Jêms 3

Chwûlù wûtù

1Kə ghàn a dona hi khɨŋa hi tè mò a sù chichà a wana noma, beka Yènfù bè saka lò ghàn ghe ghɨ yike ghɨta hanɨ̂ŋ. 2Ghàhnà à jɨ̀m njahalò. Wùt shìki mô jîsà njaha wi, ma à hi mô na wùt mu we mò wùt à chilichili, ma wù hi mô na wù làhi tihe ngɨŋ à wûn 3Ghàhnà làhi fwək a nyàm a kwaŋ ma yì bɨ̀nhi a wu yu afa ghàhnà lèma chyâk a yinì yì jwô shyəma yì hi ywo ghàhnà. 4Ghàn fê lyi baŋ a jwôlà a chika ha chwena. Ghɨ yè ghaka nâbi yàni, a hi china kə a fuf a ta ghɨ gbê, wùt gùfana àtɨ̂n hi tihe kə te wù kòŋà nì mbàŋlà fù, fu tobte kə ni. 5Yi mô kəbi yi ghəl te chwûlù wûtù. A mò wu luk wu wùnu tobte kə ni, biyani ma wu làhi jìs a gha ghɨ dô bəma kə ni. Ghàn yen lê sese fu wùs fu, fu nê fu nyok a kwo ghɨ ghaka kə ni. 6Chwûlù wûtù mò nâbi ni mô kəbi wu wus, fè mô tôk à gha be a wùt wu wùn, be fwo atɨ̂n bobhe kə wunu wûtù wù jɨ̀m. Chwûlù nyòkà nâbi ghə a mbyî nì wusu ma wu lo kə nâ wu lùk wu bobhenu. 7Wùt làhi kwote sù nyâm a ghə̀n, nì su jwòsù nì se su ŋâŋlè nì nyɨ̀mû, hi yike mwə̀ munâ, na mù hi chyə a ndâ, a mô gha ma wùt hi nê lò. 8Biyani, wùt wi hi tihe yikte wu chwû wu lum afân. Chwûlù wûtù mò a shyə be, yè yutè wi, ma wu ti lûn nì lef, yi ywê. 9Ghàhnà kokhe Bâba a we wù mò Bì ha ghàhnà nì jwo, sùlè kəbi à ghɨ̂t ma à fati Fùyèn ghɨ fune wûn nì jwo tɨni. 10Ghɨ kokhe Fùyèn nì jwo fè sûlè kəbi ghɨta nì yini. Yi kəta wi hi tê mò ni a wana noma. 11Mòlû mù jùŋ nì mòlû mù be wi hi tê fwu atɨ̂n yì tôk yì mòk. 12Kâk fu fikfù wana noma, wi hi mo lùkàmù, kâk fù fikfu wi hi mu nâbi kɨlìbsù, à mò kəbi yi ghəl te mòlû mu fù mbâŋ wi hi fo mòlû mù jùŋ.

Tof ye yi lo a nyə̂

13Wùt shìki mô a ghàn a fùtɨ̂n tofa fè khə a ghâ, wu chwûtì a wun a chyəna jûŋà. Wù shìki mô, wu chwûtì atɨ̂n à gha afa wù nè nì ngumlînì nì tofu. 14Biyani yi shìki mô a dûtè kə ghə̀k nì təm a be a ghàn a fùtɨ̂n, nâbi nde kwâktè kə ngɨŋ à wûn, kə wùt ha ghàn hi wama fəmi kùn à ngàŋtù jîsà na yi tofalò. 15Nki tof mi yîn bênà wi a nyə̂ yi bênà ha deblì kə chyə afân. A bu yi tof yi Yòhnànì. 16À yè mô a wu yu afa ghɨta ghə̀kà ghɨta, nâbi nde hi taŋa kə a to wuna, ghɨ hi chìnà chyə kə yi chyə̂, kwote nâbi yìni gha yi be nê kə yi nî. 17Tof we wu lo bê ha Yènfù, mô ashyə̂ yule kpenê, kôŋà yi yutì, kwâktè a ghâ, bonê, chyə chyənà chilichili, kwohe yi sen nâ haŋaŋ, gha jûŋà fwo atɨ̂n dô kə ni. Tof wu tɨnu nê nâbi ghə kə yi ghəl, lehînì bu atɨ̂n. 18Ghɨt a yutena yome yi yutì a ghɨta fùtɨ̂n, yi ləmâ, yi nî ghɨta hi chyə chyənà chilichili.

Currently Selected:

Jêms 3: bmv

Highlight

Copy

Compare