1 Korinti 6

1Ase ni waai a dan ta biik ale wa Kirisita biik choa, ku a magsi ayen ni ta cheŋ boteerɔ baai ale kan daa Kirisita bisa la jigi, alege kan basi ate Wen nuru weleŋsa a biisi biika a niagi? 2Ni seba kama ayen Kirisita bisa ale ba bo tɛŋka demma meena buusa. Ni be dan a bo tɛŋka demma meena buusa, ni baga a biisi wa fiisa a niak chaab kama. 3Ni ŋman seba kama ayen tama Kirisita bisa ale ti bo Wen maarɔma buusa. Dila nyiŋla ti baga a biisi wa fiisa a niak chaab kama. 4Nuruba ni po a dan ta biika de choa ale chaab, ni a yaali ayen ni basi ate ka nuru baai ate Kirisita bisaŋa a kan zuli ba la a biisi biika ate ba niak chaaba? 5Ku magsi chivie ale ta ni kama, yam nyɔnɔ a ka ni suŋsuŋ ate Kirisita bisa a dan ta wari ale chaab abe wa yik ba a niak chaaba? 6Kirisita biik a kan ta wa choa a cheŋ boteerɔ baai ale kan daa Kirisita bisa la jigi ate ba a bo ba buusa.

7Ni be ale ta chaab a cheŋ boteerɔ baai ale kan da Kirisita bisa jigi la a sak kama ayen ni kan nye ase Kirisita bisa la. Ku ale zunchoŋ ase ni a nin basi ate nuru yonta a nye ni a kaasi. Ku ale zunchoŋ ni a nin basi ate nuru yonta a vari ni ŋanta. 8Alege ni goanti nye ka chaab a kaasi ale a vari chaab ŋanta.

9Ni be seba ayen gaasa nyam a kan maari dɛ Wen naamu. Ni be seba kude chak, ayen nidoa yaalisa ale nipok yaalisa yaase bɔgluk kaarisa yaase kaboŋ nyeerisa yaase nidoa baai ale a goa ale chaab, 10yaase zueba yaase butuem nyam yaase dabugrisa yaase velimvendisa yaase varidɔba. Bade waai a kan maari a dɛ Wen naamu. 11Ni ba gela a be jam a nye ka wieŋa de. Alege Wen a sugri ni wabaataŋa ate ni yaa chim nuru weleŋsa, ale chim wayɔrisima nyam Yeezu Kirisita ti Nyɔnɔwa nyiŋ ale Wen Chiika nyiŋ.

12Nuru waai a baga a weeni kama, ayen, <<Wa baga a nye wari meena ate wa yaali la kama.>> Alege daa wari meena ale a maari. Nuru baga a weeni kama ayen mi baga a nye wari meena ate mi a yaali la kama, alege mi a kan siak ate jabuui a basi ate mi a chim wa yɔma. 13Nuru waai mɛ ale weeni ayen, ŋandiinta ale soa poi, ate poi mɛ a soa ŋandiinta. Alege Wen ale jam kaasi ba la meena. Ku an magsi ayen waai a pai wa nyiŋka a tom nidoa yaalik ale nipok yaalik tuima alege ka wa pai a tom a te Naawen diila Naawen ale soa nyiŋka. 14Wen ale basi ate Yeezu ti Naawenni a yiti kum po, wa be le basi ate tama mɛ yiti kum po ale wa pagrimu. 15Nama zɛ ayen ni nyiŋsaŋa ale Kirisita nyiŋka ka bunyi? Mi a kan basi ate mi nyiŋka ate Yeezu soa la ale nidoa yaalik nyiŋ a chim bunyi. Kula a kan baga a nye. 16Ni be sum seba ayen waai ale a goa ale nidoa yaalik la, ka bunyi ale wa. Ase wa le weeni la, <<Bala bayewa yaa chim ka bunyi.>> (Piilimka 2:24) 17Nuru waai ale Naawen ale a chim bunyi la, ka bunyi ale Chiika. 18Ni basi nidoa yaalik ale nipok yaalik tuima. Wabiok meena ate nuru a tom la a ka wari a nye ale wa nyiŋka, alege nidoa yaalik ale nipok yaalik tuimaŋa, fi a tom a kaasi ka fidek nyiŋka. 19Ni abe seba mɛ ayen ni nyiŋsaŋa a nye ase ka yeri a te Wen Chiika la, waai ate Wen a te ate wa bo ale ni. Nama abe m soa ni dega ka Wen ale soa ni. 20Wen a da ni kama a tuni. Ni abe pai ni nyiŋsaŋa a tom a te Wen pimpauk.

Currently Selected:

1 Korinti 6: BWU

Highlight

Copy

Compare