Gokhini 12

A lɨ̂ŋhà gha kum wùt wù ywên nì nyàm yì bəmana

1Chwena yì kana yìlè fwo a nyə̂, mu yen wùt wù ywên ma wù ti mak a yuchwî ha sùnju, njoŋ mô a wun a sah à wù, fota tù fə̀nà mô a wun a tû, kəta mu jên njwòsù bà. 2Wu mô wu lâ, ma wan hì luma wûn, wu jyê beka wù ndùku ywo lûmì.

3Chwena yì kana yìlè fî fwo a nyə̂, nyàm yì chìk yì bəmana yìlè fwu kə̂kì bâŋà yi bâŋ, kəta tu sàmba nì sesu ìwûm. Nâbi ghɨ̀ni to kəta fota tù fə̀nà. 4Kpènu wunu yâhà bâh à mù jènà à mòk atɨ̂n à bàh wù tât a nyə̂, wù mak chwohi a chyə̂. Nyàm àtɨ̂n time a wùt wù ywên we ashyə̂ a wù tì khɨŋa hi bwɨ yâ hì gbûtè hi kut a wan àtɨ̂n, a wu yu afa wù bwə. 5Wùt ywên àtɨ̂n bwɨ wan wù lɨmà, wu mô hi bè saka tu lak tù jɨ̀m nì jyaka a bəmana. Biyani ghɨ tesi wan àtɨ̂n kwok nì wûn ha Yènfù a nyə̂ a funfu kpòk wu tù fə̀nù. 6Wùt ywên àtɨ̂n tet yen a yi lak yi sùsi, a mô luk we Yènfù tì fate lema ha wûn na ghɨ tôknà kwok nì wûn afû a mu tuk kam nì ghə yì bà nì tuk mù mtufa. 7Yi bàm atɨ̂n, woŋi lôtì a nyə̂, Maykèl ghê anjèlsu wunsu nô nyàm àtɨ̂n, nyàm àtɨ̂n nì anjèlsu wunsu boŋa nô ghɨna, 8biyani Maykèl ghê anjèlsù wunsu no yə nyàm àtɨ̂n, ghɨna hì fè kəta wi luku a nyə̂. 9Ghɨ mak chwohi nyàm àtɨ̂n a chyə̂. A mô ni, a mô ywô ye a ghɨ toŋte na deblì yâ, a fê mô kəbi Satàn. A mô yì yîn ye yì ndùku lehe ghɨta a mbyî yì jɨ̀m. Ghɨ mak chwohi wûn a chyə̂ ghê anjèlsu wunsu kə sù jɨ̀m. 10Yi bàm atɨ̂n, mu yu jyə̀ yi fwo bênà a nyə̂ jîsà na, “Yènfù ghàhnà fu bònhè lò ghɨt a wuna chîn chwûtè jyaka a wuna te fə̀n. Chîn mô, Klistù ma a ni wut we a Yènfù chwoka tuma mô hi chwùtè a ghɨ wuna jyaka beka ghɨ ti mak chwohi we a wù chehì mô a Yènfù ghàhnà fù ashyə̂, ngane wana ne nchwì, ngane ntuksu yâ. 11Wana ne mɨ ghɨ̂n ti nò yə wûn kum luŋ mù Wâ Njyə̀ nì hamok ye a ghɨna chehì fôktè fê kôŋà nâ hi fo ngɨŋsu ghɨna su hi kpû kum wûn. 12Nâ ghàn à jɨ̀m ghe a ghàn chyə a nyə̂, ghàn hi saŋlê! Yi nè hì bəmalò ha ghê ghɨ chyə a mbyî nì ghàn ghe a ghàn chyə a jwô yì chìk beka deblì ti chwo ben ha ghàn, lâ wanu wu yafa nâ haŋaŋ beka ghàn hì khə na yu ti tumhî shyəma fêt yi wuni mi.”

13À hì mô te ywò àtɨ̂n yena na ghɨ ti mak chwohi wùn a chyə̂, yì hì nyɨŋa a wùt ywên we yi bàm we a wù bwə wan wù lɨmà wê. 14Biyani ghɨ fo tu ghâ tu mbùk à wum tu ha wûn shyəma wù tet ywò mi yê ma wù yê tan a yi lak yi sùsi wù lùk afa a mô hi tòknà kwok nì wûn afû a wù lɨ̀m wù tât nì bəha. 15Ywò àtɨ̂n chwu mòlû a wùt ywên we yi bàm, mu mô kə te jwô shyəma mù lyê chya nì wûn. 16Biyani chyə gâmtì wùt ywên àtɨ̂n, mɨ jwò mi ye a ywò àtɨ̂n tì chwo yâ. 17Ywò àtɨ̂n bâŋhì wu lâ ha wùt ywên àtɨ̂n, lo yen lôhì yi woŋ ha ghɨta wùt ywên we yi sah yi nda, a mô nâ ghɨta à jɨ̀m ghe a ghɨ ndùku lêmà saktu Fùyèn tu fê fate khɨte hamok ye a Jisòs tì chwùte a ndan. 18Ywò àtɨ̂n timi kə a bi jwô yì chìk.

Currently Selected:

Gokhini 12: bmv

Highlight

Copy

Compare