Jêms 4

Ghàn fo ngɨŋ sanisu ha Yènfù

1À bè ghə nì nô nì gùfna a ghàn a fùtɨ̂n? Ba gha mɨ ghɨ̂n gànà ni beka ghàn mò yu mù jɨ̀m se fwona nê ghàn na là mânù hi lûmà hanɨ̂ŋ yi bàm yi mwə̀ mù mbyî. 2Se ghana shihi fwu a mwə̀, ghàn khɨte wi, ghàn hi ywê, njaŋâ fê nô, biyani khɨte wi. Ghàn kəta wi mwə̀ munâ beka ghàn bufa wi ha Yènfù. 3Ghàn bufa nâbi yi bûf, Yènfù fo wi beka ghàn bufa wijə nì kwâktì jûŋì. Ghàn bufa kə na ghɨ fo ma ghàn hi nê gha ghe ghàn kòŋà hi nì nì mwə̀ mù tɨ̂n. 4Ghɨt ghɨ̂n ghɨ kokhe mwə̀ mbyî ni! Ba yi ni mò na ghàn khə wi na ghàn hì kôŋà mwə̀ mù mbyî, ma à nê hi mô na ghàn bànàlò Yènfù. Ni, à kòŋà nâbi nde mwə̀ mù mbyî ma wù hi bânà Yènfù. 5Ba ghàn khəlò luk wu ŋwàklù Fùyèn we wu jîsà na, “Yènfù kòŋàlò yohnà ghe fu fo ha ghàhnà nâ haŋaŋ. Luk mu wûn jìsà kə hamok.” 6Mwə̀ mù mbyî foma nâbi ha ghàhnà ni, Yènfù kəta kə təm a jûŋà ha ghàhnà. À ni gha ye ŋwàklù Fùyèn jìsà na, “Yènfù bànà ghɨt ghe ghɨ ghaŋhe wunu, biyani tôknà ha ghê ghɨ ngumle ngɨŋsu ghɨna su.” 7Yi mô ni, ghàn fo ngɨŋ sanisu ha Yènfù. Ghàn tunhi deblì ma yì tet à kahi a ghàn a yi bàm. 8Ghàn bê bakhi ha Yènfù. Ma fu nê bê bakhi ha ghàn. Ghɨt a gha be ghɨ̂n! Ghàn kəta a təm à bà. Ghàn su wo wanu a gha be ma ghàn sô jobhi təm ghana. 9Ghàn hi kwohe seni bwata jyê nâ haŋaŋ. Kə ghàn hi chyəktê, ghàn hi bɨlà jyê yi jî. Kə ghàn hi fê saŋlê, ghàn hi jyê wunu. 10Ghàn chwohi ngɨŋ sanisu a Yènfù ashyə̂ ma fu bê lohi ghàn a nyə̂.

Kə ghàn hi saka wana ne ale

11Kə ghàn hi bobhe yet a wana nì ghana a wana noma. À bobhi nâbi nde yet yi wâ nè wuni makə wù sakalò wûn, ma yi nê hi chwûtè na wù jis gha yi be mi yê kum yi sâk fê saka kəbi sak yi tɨni. Wùt shìki sak a yi sâk, ma à hi mô na wù ti kwok ndokò a tô àtɨ̂n hì lêmà wijə sak yi tɨni. 12À mô kə Yènfù fe fu fo saktu, fu saka ghɨta. À mò kə wûn we wù mô hi bònhè à ghɨ̂t, à fê mô kə wûn we wù mô hi bobhe ghɨna. Wò mô nâ nde hi tè saka ghɨt ale agha?

Wùt khə wijə tuk wu bisu

13Ghàn ghɨ̂n a ghàn jìsà na ghàn nè lô lân makə yi bîs hi yèn a yi tèk afân ni, makə ha yòkô hi chyəte kwok afû a lɨ̀m, nê bəkli khɨte kâ, ghàn yuti. 14Njwô ghə te ghàn yè jîsà ni khə wi na à bè gânà ghə yi bîs agha? Yi mô kə te sù mbàk se su yè fwo bê kə fu yulâ ni su fî kaha sami kə yi samî. 15Ghàn bɨlà kəta hi tè jìs na, “Yi shìki kpenâ ha Bâba, na ghàh chyətè kwok, ma ghàh ni gha yîn makə yòkô ni.” 16Ghàn ghɨ̂n chîn bɨlà ghaŋhe kə wu wun jîsà kə yi jîs tôkà fôktè gha ghe ghàn bakte hi nì. Ghaŋhi wùn mi yîn mò be. 17Yi ni chwûtè na à khə nâbi nde gha jûŋ yê wù kəta hi nì, faŋ hi nì, ma yi hi mô na wù ti ni be.

Currently Selected:

Jêms 4: bmv

Highlight

Copy

Compare