Gokhini 11

Ghɨt à bà hi jìs kum Yènfù

1Yi bàm atɨ̂n, ghɨ fo mbàŋ ye a ghɨ fêkà mwə̀lû atɨ̂n ha mu jis na, “lòti ndù fèk ndâ Fùyèn ma wò fek kəbi baŋ a yi fo, ma wò taŋ kəbi ghɨt ghe ghɨ ngumle Yènfù afû. 2Wò yen, kə wò fek bâh à bɨna beka ghɨ hì mô ma ghɨ ti fo ha tumu, ghɨna mô hi nè jèlè bobhi Tèk yi yulani ha sù njoŋ mkìk njwòsù bà. 3Mu nè tumalò fòktì samsu sùbà ma ghɨna ti mak chifu, ma ghɨ gbê fokti tum à Fùyèn a mu tuk kam nì ghə yi bà nì tuk mù mtufa.”

4Fòktì mu sîn mô mu kâk mù sù olìfs mù bà nì mwə̀ me a ghɨ tomte lâmsù atɨ̂n wù bwà, wu mô a Bâba ashyə̂ we wù saka mbyî. 5Wùt ki mòmhi hi ləmhi ghɨna, ma wusu fwu a ghɨna yi jwô ma wu bobhi bànàsu ghɨna mu sê. À mò ni te ghɨ ywe nâbi nde we a wù mòmhe hi ləmhe ghɨna. 6Ghɨna kəta jyaka hi baŋa wuli na kə yi na a wu yu afa a ghɨna nè gbê fôktè tum à Fùyèn mi ye atɨ̂n, kəta a jyak hi nì na jwosu kahi a mu luŋ, fê kəta kəbi jyaka hi tê nì nâbi yìni nki ngə̂k na yì gan a mbyî nâbi wùni yu a ghɨna khɨŋa.

7À hì mô te ghɨna fòkte mihe tum atɨ̂n, ma nyàm yì bəmana ye yì fwo yi be afa yì lye chwo yênà kə yi yên yâ fê shik nô ha ghɨna ma yì nô yə ghɨna ma yì fê ywiti ghɨna. 8Gun tu ghɨna tu faŋ kə wu lum wu tâ a yi tèk yi chiki afa a ghɨ tì bante Bâba ghɨna a kàkfùtàfù. Ghɨt ale toŋte tèk mi ye wu lum wule na Sodòm, ghɨ le toŋte na Ijìb. 9Ghɨta bè fwo kə tu lak tù jɨ̀m ma fê fwu kə a sah a nda à jɨ̀m, jîsà kə tu jîs tù jɨ̀m, fê kə̂kà kə tu kə̂k tù jɨ̀m ma ben hi ke gun tu ghɨna tu a mu tuk mù tât nì bəha, tunhe na kə wùt guma ghɨna. 10Ghɨt ghe a ghɨ chyə a mbyî bê hi saŋle fê yə kum kpu ghɨt mɨ ghɨ̂n. Ghɨna bê hi fo mwə̀lû ha wana ne beka fòktìsu chik mi sîn sùbà tì kputî ma su ti fo ngə̂k yì kanana ha ghɨta a mbyî. 11Biyani, à hì mô yi bàm mu tuk mefu mù tât nì bəha, ma Yènfù fo yohnà ghe a ghɨ nê ghɨta chyə̂ ha ghɨna, ma ghɨ ni ghɨna loti, ghɨt ghe ghɨ tì yena ghɨna hì fânà nâ haŋaŋ. 12Fòktì su chiksu mi sîn sùbà a su kaha lote a yi kpû, yû jyə̀ yì tâ yìlè te yì fwo a nyə̂ jîsà na, “Ghàn kwok à ben afân!” Ghɨna kwok ləhà atɨ̂n à sù mbàk, a mô ya bànàsu ghɨna su mô kê. 13Chyə shɨŋ nek nâ haŋaŋ kə wu yu mefû, ghɨ senhi bâh à yi tèk ale atɨ̂n à bàh wù ìwûm ywiti ghɨta kamsu sàmba. Fânì kwo ghɨt ghe a ghɨ faŋa afû nâ haŋaŋ, ghɨna hì fo kokhînì ha Yèn fe a fu mô a nyə̂.

14Yen na, ngə̂k yì kùmtena ti chyâ, yìlè fê mô kəbi hi bèn, kə chîn.

Ghɨ toŋ yi soŋ na à hi mô tusoŋ sàmba

15Anjèl à Fùyèn yìlè toŋ yi soŋ yi wuni, na à hi mô anjèlsu sàmba. Mu yu jyesu tasu a nyə̂ su jîsà na, “Bâba ghàhnà nì We a wù Chwoka lema kəta jyaka hi tè saka mbyî chîn, mô hi tè saka kə yi sâk gokhini bu.” 16Chəh se mbà njwòsù kìk a su ndùku mô a mu kpòk mù tù fə̀n afa a Yènfù ashyə̂ fen yen kuhi kə̂ktu ghɨna tu hì ngumli funfu, 17jîsà na:

“Bâba Yènfù, Bè jyak à jɨ̀m

we a wò mô chîn, ma wò ndùku hì mô!

Ghàh fo àyòŋnà ha wò te wò chwùtè jyaka chika ghe a wò kəta,

yîmì hì saka à ghɨ̂t.

18Là mù ghɨt ghe a ghɨ ndùku khə wi wò tî yâf,

lâ wa ti boŋ yaf chîn,

yu ti kpên shyəma wò sak ghɨt a kpona

ma wò makti ghɨt gha ghɨ fetana nì fòktì sasu chiksu

nì ghɨt gha à jɨ̀m a ghɨ kokhe yet ya,

a mò ghɨt a tâ nì ghɨ botana.

Yu ti kpên shyəma ghɨ mihi ghɨt ghe a ghɨ chehì mihè ghɨta a mbyî.”

19Yi bàm atɨ̂n, jwo ndâ Fùyènì a nyə̂ jîmì, mu yen tantana a mu kàn à Fùyènà a funfu a ndâ. Wulì mwântè fê bwatê wu lùk afû, jyesu fwo bênà afû, chyə nêkà, temù chwo nâ hidù.

Currently Selected:

Gokhini 11: bmv

Highlight

Copy

Compare