1 Korinti 3

1M suata, mi jigi togni, m kan baga a sak ni ase baai ate Wen Chiika a bo ale ba la. Alege m le sak ni ase ka baai ale ta tɛŋka de wie popola la. Ni a nye nna ase ni ka baai ale diem piilim a bo Wen suiku po la. 2M jam a te ni ka biisim ayen ni a nyu, diila, ni an jam baga a de ŋandiinta, ni be an poom diem baga a de. 3Ni diem a nye ase ka baai ale kan daa Kirisita bisa la. Diila nyuri ale kpaliŋsa ale bo ni suŋsuŋ, ni kan nye ase ka nuruba kama la? 4Ni ba gela ayen ni a va ka Pɔɔl, ba gela ayen ba a va ka Apolos. Ni nyeka a nye nna ase ka baai ale kan daa Kirisita bisa la.

5Dila la mi ale Apolos ka bana? Tama ka Wen tomteerɔba, baai nyiŋ ate nama a ta siaka ale Yeezu. Naawen ale te tama wanyi, wanyi tuim ŋaai la ate ti a tom. 6Mi bori kama, ate Apolos a zaŋti, alege Wen a basi ate ŋantaŋa a chim. 7Be daa waai ale bori la yaase waai ale zaŋti la ale wari ya, alege ka Wen, dii nyiŋla wa ale basi ate ŋantaŋa a chim. 8Waai ale bori la ale waai ale zaŋti la ka bunyi, alege Wen ale tuni ba a magsi chaab ale ka ba ale tom diila. 9Tama meena ka baai ale gum chaab a tom a te Wen, ni abe a nye ase ka kaduk la, ate Wen a tom du, ale a nye mɛ ase yeri la ate Wen a sɛ.

10Ŋmante kaai ate Wen a te mi la, ate mi baga a tom ase seerɔ maŋ la, a sɛ nyubini ate nuru yoŋ a yaa sɛ nyubini zuk. Alege waai meena a kpesi wa ale a sɛ diila. 11Dila nyiŋ Wen abe poom a te ti Yeezu Kirisita kama ase nyubi la, ate nuru kan ŋma sɛ nyubi di choa. 12Nyubini de zuk nuru baai tuima a za ŋa a nye ase ka ligmɔniŋ ale kpana ale tintana ŋaai ale a nyaksi ate bolim a kan baga a dɛ la, ba gela tuima a za ŋa a nye ase daata, ale wuuta ale kinka ate bolim a baga a dɛ la. 13Ba ale nya waai meena tuima nalim ka dai dii dai ate Yeezu a za wa lak a sak la. Dai dila danni wa le basi ate ka bolim a chamsi waai meena tuima, a sak ŋa nalim ale ka diila. 14Wen ale tuni waai ate wa tuimaŋa bolimu an baga a dɛ kaasi la. 15Alege waai tuima ate bolimu a dɛ a kaasi la a kan nya tutuna, alege bolimu a kan dɛ wa dega ate ku a nye nna ase ba vari wa bolimu po a basi la.

16Ni a nye ase ka dɔk ate Wen a soa la, ate wa chiika a boro la. 17Dila nyiŋ waai abe dan kaasi dɔk kuui ate Wen a soa la, Wen ale kaasi wa. Wen nyiini ale soa wa dɔkku, nama abe le wa dɔkku.

18Waai abe kan paasi wa dega, nuru a dan bo ni po a poli ayen wa ta yam tɛŋka de zuk, wa be chim beruk ate wa baga a ta yam. 19Dii ate tɛŋzuk demma a pai a chim yam la ka betta Wen jigi, ase ku ale ŋmarisi ayen, <<Wen a pai ka yam nyam nyeka a yik ba.>> (Job 5:13) 20Ku ŋman pilim ŋmarisi ayen, <<Naawen a seba ayen yam nyama popolaŋa ka kiriya.>> (Yiila 94:11) 21Dila nyiŋ waai a kan kuulim, nuruba ale a tom dii ya. Ka nama ale soa ŋade meena. 22Pɔɔl ale Apolos ale Sifas a tom a te ka nama. Tɛŋzuk de yaase nyuvunni de yaase kum yaase yɔgyɔgla de yaase chum po, ka nama ale soa ŋade meena 23ate Kirisita mɛ a soa nama ate Wen mɛ a soa Kirisita.

Currently Selected:

1 Korinti 3: BWU

Highlight

Copy

Compare