Апокалипсис 6

6-НЭ ЕДЗЫГЪУЭ

Мыхъурхэр

1Щынэм мыхъуриблым ящыщу япэрейр зэрытричыр слъэгъуащ итӀанэ. ПсэущхьиплӀым ящыщу зым уафэгъуагъуэм и макъым хуэдэ макъкӀэ «КъакӀуэ!» жиӀэу зэхэсхащ абдежым. 2Сыщыплъэм, шы пщӀэгъуалэ къэслъэгъуащ итӀанэ. Шым тесым шабзэ иӀыгът, мелыӀыч гуэрми абы таж иритащ. ТекӀуэныгъэр къэзыхьым хуэдэу, текӀуэныгъэр къихьыну ежьащ.

3ЕтӀуанэ мыхъурыр щынэм щытричым, етӀуанэ псэущхьэми «КъакӀуэ, еплъ!» жиӀэу зэхэсхащ. 4НэгъуэщӀ шы гуэр, шы пцӀэгъуэплъ гуэр, къэхутащ абдежым. Абы тесым дунейм мамырыгъэр трихыну икӀи цӀыхухэр зэригъэукӀыну Тхьэм хуитыныгъэ къритащ. МелыӀыч гуэрми джатэшхуэ ӀэщӀилъхьащ абы.

5Ещанэ мыхъурыр Щынэм щытричым, ещанэ псэущхьэми, «КъакӀуэ, еплъ!» жиӀэу зэхэсхащ. Сыщыплъэм, шы къарэ къэслъэгъуащ. Абы тесым тэрэзэ иӀыгът. 6ПсэущхьиплӀым яку макъ гуэр къыдэӀукӀри мыпхуэдэу жиӀэу зэхэсхащ: «Фалъищым илъ гуэдзыр зы махуапщӀэ мэхъу, фалъибгъум илъ хьэри зы махуапщӀэ мэхъу. Дагъэми жызумми уи ягъэ йомыгъэкӀ».

7Абы и ужькӀэ, еплӀанэ мыхъурыр Щынэм щытричым, еплӀанэ псэущхьэм и макъым «КъакӀуэ, еплъ!» жиӀэу зэхэсхащ. 8Сыщыплъэм, шыгъуэ къэслъэгъуащ. Абы тесым и цӀэр ЛӀэныгъэт. Хьэдрыхэ абы кӀэлъыкӀуэрт. Абыхэм джатэмкӀи, гъаблэмкӀи, уз зэрыцӀалэхэмкӀи, щӀылъэм и хьэкӀэкхъуэкӀэхэм я дэӀэпыкъуныгъэкӀи цӀыхухэр ягъэлӀэну щӀылъэм и плӀанэм тепщэныгъэ хуаӀэ хъуащ.

9Абы и ужькӀэ, етхуанэ мыхъурыр Щынэм щытричым, цӀыхуу адрей цӀыхухэр Тхьэм и псалъэхэм зэрыригъэдэӀуамрэ а псалъэхэм щыхьэтыгъэ зэрахуэхъуахэмрэ щхьэкӀэ яукӀахэм я псэхэр къурмэнщӀыпӀэм и щӀагъым щыслъэгъуащ. 10Ахэр макъышхуэкӀэ къэджащ: «Уэ Зиусхьэн лъапӀэ икӀи щыпкъагъэ зиӀэ Зиусхьэн, ди лъыр зыгъэжауэ дунейм тет цӀыхухэм я хьэкумыр щатепщӀыхьынум икӀи яхуэфащэр щебгъэпшыныжынум сыт пщӀондэ дыпэбгъэплъэну?» 11МелыӀыч гуэрым абыхэм ящыщ дэтхэнэми джанэ кӀыхь къритри, зытэлай загъэпсэхуну яжриӀащ, дунейм и цӀыхухэм ахэр зэраукӀам хуэдэу, абыхэм я гъусэу яукӀыну цӀыхуу Тхьэм хуэлажьэхэмрэ адрей къуэш яукӀынухэмрэ я бжыгъэр ирикъуху.

12ИтӀанэ Щынэм еханэ мыхъурыр зэрытричыр слъэгъуащ. ЩӀылъэр хуабжьу хъеящ абы щыгъуэ, дыгъэри бжэныцым къыхэщӀыкӀа щэкӀ фӀыцӀэм хуэдэ кӀыфӀ хъуащ, мазэри лъым хуэдэ плъыжь хъуащ. 13Уафэм ис вагъуэхэри щӀылъэм къехуэхащ, жьышхуэ къыщепщэкӀэ, ахъуо жыгым пытхэр зэрыпылъэлъым хуэдэу. 14ТхылъымпӀэ шыхьам хуэдэу уафэм зишыхьри, бзэхащ; бгы псори хытӀыгу псори я пӀэм икӀащ.

15Дунейм и пащтыхьхэми, тепщэныгъэ зиӀэхэми, дзэпщхэми, бейхэми, къаруушхуэ зиӀэхэми, пщылӀхэми, щхьэхуитхэми бгъуэнщӀагъхэмрэ къурш ауз куухэмрэ зыщагъэпщкӀуащ. 16Абыхэм бгыхэмрэ къыр дзакӀэхэмрэ жраӀащ: «ЗыкъыттефӀуби, тахътэм тесым девмыгъэлъагъу, Щынэм и губжьми дыщыфхъумэ. 17Сыт щхьэкӀэ жыпӀэмэ ахэр щыгубжь махуэшхуэр къэсащ икӀи абыхэм япэувын хэт зылъэкӀынур?»

Currently Selected:

Апокалипсис 6: KbdNTGP2017

Highlight

Copy

Compare