1 Korinti 4

1Ni meena abe a nya tama ase Kirisita tomteerɔba la, ate ti ta suik a mooli Wen wensie ŋaai ale kan jam nyini peelim la. 2Dii ale magsi ayen tomteerɔ a ta la ale wa ta siaka ale wa nyɔnɔwa tuima jigi. 3Alege mi jigi, mi niŋ ka ale ni nin a bo mi buusa yaase waai a nin bo m buusa. Mi dek an poom a bo m dek buusa. 4Mi dek a zɛ wa kaasuŋ kuui ate m tom, alege kula a kan sak ayen m sum zɛ. Naawen ale waai ale wa bo m buusa. 5Dila nyiŋ ni be kan bo waai buusa alege ate ku danni a paari. Naawen a dan jam wa ale wa bo buusaŋa, abe wa lak wa susugi ŋaai meena ale bo nuruba popola po ale ba suiniima po la a sak ate waai meena a tuesi pimpauk Wen jigi.

6M suata, nama nyiŋ ate mi pai m dek ale Apolos a magsi ayen ni baga a miŋ dii ate ba ŋmarisi Wen gbaŋka po la. Ni be kan pai zula a te nuru m wa ale kan pai m wa a chim jaaboa. 7Ka wana ale basi ate fi gaam fi chaaba? Daa Wen ale te fi jaabuuri meena ate fi ta la? Dila la, fi ale nye ka sɛ a kuulim ase fi ale ta jabuui meena la daa Wen ale te fu la?

8Ni be poom a deri jigsi kama a ta yegayega a dɛ? Ni poom a deri chim ka nalima alege tama? Mi a yaali ayen ni dan chim ka nalima nna ate ti dɛ naamu ale ni. 9Mi abe a poli kama ayen Wen a te ti ka tomteerɔba tuini ase nuru baai ate ba bo buusa a mini ba ayen ba ko ba la, ate nurubiik meena tɛŋka po ale Wen maarɔma a nya ti. 10Kirisita abe le soa ti la nyiŋ tama a nye ase ka betta la, alege nama a chim yam nyam Kirisita nyiŋ. Tama wobsa kama alege nama a pagra. Ba a zuli ni kama alege kan zuli tama. 11Yɔgyɔgla de nna, kom ale nyanyuila ale kasim ta ti, ti gattaŋa a cheeri, te ka yeri a goa, nuruba a nak ti mɛ, 12ti abe a tom ka nna yegayega ayen ti baga a nya a dɛ. Nuruba a dan ka te ti, tama a niak ba kama. Ba dan a namsi ti ti a chiibi kama. 13Ba a dan biisi ti a kaasi, ti a tulisi ba ale ka wamaŋsa. Ti yaa nye ka nna se yaata la a ta jam paari yɔgyɔgla de.

14M kan ŋmarisi gbaŋka de ayen m pai ni nyo ka chivie po, alege ka m basi ate ni miŋ ase m dek bisa a te mu a yaali la. 15Ni be a dan poom a ta sinsak sagrɔba tusidi, ni ka da ko boari ya. Mi chim ka ni ko Yeezu Kirisita nyiŋ m le mooli Wen wanni ate ni nya varibasika la. 16Mi a saalim ni, ni a nya mi nyeka a va. 17Kude nyiŋ ate mi a tom Timoti m biika ni jigi waai ate m mariŋ ate wa ta wensie ale Naawen la. Wa ale teeri sak ni mi nyeka ale Kirisita ale ka diila. Dila ate maa sak Kirisita bisa ale tigsi bo jigi meena la. 18Ni ba gela a ta ka kanjanta dii nyiŋla, ni a poli kama ayen m kan jam ni jigi ya. 19Dan ka Naawen yaalika m ni jam ni jigi ate m baga a seba ase ka kanjanta nyama de pagrim nyiŋ yaase ka nɔi po biik. 20Ba a nya Wen naamu ka nuruba nyeka po da ba biik po. 21M dan cheena ni jigi, m jam ale fiŋ ya m jam a sak jiirim ale yaalika?

Currently Selected:

1 Korinti 4: BWU

Highlight

Copy

Compare