1 Kòlitiyàns 10

Bôl fo tobhînì kum mosòmù

1Mu khɨŋa a wana noma na ghàn fê yɨngti te be ghàhnà ndùku gbê a dèt yi sù mbàk a lak yi sùsi, su khɨ̂ŋtè ghɨna nâ à jɨ̀m, ghɨna gbî yen tan a jwô yì bàŋana, yì tenâ, ghɨna daŋ nâ à jɨ̀m. 2Yènfù fo mòlû ha ghɨna atɨ̂n à sù mbàk afû nâ à jɨ̀m wù fî fo kəbi mòlû a jwô yì bàŋana, ghɨna hì mô jùmtìbàmsu Musìs. 3Ghɨna à jɨ̀m tì yə shyə a yəna à mòk ma à fo Fùyèn, 4fî nyu kəbi mòlû mù mòk ma à fo Fùyèn. Mòlû muna tì fwu a yi wo afa a yi ndùku gbê a ghɨna fùtɨ̂n. Wo yina ndùku mô Klistù. 5Yènfù ndùku nê nâbi ni, saŋle wi ha ghɨt a dona a ghɨna fùtɨ̂n, ghɨna gbê kpute yênà a lak yi sùsi.

6Gha mɨ ghɨ̂n mò chwena hi fo tobhînì ha ghàhnà na kə ghàhnà hi kôŋà gha be te ghɨna, 7ngumle mosòmù te ghɨna ghɨ le ndùku ngumle. Ghɨ nyak a ŋwàklù Fùyèn na, “Ghɨta tì ndokò a chyə̂ yə lò, fî nyu lò, a yi bàm atɨ̂n lôtì hì binâ, fo kokhînì ha mosòmù.” 8Ghàhnà kəta wi hi tè lye a chyənà su besu afa a ghɨna ghɨ le ndùku chyə, gha tɨni ni, ghɨna kpu kam mbà njwòsù tât kə wu tuk wù mòk. 9Ghàhnà kəta wi hi tè mòmà Bâba te ghɨna ghɨ le ndùku mômà, gha tɨni ni, ywosu lumli ywiti ghɨna. 10Ghàhnà kəta wi nâbi hi tè dùmlè njâŋ te ghɨna ghɨ le ndùku njaŋa, gha tɨni ni, anjèl à Fùyèn ye a yì ndùku ywite ghɨta ya, ywiti ghɨna. 11Gha mɨ ghɨ̂n tì gan ha ghɨna ha chwena, ghɨ fî nyak lem hi fo tobhînì ha ghàhnà beka yu ti bakhâ shyəma mbyi mi.

12Yi ni chwùtè na nâbi nde we a wù kwâktè na yi chilò kəta hi tè tòknà, kə wù nê boŋà fen. 13Nâ mômhìnì yile wijə hi bèn ha ghàn teka yi timè ben ha wùt lè. Yènfù tòknèlò. Fu nè de wi na mômhìnì ben ha ghàn ta chyâ jyak ghana. Mômhìnì ki bên ha ghàn, ma Yènfù chwuti lum we ghàn mò hi tet atɨ̂n, ma mômhìnì tɨni tê ta ghak a ghàn.

14Kum ni, kə ghàn hi ngumle mosòmù a sun samsu jûŋsù. 15Mu jìsà ha ghàn te ghɨt ghe a ghɨ kəta tofu. Ghàn kwakti gha ye a mu jìsà nâ a ghàn a sù ngɨŋ. 16Ghàhnà ndokò wu lùk wu yəna hi kwàktè kpu Klistù, ghɨ jəm a to mu lùk hi nyû, yi chwùtè na luŋ mù Klistù ti ni ghàhnà chîntè nì wûn a kak à mòk. Ghàhnà jyàtè mwə̀ mù yə̂mù wu yu afa ghɨ yə, yi hi chwûtè na wun wu Klistù ti ni ghàhnà nì wûn ti chîntì a kak à mòk. 17Yi mô ni beka ghàhnà nè ghɨ hi dô kəbi yi dû, ghɨ chîntì ghɨ yə kə a ban à mòk, yi chwûtè na ghàhnà mò kə wun wù mòk. 18Ghàn yen lê ghɨt a Isalì! Ghɨna jyàtè a shyə ghe a ghɨ fo a tô a baŋ a yi fo ghɨ yə̂, yi hi chwûtè na ghɨna ti chîntì ghê Yènfù 19A ghàn ywo khɨlelò nâbi gha ye a mu jìsà agha? Mu jìsà hi fwo na mwə̀ mù yə̂mù me a ghɨ fo ha mosòmù mò nâ shyə ale ma, nâ mosò mù tɨ̂n mò shyə ale agha? 20Ngàŋ. Mu jìsà na, begànsù fo fotu ha yohnù wu be, ghɨna fo wi ha Yènfù. Mu kòŋà wi na ghàn à yohnù wu be hi yə chîntè. 21Ghàn wi hi tè nyû a Bâba bom fê nyô kəbi yohnù wu be a bom. Ghàn wi hi tè yə a Bâba a tô baŋ, fê yênà yə kəbi yohnù wu be a tô baŋ. 22Ghàhnà shìklè na lâ Bâba hi yafa ma? Ma ghàhnà kəta a jyak chyâ wun agha?

23Ghɨt ale jìsà na ghàhnà kətalò jyaka hi nì nâbi ghə, biyani a bu a gha à jɨ̀m a ghɨ gâmtè ghàhnà. Ghɨt ale jîsà na ghàhnà kətalò jyaka hi nì nâbi ghə, biyani a bu a gha à jɨ̀m a ghɨ jwôfà. 24Kə ghàn hi fêtà kə ha ngɨŋ sanisu, ghàn hi fêtà hi gàmtè ghɨt ale.

25Ghàn hi kuta nâbi yìni nki yi nyâmì ye a ghɨ bəkle a wu wən. Ghàn shihi kût, kə ghàn hi kante gha kum nyàm àtɨ̂n, lêmà a gha a ghàn a yi kwâktì. 26Ŋwàklù Fùyèn jis na, “Chyə ghɨ̂n mò ni, a kəta Bâba, nâbi nì ghə ghe a ghɨ mô atɨ̂n.”

27Wùt we a wù baha mô teka wu bimi ha Klistù ki jîs na wò bê yə a yi a ndâ, wò yenlò, wò yə nâbi ghə ghe a ghɨ chyahe na wò yə. Wò shihi yə̂, kə wò de na gha yile hi fo ngək a wò yi kwàktì. 28Biyani wò ki shihi yə̂, wùt jis mihì ha wò na, “Ghɨ ti fo mwə̀ mù yə̂mù muna ha mosòmù,” kə wò fî yə kum yi gha ye a wò mò hi lèm a wùt we yi kwàktì a wù fòkte gha yina ha wò. 29Mu jìsà na wò fatè ki kwâktì wuni, a bu ya, beka kwàktì yi wùt lè kəta wi hi tàhì na kə mu ni te mu kòŋà. 30Mu shìki yə mwə̀ mù yə̂mù, fo àyòŋnà ha Yènfù, ma ghɨ nê hi kəta hi tè ngane mu kum shyə ghe a mu yə, a mô ni mu yə, fo àyòŋnà. 31Yi ni chwùtè na, ghàn hi yə nâbi ghə makə ghàn nyo yi nyû, makə ghàn nè nâbi ghə, ghàn hi nê kə hi tè fo yi kokhî ha Yènfù. 32Kə ghàn hi chyə a wu lum hi nì na ghɨt a Jûs makə ghɨt a Gɨlìs makə ghɨt a Fùyènà ghɨ bimena lyi a be. 33Ghàn hi nê kə te mu mòmhè hi tè nì na ghɨt à jɨ̀m hi saŋlê, nâbi ghə te mu nè. Mu khɨŋa wijə kə jùŋ à mì yi ngɨŋ, mu khɨŋa jùŋ ha dùdû à ghɨ̂t shyəma Yènfù bonhi ghɨna.

Currently Selected:

1 Kòlitiyàns 10: bmv

Highlight

Copy

Compare