yezuk meena a jam zaani.>>
20Samuel ale tigsi Izirali yenni meena la. Naawen yaa lueri Benjamin dɔkku. 21Samuel a jam basi ate ba a zaani ka yezuk yezuk ate Naawen a lueri Matri yezukku. Ate wa basi ate nuru meena Matri dɔkku po a taam ate wa lueri Kis biika Sɔɔl. Ba le a gisi Sɔɔl la ba an nya wa. 22Ba yaa bek Naawen ayen, <<Sɔɔl an diem jam de wa?>> Naawen yaa weeni ayen, <<Wa jam kama. Wa suk ka kɔlimaŋa ŋaaŋ.>>
23Ba yaa chali ga ta wa nyini. Sɔɔl ale jam zaani nuruma po la wa jam wɔŋŋa a gaam ba meena kama. 24Samuel yaa weeni nuruma ayen, <<Ni nya nuruwa de ate Naawen lueri la. Nuru karo a nye se wa la nuruma meena po.>> Nuruma deri a kaari zik zik ayen, <<Naawa goa benni.>>
25Samuel yaa basi ate ba miŋ tuin ŋaai ale magsi naawa a tom la ale ŋmarisi ŋa a nyo gbaŋ po a pai dueni Naawen niŋ. Ate Samuel yaa weeni nuruma ayen ba kuli ba yeeŋa.
26Sɔɔl mɛ yaa kuli wa yenni Gibea. Wen yaa biisi nuru tuasa gela suiniima po ate ba maa va wa. 27Alege nuruba gela ale potim a daani la ayen, <<Nuruwa de ale nye ka sɛ a vari tama a basi?>> Ba an siak ayen Sɔɔl a magsi naab chimka, ale zɛri ba an ta tiirita a jam te Sɔɔl. Alege Sɔɔl a nye diki.
Currently Selected:
1 Samuel 10: BWU
Highlight
Copy
Compare
Share
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation
