Апокалипсис 11

11-НЭ ЕДЗЫГЪУЭ

ЩыхьэтитӀыр

1МелыӀыч гуэрым къамыл баш, пщалъэм хуэдэу, къызитащ итӀанэ. «КӀуэ, Тхьэм и унэшхуэмрэ къурмэнщӀыпӀэмрэ къэпщ икӀи абы Тхьэр щызыгъэлъапӀэхэр зыхуэдизыр къызэгъащӀэ», къызжиӀащ. 2«Ауэ Тхьэм и унэшхуэм и щӀыбкӀэ щыӀэ пщӀантӀэр къыупщыну упымылъ, Тхьэм а пщӀантӀэр хамэ лъэпкъхэм къахуигъэнащи. Къалэ лъапӀэр мазэ плӀыщӀрэ тӀукӀэ#11:2 мазэ плӀыщӀрэ тӀурэ – ар махуэ минрэ щитӀрэ хыщӀрэ е илъэсищрэ ныкъуэрэ мэхъу. А зэманым фӀэщхъуныгъэ зиӀэхэм гугъуехьышхуэ яшэчурэ, Тхьэр зымыщӀэхэм ахэр кърахуэкӀынущ. къалэ лъапӀэр#11:2 къалэ лъапӀэр – Ерусалимщ. лъэгукӀэ яубэнущ абыхэм. 3Си щыхьэтитӀым лъэкӀыныгъэ естынущ икӀи абыхэм щыгъуэ щыгъынхэр ящыгъыу, я гум Тхьэм кърилъхьа псалъэу къэхъуну Ӏуэхугъуэхэм ятеухуахэм цӀыхухэр махуэ минрэ щитӀрэ тӀощӀкӀэ ирагъэдэӀуэнущ абыхэм».

4Мы щыхьэтитӀыр щӀылъэм и Зиусхьэным и пащхьэм ит зейтун жыгитӀымрэ#11:4 зейтун жыгыр – «маслинэ» жыхуаӀэр аращ. уэздыгъэ тегъэувапӀитӀымрэщ. 5Зыгуэрым и ягъэ а щыхьэтитӀым яригъэкӀыну хуеймэ, абыхэм я жьэм мафӀэ къыжьэдэкӀыурэ, я бийхэр егъэкӀуэд. Абыхэм зи ягъэ езыгъэкӀыну хэтыр аращ зэрылӀэн хуейр. 6А щыхьэтитӀым уафэр ягъэбыдэжыну тепщэныгъэ яӀэщ, Тхьэм абыхэм я гум кърилъхьа псалъэхэм цӀыхухэр щрагъэдаӀуэ махуэхэм уэшх къемышхын щхьэкӀэ; псыр лъы ягъэхъун щхьэкӀэ псыхэми тепщэныгъэ хуаӀэщ икӀи щӀылъэм сыт хуэдэ гугъуехь ирагъэшэчыну дапщэщ хуейми яхузэфӀэкӀынущ.

7Абыхэм я щыхьэтыгъэр щаухкӀэ, щӀылъэм и кууупӀэу щӀэ зимыӀэм къыщӀэкӀ хьэщхьэвылъэр#11:7 щӀылъэм и кууупӀэу щӀэ зимыӀэм къыщӀэкӀ хьэщхьэвылъэр – еплъ 13:1-7. абыхэм къебэнынущ икӀи къатекӀуэнурэ къиукӀынущ. 8Абыхэм я хьэдэхэр къалэшхуэу#11:8 къалэшхуэр – Ерусалимщ. цӀыхухэм ди Зиусхьэныр жорым щраӀулӀам и уэрамым дэлъынущ. А къалэшхуэм щхьэкӀэ Содом#11:8 Содом – еплъ Ешайа бегъымбарым и тхылъым 1:10. е Мысыр жаӀэ, нэгъуэщӀ мыхьэнэ кърагъэкӀыурэ. 9Къэрал псоми, унагъуэ лъэпкъ псоми, бзэ псоми икӀи лъэпкъ псоми ящыщ цӀыху куэд махуищрэ ныкъуэкӀэ а хьэдэхэм еплъынущ, ауэ щӀалъхьэжын ядэнукъым. 10А тӀур зэрылӀам щхьэкӀэ гуфӀэнущ икӀи тхъэжынущ дунейм тетхэр. Тыгъэхэри зэхурагъэхьынущ, а бегъымбаритӀым щӀылъэм тет цӀыхухэм гугъуехь ирагъэшэчу щытащи.

11Махуищрэ ныкъуэрэ дэкӀа нэужь, Тхьэм абыхэм гъащӀэм и псэр къахилъхьэжри, тӀури я лъэкӀэ къэувыжащ. Ахэр зылъэгъуа псори шынагъуэшхуэм хэхуащ. 12А бегъымбаритӀым#11:12 а бегъымбаритӀыр – щыхьэтитӀыр аращ. Еплъ 11:3. уафэм къиӀукӀ макъ гуэрым къажриӀэу зэхахащ итӀанэ: «Моуэ фыкъыдэкӀуей». Я бийхэр еплъурэ, ахэр уафэм дэкӀуеящ пщэм хэту.

13ЩӀыр ину хъеящ а сыхьэт дыдэм, къалэм и Ӏыхьэ пщӀанэри зэхэкъутащ. ЩӀыр щыхъейм, цӀыху минибл хэкӀуэдащ. МыкӀуэду къелахэри шынагъуэшхуэм хэхуащ икӀи уафэм щыӀэ Тхьэм щӀыхьышхуэ хуащӀащ.

14Апхуэдэу блэкӀащ етӀуанэ гъуэгу мыгъуэри. Ещанэ гъуэгу мыгъуэри къэкӀуэным куэд иӀэжкъым.

Ебланэ бжьамиишхуэр

15Ебланэ мелыӀычыр и бжьамиишхуэм епщащ итӀанэ. Уафэм макъышхуэхэр къиӀукӀащ абы щыгъуэ:

«Ди Зиусхьэнрэ езым и Мэссихьрэ

мы дунейм тепщэныгъэшхуэ хуаӀэ хъуащ.

Тхьэр арщ тепщэныгъэшхуэр игъащӀэкӀэ

зиӀэнур».

16Тхьэм и пащхьэм ит тахътэхэм тес тхьэмадэ нэхъыжьу цӀыху тӀощӀрэ плӀым нэкӀукӀэ зрадзыхыурэ, Тхьэр ягъэлъапӀэурэ, мыпхуэдэу жаӀащ:

17«Уэ, лъэкӀыныгъэшхуэ псори зиӀэ Зиусхьэн Тхьэуэ,

щыӀауэ, иджыри щыӀэм, щӀыхьышхуэр пхудощӀ,

сыту жыпӀэмэ уи лъэкӀыныгъэшхуэр къэпщтауэ,

тепщэныгъэшхуэр узэриӀэр къэбгъэлъэгъуащ.

18Хамэ лъэпкъхэр губжьащ, уэ уи губжьри

къэлъэгъуащ.

ЛӀахэм хьэкум щатепщӀыхьыну

зэманыр къэсащ иджы.

Уэ къыпхуэлажьэ бегъымбархэми,

уи цӀыху лъапӀэхэми, уи фӀэлӀыкӀ зи гум илъ

цӀыхухэм, – цӀыкӀуми, инми, – яхуэфащэ ӀыхьэфӀыр

щебгъэгъуэтыну зэманри къэсащ.

ЩӀылъэр зыгъэкӀуэд цӀыхухэр уэ щыбгъэкӀуэдыжыну

зэманри къэсащ».

19Тхьэм и унэшхуэу уафэм щыӀэр зэӀуха хъуащ абы и ужькӀэ, икӀи Тхьэм езымрэ и цӀыхухэмрэ яку дилъхьа зэгурыӀуэныгъэр къэзыгъэлъагъуэ пхъуантэри#11:19 зэгурыӀуэныгъэр къэзыгъэлъагъуэ пхъуантэр – а пхъуантэр Тхьэм и унэшхуэм щыщ я нэхъ Пэш ЛъапӀэм щӀэтт. Еплъ Пащтыхьхэм я хъыбархэр зэрыт япэ тхылъым (3-я Царств) 8:1-6. къэнэхуащ. Уафэр къэхъуэпскӀащ итӀанэ, макъышхуэхэри уафэгъуагъуэ макъышхуэхэри къэӀуащ, щӀыри хъеящ, уэшхуэхэри къехащ.

Currently Selected:

Апокалипсис 11: KbdNTGP2017

Highlight

Copy

Compare