1 Kòlitiyàns 2

Tum kum Klistù a kàkfùtàfù

1À ndùku mô te mu bèna hi yen a ghàn a wana noma, hi fòktì gha ye a yi mô hamok kum Yènfù, mu hì jîsà wi jîs yi fomani, jîsà wi nâbi te wùt à ŋwàklù. 2Mu ndùku mô ma mu ti lem na mu fè khə wi gha yile, a bu kə hi tè jìs kum Jisòs Klistù, nì kpu yi wuni a tô kàkfùtàfù. 3Mu ndùku mô ghàhnà ghɨ̂n, wun wu mu botê, chiŋtê, fànà nâ haŋaŋ. 4Mu ndùku jîsà fê fôktè tum yì jùŋ bu nì tofu ma wu lo ha wùt, à ndùku mô tof hi nì na wùt bimi gha, biyani mu ndùku fôktè, yi chwûtè jyaka Yohnà Yulena. 5Mu jìsà ni hi nì na kə bimî yani hi yikte a ghɨta wu tof biyani na ghàn hi yikte kə jyak a Fùyènà.

Tof wu Fùyènù

6Nâbi te mu jìsà gha mɨ ghɨ̂n à jɨ̀m ni, ghàh yike a gha nì tofu ha ghɨt ghe a ghɨ ti ghəkna a ghɨna yi bimî. Tof wu tɨnu wijə tof wu mbyi makə tof wu ghɨt ghe a ghɨ saka mbyî yîn, a mô a ghɨt hi bè chyà mì. 7Tof ye ghàh jìsà à mò tof yi leteni wu Fùyènù, ma ghɨ ti let ha ghɨta. Yènfù tì lem shyəma wù fati mbyî yin na, tof wu tɨnu bè nêlò ma ghàhnà hi boŋa yule kəbi te Klistù. 8Nâ wùt sakana wù mòk a mbyî afân khə wi tof mu wûn. À ndùku mô na ghɨna hi khə, ma ghɨna tà tì banti jə Bâba we a wù kəta kokhînì. 9Ghàh yike kə te ghɨ nyaka a ŋwàklù Fùyèn na:

“Wùt tà timi yen jə̂,

teka wùt timi yû,

wùt tà timi kwâktì kəbi yi kwâktì gha ye

a Yènfù bakte lema ha ghɨt ghe a ghɨ kôŋà wûn.”

10Biyani ma Yènfù ti ni Yohnà wuna chwûtè banhi gha a letena wuna ha ghàhnà. Yohnà Fùyènà yena kə gha à jɨ̀m, yena nâbi ghə ghe Yènfù lèta. 11À mò kə yohnà ghe a ghɨ mô wùt wù wùn a ghɨ khə mihè wùt àtɨ̂n. Yi ni mò kəbi yi ghəl te wùt wi hi tè khə gha ye a yi mô a Yènfù yi kwàktì, a bu kə Yohnà wuna. 12Ghàhnà tà fyi jə yohnà ma ghɨ lo a mbyî, ghàhnà bɨlì fyi Yohnà ghe a ghɨ lo ha Yènfù shyəma ghàhnà hi khə mwə̀ me a fu fo ha ghàhnà. 13Yi ni mò na ghàh shihi yikî, ghàh hi yike wi gha nì tofu ma wu lo ha ghɨta. Ghàh yike gha a chwûtè Yohnà Fùyènà. Ghàh yike banhi gha yòhnà ha ghɨt ghe a ghɨna kəta Yohnà mɨ ghɨ̂n. 14Wùt we a wù kəta wi Yohnà Yulena wi hi fye mwə̀ me a Yohnà Fùyènà fo, beka à mò mwə̀ mù ngwo mù ha wûn. Wù wi hi tè khə mwə̀ munâ beka à mò hi nè kə Yohnà Yulena na wù hi khə. 15Wùt we a wù kəta Yohnà Yulena yen a khɨle lò kə mwə̀ mù jɨ̀m, biyani ma wùt lè wi hi yen a khɨle yi gha kum wûn. 16Yi mô kə te ghɨ tì nyàka a ŋwàklù Fùyèn na:

“Wùt khə wi gha ye a Bâba kwàktè

hi tobhi wûn.”

Biyani ghàhnà kəta kwâktì yi Klistù.

Currently Selected:

1 Kòlitiyàns 2: bmv

Highlight

Copy

Compare