Апокалипсис 7
7
7-НЭ ЕДЗЫГЪУЭ
Тхьэм и мыхъурыр мелыӀычхэм цӀыху мин плӀыщӀрэ плӀым зэрытрагъэуар
1Абы и ужькӀэ щӀылъэм и къуапиплӀым мелыӀычиплӀ тету слъэгъуащ. Жьыр щӀыми хыми къыщемыпщэн, жыгми къемыуэн щхьэкӀэ, щӀылъэм и къуапиплӀым къикӀ жьыбгъэхэм пэувырт ахэр. 2НэгъуэщӀ мелыӀыч гуэр, гъащӀэ къыздикӀ Тхьэм и мыхъурыр иӀыгъыу, къуэкӀыпӀэмкӀэ къикӀыу слъэгъуащ итӀанэ. Я ягъэ щӀымрэ хымрэ ирагъэкӀыну хуитыныгъэ зиӀэ мелыӀычиплӀым макъышхуэкӀэ яжриӀащ: 3«Ди Тхьэм хуэлажьэ цӀыхухэм я натӀэм мыхъурыр тедмыгъэуауэ, щӀыми, хыми, жыгхэми фи ягъэ евмыгъэкӀ!» 4МелыӀычхэм мыхъурыр зытрагъэуа цӀыхухэм я бжыгъэр зэхэсхащ итӀанэ: израил и унагъуэ лъэпкъ псоми ящыщу мелыӀычхэм мыхъурыр зытрагъэуа цӀыху минищэрэ плӀыщӀрэ плӀырэ хъурт.
5Иудэ унагъуэ лъэпкъым щыщ цӀыху мин пщыкӀутӀым мыхъурыр трагъэуащ; Реувен унагъуэ лъэпкъым щыщ цӀыху мин пщыкӀутӀым мыхъурыр трагъэуащ; Гад унагъуэ лъэпкъым щыщ цӀыху мин пщыкӀутӀым мыхъурыр трагъэуащ; 6Ашер унагъуэ лъэпкъым щыщ цӀыху мин пщыкӀутӀым мыхъурыр трагъэуащ; Нафталый унагъуэ лъэпкъым щыщ цӀыху мин пщыкӀутӀым мыхъурыр трагъэуащ; Менашэ унагъуэ лъэпкъым щыщ цӀыху мин пщыкӀутӀым мыхъурыр трагъэуащ; 7Симеон унагъуэ лъэпкъым щыщ цӀыху мин пщыкӀутӀым мыхъурыр трагъэуащ; Левий унагъуэ лъэпкъым щыщ цӀыху мин пщыкӀутӀым мыхъурыр трагъэуащ; Иссашкар унагъуэ лъэпкъым щыщ цӀыху мин пщыкӀутӀым мыхъурыр трагъэуащ; 8Зевулон унагъуэ лъэпкъым щыщ цӀыху мин пщыкӀутӀым мыхъурыр трагъэуащ; Исуф унагъуэ лъэпкъым щыщ цӀыху мин пщыкӀутӀым мыхъурыр трагъэуащ; Биниамин унагъуэ лъэпкъым щыщ цӀыху мин пщыкӀутӀым мыхъурыр трагъэуащ.
Бжыгъэ зимыӀэ цӀыху куэдым Тхьэр зэрагъэлъапӀэр
9Абы и ужькӀэ сыщыплъэм, лъэпкъ псоми, унагъуэ лъэпкъ псоми, къэрал псоми, бзэ псоми ящыщу пхуэмыбжыну цӀыху куэдыкӀей слъэгъуащ. Джанэ кӀыхь хужьхэр ящыгъыу, хъурмэ жыгым и къудамэхэр яӀыгъыу, тахътэмрэ Щынэмрэ я пащхьэм итт ахэр.
10МакъышхуэкӀэ къэджащ ахэр:
«Ди Тхьэуэ тахътэм тесымрэ
Щынэмрэщ дымыкӀуэду дыкъезыгъэлыр».
11Тахътэм, тхьэмадэ нэхъыжьхэм, псэущхьиплӀым къеувэкӀауэ щытт мелыӀыч псори. Тахътэм и пащхьэм нэкӀукӀэ зыщрадзыхри, Тхьэр ягъэлъапӀэурэ, абыхэм жаӀащ:
12«Ӏэмин!#7:12 Ӏэмин – еплъ 1:7. ФӀыщӀэшхуэр, щӀыхьышхуэр,
акъылыфӀэгъуэшхуэр, лъытэныгъэшхуэр,
лъэкӀыныгъэшхуэр, къаруушхуэр игъащӀэкӀэ
зейр ди Тхьэрщ. Ӏэмин!»
13Тхьэмадэ нэхъыжьхэм ящыщ гуэр къызэупщӀащ итӀанэ:
– Мы джанэ хужь кӀыхьхэр зыщыгъхэр хэт икӀи дэнэ къикӀа?
14– Тхьэмадэ, ахэр уэ уощӀэ, – жысӀащ сэ.
– Мыхэращ гузэвэгъуэшхуэм къыхэкӀар, – къызжиӀащ абы. – Я джанэ кӀыхьхэр Щынэм илъкӀэ ягъэкъэбзэжри, хужьыбзэу яжьыщӀыжащ.
15Абы щхьэкӀэ Тхьэм и тахътэм и пащхьэм
итщ икӀи жэщи махуи Тхьэм и унэшхуэм щӀэту
Тхьэр ягъэлъапӀэ.
Тахътэм тесри ядэпсэунущ.
16ИгъащӀэкӀэ мэжэлӀэжынукъым,
псыи хуэлӀэжынукъым.
Дыгъэри хуабагъэшхуэри
абыхэм къегуэуэжынукъым.
17Сыт щхьэкӀэ жыпӀэмэ тахътэм и кум
тес Щынэр абыхэм Ӏэхъуэ яхуэхъунущ;
икӀи гъащӀэ къэзыт псынащхьэхэм
я деж ахэр ишэнущ.
Абыхэм я нэхэм
нэпс псори ящӀилъэщӀыкӀыжынущ.
Currently Selected:
Апокалипсис 7: KbdNTGP2017
Highlight
Copy
Compare
Share
Want to have your highlights saved across all your devices? Sign up or sign in
© Библиер зэдзэкӀыным елжь Институт, 1993, 2007, 2011, 2017
