1 Kòlitiyàns 9

A jyak ghe a wùt wù tum kəta

1Mu mò kə nâ wùt wù tum, a kəta kə nâ mu ngɨŋ à mì. Yi mô na mu tà tì yen jə Jisòs a Bâba ghàhnà ma? Ba ghàn mò tam wu fèt wu mu ha Bâba? 2Mu shìki bu wut wù tum ha ghɨt ale, ma mu hi mô wut wù tum ha ghàn, beka lum we a ghàn mò atɨ̂n ha Bâba chwûtèlò kə nâ fêt yi mi te wut wù tum. 3A ni lum we a mu nè hì jîsà atɨ̂n hi gàmtè ngɨŋ à mì a wu yu afa ghɨta ngane mu. 4Yi ni mò na ghɨ kəta wi hi tè fo mwə̀ mù yə̂mù makə shyə hi nyû a ghàh yì fèt afa a ghàh nè ma? 5Yi ni mò na ghàh kəta wi jyaka hi lyè wùt wù ywên wù bimena ha ywi, hi tè gbì nì wûn kəbi te wâ nè Bâba nì Sefàs nì ghɨt a tuma ghɨ le ma? 6A ghɨ ni jìsà na à mò kə ghàh à Bànabàs a ghɨ kəta hi tè fèt kə yi fêt shyəma ghɨ yə ma? 7À mò yìni sojà ye a yì fètà fê kaha lâkà ngɨŋ à wûn agha? À mò nde hi fèt a fùk, bu hi la tam we wu fwo a fùk afû agha? À mò yìni chìn à sù nyâm ye yì kama wi ghəni nyâmì hi nyo agha?

8“Mu jìsà wijə kə gha mɨ ghɨ̂n te wût, nâ Saki jìsà kəbi ni. 9Ghɨ ti nyak a Musìs ŋwàklù yì Sak na, kə wò bè kwuta jwo mbòŋì yi chika a saŋ.” A Yènfù ni jìsà a gha wu lùk afân kum kə mbòŋsù ma? 10Yi mô hamok na fu jîsà kum ghàhnà beka wùt wù fètana nì wùt wu kpèna shihi nè yi fêt, ghɨna hi khə hamok na ghɨna kətalò mwə̀ mù yə̂mù hi yə̂ nâ a ghɨna sù ngɨŋ. 11Ghàh shìki mô ma ghɨ ti yomi tum yì jùŋ a ghàn a təm, ma à hi bu gha yi be shyəma ghàn hi fo mwə̀ mù yə̂mù ha ghàh. 12Ghɨt ale shìki kəta a jyak hi tè kî na ghàn fo mwə̀ mu yə̂mù ha ghɨna, ma ghàh hi kəta chyâ nâ yâ.

Biyani ghàh shìki mô teka ghàh ni gha kum a jyak mɨ ghɨ̂n a ghàh kəta hi te fyi mwə̀lû ha ghàn. Ghàh bɨlà wunhe kə yi wunhî beka ghàh kòŋà wi hi nè gha shyəma yì tàhi tum yì jùŋ yì Klistù na kə yì ləma. 13Ba ghàn khə na ghɨt ghe a ghɨ fêtà a ndâ Fùyèn kəta mwə̀ mù yə̂mù ghɨna, mu fwo kə afû? Nâbi ghê a ghɨ fêtà a tô baŋ a yi fo yə kəbi a mù mwə̀ afa a ghɨ fo afû. 14Yi ni mò kəbi yi ghəl te Bâba fo ha yi sak na, ghɨt ghe a ghɨ fôktè tum yì jùŋ mò kə hi tè yə kum yinì.

15Mu shìki mô teka mu ni gha nì jyak mɨ ghɨ̂n, nyâkà wi chin na ghàn fo shyə ale a mu mwə̀ afû ha mu. Yi jwôfà na mu bɨlà kpu yi kpû, chyâ shyəma wùt tàhi na kə mu hi jala kum lum we a mu fòktè tum yì jùŋ atɨ̂n. 16Mu kəta wi hi tè ghaŋhe wu wun kum te mu fòktè tum yì jùŋ. A hì mô yi fêt ma ghɨ ti lem na mu hi nê, ma mu faŋ hi nì, ma ngə̂k yi kanana hi mô a mu a tû! 17Mu shìki nê fêt mi yina ma ghɨ chwoklô mu, ma ghɨ hi kəta hi làk a mu. Biyani ma mu shìki nî kə beka à mò yi gha, mu kəta kə hi nì, ma à jis Fùyèn na mu hi nê. 18Maktu mu mò nâ ghə? Maktu mu ni mò kə na mu hi fôktè tum yì jùŋ, bufa wi shyə, tòkà lye yênà wi a jyak afa a mu kəta te wut we wù fòktè tum yì jùŋ.

19Mu wijə a kwôs ha wùt nâbi te mu fate ngɨŋ à mì ha kwòs ha ghɨt à jɨ̀m shyəma mu ni ma ghɨt a dona fê tòkà bimi. 20Mu yênà ha ghɨt a Jûs, mu hi mô kə te wùt à Jûs, hi nì na ghɨna fê tòkà bime, dô kə ni, mu yen ha ghɨt ghe a ghɨna lèmà Saki, mu hi mô kə te wut we a wù lèmà Saki nâbi te mu bu a yi sah à yi Sâk. Mu nè mu hi nê ni shyəma ghɨna fê tòkà bimi, dô kə ni. 21Mu yen ha ghɨt ghe a ghɨ lêmà wi saki, mu hi mô kə te wut we a wù lèmà wi saki. Yìna chwùtè wi na mu mò ya, lêmà wi sak yi Fùyènì. Mu lèmà kə nâ sak yi Klistù, biyani mu yen ha ghɨt ghe a ghɨ lêmà wi saki, mu hi nê kə ya hi nì na ghɨna tôkà bimi, dô kə ni. 22Mu yênà ha ghɨt ghe a ghɨna bota, mu hi mô kə te wut wù botana, kə hi nì na ghɨna fê bimi. Mu ti kahi hì mô kə lum tù jɨ̀m kə ha ghɨt à jɨ̀m, shyəma mu ni, ma ghɨt ale bon nâbi a wùni lumu.

23Mu nè gha ghɨ̂n nâ à jɨ̀m kə hi nì na tum yì jùŋ ləma yen ashyə̂ shyəma mu boŋà khɨti yutì ye a yi mô atɨ̂n. 24Ba ghàn khə kə nâ na ghɨ sina nyɨŋi, ghɨta hi nyɨŋa, dô kə ni, biyani a ne nyɨŋ yə kə wùt wù mòk wu khɨti maktu tɨnu. Yi ni chwùtè na ghàn kəta hi fate nyɨ̂ŋ wu lum afa ghàn mò hi yə̂ hi khɨte maktu tɨnu. 25Nâbi nde sine yi gha, wu hi yike hi nè yi gha mi yê, fate khɨte ngɨŋ à wûn kə lum tù jɨ̀m. Ghɨna ni nè ghɨ hi nê ni hi khɨte wu maktu, wu bu hi faŋ, biyani ghàhnà mô hi bè khɨte wu maktu, wu mô hi bè fâŋ. 26A ni gha ye a mu chìnà nyɨŋa wi kə yi nyɨ̂ŋ; mu jɨ̀ŋà wi kànfù te wut we a wù sama kə luk wu yimu. 27Mu fo ngək ha wun wu mu shyəma wu khəta ma wu hi ywo ha mu, bu ya ma mu fokti tum yì jùŋ, ma à bê hi mô a gòkhi, ma Yènfù lem na mu kpene wi hi khɨte maktu tɨnu.

Currently Selected:

1 Kòlitiyàns 9: bmv

Highlight

Copy

Compare