1 Korinti 5

1Yɔgyɔgla de m wom kama ayen nipok yaalik tuima ale bo ni suŋsuŋ a bie nna yegayega ate baai ale kan daa Kirisita bisa la a kan nye. Ba weeni mu kama ayen nuru ale a goa ale wa ma ŋaaŋchoa. 2Dila nyiŋla ni le nye ka sɛ a ta kanjanta, ni magsi ni a kum wanni de nyiŋ kama, abe ni yeeri nuru waai ale nye wanni de choa la ni suŋsuŋ.

3Mi a ka ale ni alege m bo le ni chiika po kama. Mi be poom bo waai ale nye wanni de la buusa kama, nna se m poom bo le ni kama la. 4Ni dan tu chaab Yeezu ti Naawenni yuenni nyiŋ ate mi bo le ni chiika po, ate Yeezu ti Naawenni pagrimu a bo le ti, 5ni basi wa a te Sitaana a kaasi wa nyiŋka ate Yeezu ti Naawenni a dan pilim jam abe wa vari wa chiika a basi.

6Ni kunkuulimaŋa an nala. Ni seba ayen dabinta magadega ale a basi ate boroborok a fuusi. 7Dila la ni be yeeri ni wabaataŋa ale a nye ase dabin kpagsa la a basi ate ni chim nuru weleŋsa. Ate ni yaa be a nye ase boroborok ate ba an pai dabinta a nyoro la. Ni abe ale ka diila ale la, dii nyiŋla Kirisita ti Gaambasika pabiika a kpi kama a te ti.#5:7 Nyinika 12:1-20, 13:7 8Ni be basi ate ti dɛ Gaambasika Tigini ale weleŋsa ale wensie, ku la a nye ase ka boroborok ate ba an pai dabinta a nyoro la. Ni kan te ti ta wabaata ale gaasa, ku la a nye ase ka boroborok ate ba pai dabinta a nyoro la.

9Gbaŋ kaai ate m ŋmarisi a te ni la, m weeni ayen ni kan pai nidek a gum nidoa yaalisa ale nipok yaalisa po. 10M kan weeni ka baai ale kan daa Kirisita bisa a chim nidoa yaalisa ale nipok yaalisa la, yaase wa a yaali nuruba ŋanta la, yaase zueba la, yaase ba a kaab bɔgta la. Ni dan kan pai nidek a gum ba po, se ni yeeri nidek tɛŋka zuk. 11Mi a weeni kama ayen ni kan pai nidek a gum waai ale a wi wadek ayen Kirisita biik alege chim nidoa yaalik yaase nipok yaalik, yaase wa a yaali nuruba ŋanta, yaase wa a kaab bɔgta, yaase wa a velim a te nuruba, yaase wa chim da bugrik, yaase zue. Ni kan poom kali a dɛ ŋandiinta ale nuru wala choa. 12Ku da mi tuini ayen m bo baai ale kan daa Kirisita bisa la buusa. Nama magsi ni bo ka Kirisita bisaŋa buusa. 13Wen ale wa bo baai ale kan daa Kirisita bisa la buusa. <<Ni yeeri nuru bioku ni suŋsuŋ.>> (Teerika 17:7)

Currently Selected:

1 Korinti 5: BWU

Highlight

Copy

Compare