1 Kòlitiyàns 1

Toŋtînì

1À nyak mu Bôl ŋwàklù yìna. À chwok Fùyèn mu kə nâ te fu kôŋà na mu hi mô wut wu tum ha Klistù Jisòs. Mu nyak ŋwàklù mi yin ghàh à wâ nè ghàhnà Sòstenìs.

2Mu nyak ŋwàklù yìna ha nôn à ghɨt a bimena a Fùyènà ghe a ghɨ mô a yi tèk yi Kolèn, a ghe Yènfù chwoka, ni na ghɨna hi yulê, ha ghɨt a wuna tohne a Klistù Jisòs. Mu nyak ha ghàn, fî nyak kəbi ha ghɨt à jɨ̀m nâbi afa te ghɨna mò, toŋte yi yet yi Bâba ghàhnà Jisòs Klistù. Wù mô Bâba ha ghɨna, fê mô Bâba ghàhnà.

3Yènfù, a Bì ha ghàhnà, ghê Bâba Jisòs Klistù chwuti təm a jûŋà ha ghàn, ma wù fo yutìnì ha ghàn.

Bôl fo àyòŋnà ha Yènfù kum ghɨt a bimena a Kolèn

4Mu fo àyòŋnà ha Yènfù kə yu mù jɨ̀m kum ghàn, njwo təm a jûŋà ghe a fu chwute ha ghàn tohne a Klistù Jisòs. 5Klistù ti ni na ghàn hi kəta mwə̀ mù jùŋ kə mù jɨ̀m, fate khə hi fòktè tum à Fùyèn, fê kəta tof tù jɨ̀m. 6Gha ye a ghàn ywo kum Klistù ti khɨti ghaŋtu hì ta kə ni a ghàn a fùtɨ̂n. 7Yi ti ni na ghàn hi gha wi nâbi yìni fo a Yohnà Fùyènà fo, shyəma ghàn hi yute na Bâba ghàhnà Jisòs Klistù kahà ben. 8Wu nê na ghàn hi kəta jyaka hi tàn a gòkhi shyəma wùt bê tê ngane jə̀ ghàn wu tuk afa a Bâba ghàhnà Jisòs Klistù kaha bena atɨ̂n. 9Yènfù chwùnè nâbi ghə, nê kə yâ. A mô wûn a wù toŋa ghàn na ghàn hi mô ghàn à Wâ wûn amok, a Bâba ghàhnà Jisòs Klistù.

Jyàhènà atɨ̂n à ndâ à Fùyèn

10Mu chyate ghàn a wana noma a Bâba ghàhnà Jisòs Klistù yi yet na, ghàn hi mô kə jwo yì mòk a gha afa a ghɨ jîsà shyəma jyàhènà hi bu a ghàn a fùtɨ̂n. Ghàn kəta hi tè bɨlà mò kə à shyə̀ à mòk, kəta kə kwâktì yì mòk, fê ke gha kə wu lum wù mòk. 11Mu jìsà ni a wana noma beka ghɨt ale a Kɨ̀lowè a ndâ ti fôktì ha mu na njaŋi làwû a ghàn a fùtɨ̂n. 12Gha ye a mu jìsà ni mò na nâbi nde a ghàn a fùtɨ̂n hì jîsà kə hanɨ̂ŋ. Ghɨt ale jîsà na, ghɨna mò ghɨt a Bôl; ghɨ le jîsà na, ghɨna mò ghɨt a Àbolòs, ghɨ le jîsà na, ghɨna mò ghɨt a Sefàs; ghɨ le jîsà na, ghɨna mò ghɨt a Klistù.#1.12 Sefàs wuna ndùku mô kəbi wùt we ghɨ ndùku toŋte na Bità. 13A ni mò na ghɨ jyati lô Klistù ma? À mò Bôl a ghɨ tì bante a ghàn wu lùk ma? Ghɨ tì fo mòlû ha ghàn a Bôl yi yet ma? 14Mu fo àyòŋnà ha Yènfù na mu tà tì fo jə mòlû ha wùt ha ghàn, a bu kə ha Kɨ̀lisibùs ghê Gayùs. 15Yi ni chwùtè na wùt ha ghàn wi hi tè jìs na ghɨ tì fo mòlû ha yi a mu yi yet. 16Mu tì boŋ fo kəbi mòlû ha ghɨt a Sɨ̀tèfanàs a yi sah yi nda. Mu baha fè kwâktè khɨle wi wùt wùlè te mu fo mòlû ha wûn a bu kə ha ghɨt mɨ ghɨ̂n. 17Klistù tà tì tum jə mu na mu bê hi fo mòlû ha ghɨta. Wù tì tum na mu bê hi fôktè tum yì jùŋ, fôktè wi nì tof yi ghɨ̂tì. Mu hì fôktè ni, ma kpû yi wuni a kàkfùtàfù hi chwûtè wi jyak ghe a ghɨ kəta.

Klistù mò a jyak nì tof wu Fùyènù

18Ghàhnà khə na tum à yì kpû yì Klistù a kàkfùtàfù mò yi gha yi ngwoni ha ghɨt ghe a ghɨ ləhà yênà, biyani ha ghàhnà ghe a Klistù bònhe, yi chwûtè jyak a Fùyènà. 19Yi mô kə yi ghəl te ghɨ nyaka a ŋwàklù Fùyèn na:

“Mu nè bobhelò gha ghe a ghɨt a tofana lyè na à mò gha tofana,

ma mu ni ma ghɨt ghe a ghɨ khə gha, hi fê khə wi nâ gha yile.”

20Wùt wù tofana lâ? Chichà yi sak lâ? Nâ wùt we a wù khə hi gùfnà gha a mbye afân lan lâ? Ba Yènfù ti nî tof yi ghɨ̂tì a mbyî ti kahi hì mô kə à ngwò? 21Yènfù ti yen kə nâ nì tof wu wunu na wùt bè khɨle wi wûn nì tof wu wunu wu ngɨŋu. Fu ti bɨlì lem na fu bè bônhè ghɨt ghe a ghɨ ywo tum ye a ghàh fòktè ghɨ bimi lò nâbi te ghɨt ale jìsà na à mò ngwòna yi gha. 22Ghɨt a Jûs khɨŋa kə chwena su kanasu, ghɨt a Gɨlìs khɨŋa hi tè kəta yi tof, 23biyani ghàh bɨlà fôktè kə yi gha kum Klistù te ghɨ tì bante. Gha mi yin yafa ghɨt a Jûs, a mô yi gha yi ngwoni ha tumu. 24Biyani ha ghɨt ghe a Yènfù chwokte, makə à mò ghɨt a Jûs makə à mò wu tûm, ghɨna khə na Yènfù chwùtè jyak a wuna nì tof wu wunu tohne a Klistù. 25Gha ye a yi kə̂kà te gha ngwoni ha ghɨta kum Yènfù chyàlò gha tofana ghɨ̂tì, ye a yi chwûtè na Yènfù kəta wi jyaka, kəta a jyak ghɨ chyâ jyak a ghɨ̂tà.

26Wana noma, ghàn kahà kwakti te ghàn ndùku mô shyəma Yènfù toŋa ghàn. Ghàn ki ke a ghàn a fùtɨ̂n, ma ghàn yen na ghɨt ghe a ghɨta ndùku lyê ha a ghɨt a tofana ndùku dô wi, ghê a ghɨ ndùku yena na à mò ghɨt a jyaka dô wi, ghe a ghɨ yena na ghɨ fwo a sah a nda a ta dô wi. 27Biyani Yènfù chwok gha ghe a ghɨt a mbye ndùku yena na à mò a gha ngwona ni na ghɨt a tofana wumi, wù fî chwok gha ghe a ghɨta yena na à mò gha a bota, ni na ghɨt a jyaka wumi. 28Yènfù chwok ghɨt a bota ghe a ghɨ lyê wi ghɨna a shyə̀ ale, fî chwokti mwə̀ me a ghɨta yena na mù wijə yi gha hi bobhi me a ghɨ yena na à mò kàntè mwə̀, 29shyəma wùt hi kəta wi gha hi ghaŋhe wu wun atɨ̂n a Yènfù ashyə̂. 30Biyani a nê Yènfù na ghàn hi chyə̂ kum Klistù Jisòs. Fu ti ni na wù hi mô tof wu ghàhnà, ni na ghàhnà hi mô chilichili tohne a wûn, fi ni na ghàhnà hi yulê, yun tu wu ghàhnà. 31A ni gha ye a yi mô kə yi ghəl te ghɨ tì nyàka a ŋwàklù Fùyèn na, “À hì jala nâbi nde, wu hi jala kə kum gha ye a Bâba ne.”

Currently Selected:

1 Kòlitiyàns 1: bmv

Highlight

Copy

Compare