1 Kòlitiyàns 3

Ghɨt a fetana a Fùyènà

1Mu wi hi tè jìs ha ghàn a wana noma te mu jìsà ha ghɨt ghe a ghɨ kəta Yohnà Yulena. Mu jìsà ha ghàn kə te mu jìsà ha ghɨt a mbye, a mwəlà a yi bimî ha Klistù. 2Gha ye a mu tì yike ha ghàn yi mô kə ni te yi ghə̂n ye ghɨ fo ha mwəlà mù bot, a bu mwə̀ mù yə̂mù mù tâ beka ghàn ndùku baha mô teka ghàn ləmà kpen. Nâ chîn, ghàn baha mô teka ghàn ləmà kpen. 3Ghàn baha chyə kə te ghɨt a mbye. Ghàn hi khə na ghə̀k nì njaŋi shìki tè mò a ghàn a fùtɨ̂n, ghàn nê gha ghe ghɨt a mbye nè, fê chyə kə te ghɨna, ya mò na ghàn nè kəta ghɨt a mbye. 4À mò wu yu afa wùt wù mòk jìsà na, “Mu jùmtè Bôl,” wùlè jîsà na, “Mu jùmtè Àbolòs,” yi hi chwûtè na ghàn baha chìnà mô kə te ghɨt a mbye.

5Nâ biyani, Àbolòs mò nde, Bôl mô nde? Hi nì na ghàn hi njaŋa? Ba à mò kə ghɨt a fetana te Yènfù fo ha ghàn na ghɨna hi fôktè tum yì jùŋ ma ghàn yu ma ghɨ bimi. Nâbi nde nè kə fêt ye a Bâba fo na wù hi nê. 6Mu yome ngwìk a ghàn a təm, Àbolòs sûhà mòlû yi sah àtɨ̂n, biyani a nê Fùyèn na yi ləma. 7Yi mô na wùt we a wù yome nì wùt we a wù sùhà mòlû kpene wi yi gha yile, à kpene kə Yènfù te fu nê yi ləmnê. 8Wùt we a wù yome nì wùt we a wù sùhà mòlû mò kə yi ghəl, nâbi nde mô hi bè khɨte maktu wunu kə te wù chehì fêtà. 9Ghàh chìntè fêtà kə ha Yènfù.

Ghàn mô a fûk a Fùyènà, fê mô ndâ Fùyèn. 10Mu ti lyi fo ye a Yènfù fo ha mu lem a chyə a nda te wut we wù fate khə ba, ghɨt ale hi ba a tô àtɨ̂n. Nâbi nde hi tôknè wu lum afa wù ba atɨ̂n. 11Yènfù hì mô ma fu ti lem Jisòs Klistù na à mò kə a chyə a nda ghe a ghɨ mô, wùt bu hi fè lèm chyə nda ale. 12Ghɨta ba a tô chyə nda mɨ ghɨ̂n. Ghɨt ale ba nì gûl, ghɨ le nì silfà, ghɨ le ba nì te jûŋà, ghɨ le ba nì kàkû, ghɨ le ba nì wunu. 13Ghɨ bè chwùtè banhelò nâbi fet yi nde a ndan. À bè hi mô mu tuk shyəma Klistù kahà ben atɨ̂n, ma ghɨ mom nâbi fêt yi nde nì wusu, ma wù chwuti nâbi yìni nki fèt ye a wùt chehì fêtà. 14Yènfù bè folò maktu nâbi ha nde we a ghɨ moma fêt yi wuni nì wusu, yi faŋ hi fimî. 15Ghɨ ki môm nâbi fêt yi nde, yi fimî, ma ghɨ tê fo jə̀ maktunu ha wûn ma wù bon biyani wù bon kə te wùt te wù nyɨŋa tohne a wu wùs.

16Ba ghàn khəlò na ghàn mò ndâ Fùyèn, Yohnà Fùyènà chyə a ghàn a fùtɨ̂n agha? 17Wùt ki bobhi ndâ Fùyèn, ma Yènfù boŋà bobhi wûn beka ndâ Fùyèn yulelò, nâbi nde a ghàn a fùtɨ̂n mô a ndâ Fùyèn mi yê.

18Kə wùt lehi ngɨŋ à wûn. Wùt shìki mô a ghàn a fùtɨ̂n kwâktè na yi tofalò wu lum afa a ghɨt a mbye afân ke atɨ̂n, wu bɨlì kahi ha ngwò shyəma wù khɨti kàntè yì tof. 19Wù kəta hi nì ni beka tof ye a ghɨt a mbye ghɨ̂n kəta mò kə nâ a ngwò ha Yènfù. Ghɨ ti nyak a ŋwàklù Fùyèn na, “Yènfù tama kwo ghɨt a tofana kə ghɨna yi tof.” 20Ghɨ ti fî nyak kəbi na, “Bâba khəlò na kwâktì ghɨt a tofana fètà wi gha yile.” 21Kum ni, kə wùt hi ghaŋhe wunu jîsà na yi mò wût, njwo Yènfù ti fo kə mwə̀ mù jɨ̀m ha ghàn. 22Yi mô na, makə à mò Bôl makə à mò Àbolòs makə à mò nâbi Sefàs makə à mò mbyî yìna, makə à mò chyəna, makə à mò yi kpû, makə à mò yu wun chîn, makə yu we a wu bè bênà, mwə̀ mu muna nâ mù jɨ̀m chìntè kəta kə ghàn. 23Yi mô ni a kəta Klistù ghàn, a kəta Fùyèn Klistù.

Currently Selected:

1 Kòlitiyàns 3: bmv

Highlight

Copy

Compare