Апокалипсис 12

12-НЭ ЕДЗЫГЪУЭ

ЦӀыхубзымрэ благъуэжьымрэ

1Нэщэнэ гъэщӀэгъуэныщэ уафэм къыщылъэгъуащ итӀанэ: ЦӀыхубз гуэр, дыгъэр фащэу щыгъыу, и лъакъуэхэр мазэм тету, и щхьэрыгъ тажым вагъуэ пщыкӀутӀыр тету, къэхутащ. 2ЦӀыхубзыр лъэщыджэт икӀи лъхугъэр къытелъэдауэ гугъуехьышхуэ ишэчти, кӀийрт. 3НэгъуэщӀ нэщэнэ гъэщӀэгъуэныщэ гуэр уафэм къыщылъэгъуащ итӀанэ: Благъуэжь абрагъуэ плъыжьу, щхьибл фӀэту, бжьакъуипщӀ тету къэлъэгъуащ. Дэтхэнэ зы щхьэми зы таж щхьэрыгът. 4Вагъуэхэм я Ӏыхьэ щанэр и кӀэмкӀэ уафэм къыщрилъэфажьэри, щӀылъэм къридзыхащ. Сабий пэплъэ цӀыхубзым и пащхьэм благъуэжьыр къиуващ, сабийр къызэрилъхуу иригъэлъэтэхын щхьэкӀэ. 5ЩӀалэ цӀыкӀу къилъхуащ. Абы щӀылъэм тет лъэпкъ псори гъущӀ башкӀэ игъэӀурыщӀэнущ. А сабийр Тхьэмрэ Тхьэм и тахътэмрэ я деж драхьеящ. 6ЦӀыхубзыр щӀэпхъуэжри, Тхьэм абы губгъуэ нэщӀым щыхуигъэхьэзыра увыӀэпӀэм щызэгъащ. Махуэ минрэ щитӀрэ хыщӀкӀэ щагъэшхэнущ ар абдежым.

7Уафэм зауэ къыщыхъеящ. Михаилрэ#12:7 Михаил – япэрей мелыӀычышхуэхэм ящыщщ. абы и мелыӀычхэмрэ благъуэжьым езэуащ, благъуэжьри абы и мелыӀычхэри абыхэм къапэуващ. 8Благъуэжьыр Михаил къыпэлъэщакъым, благъуэжьымрэ абы и мелыӀычхэмрэ уафэм щӀыпӀэ къащыхуэнэжакъым. 9Благъуэжь абрагъуэр щӀылъэм кърадзыхащ – иблису икӀи шейтӀану жыхуаӀэ блэжьу щӀылъэм тет цӀыху псори дэзыщэхыр аращ. Ари абы и мелыӀычхэри щӀылъэм кърадзыхащ.

10Уафэм макъ лъагэ гуэр къиӀукӀри, мыпхуэдэу жиӀэу зэхэсхащ итӀанэ:

«ДымыкӀуэду ди Тхьэм дыкъригъэлащ иджы.

Ди Тхьэм и лъэкӀыныгъэшхуэмрэ

и Тепщэныгъэшхуэмрэ къэлъэгъуащ иджы,

езы Тхьэм и Мэссихь и къаруушхуэри

къэлъэгъуащ.

Сыт щхьэкӀэ жыпӀэмэ ди къуэшхэр зыгъэмысэу,

Тхьэм и пащхьэм жэщи махуи ахэр щызыгъэкъуаншэр

щӀылъэм кърадзыхащ.

11Щынэм лъыуэ щӀэкӀамкӀи, Тхьэм и псалъэхэм

щыхьэт зэрахуэхъуамкӀи

ди къушхэр шейтӀаным текӀуащ.

ЛӀэныгъэм и гъунэгъу хъуами,

езыхэм я псэхэм щысхьакъым.

12Аращи, фэ, уафэхэри, фэ, уафэхэм щыпсэухэри, фыгуфӀэ!

Ауэ фэ, щӀыри хыри, гъуэгу мыгъуэ фытеуващ,

сыт щхьэкӀэ жыпӀэмэ иблисыр къыфхуехащ.

Зэману езым къыхуэнэжыр зэрымащӀэр ещӀэри,

и гум губжьышхуэ илъщ».

13Благъуэжьыр, щӀылъэм къызэрырадзыхар щилъагъум, щӀалэ цӀыкӀур къызыхуэхъуа цӀыхубзым и ужь ихьащ. 14МелыӀыч гуэрым бгъэ иным и дамитӀыр цӀыхубзым къритащ, блэжьым и пащхьэм икӀыу, Тхьэм губгъуэ нэщӀым абы щыхуигъэхьэзыра увыӀэпӀэм лъэтэн щхьэкӀэ. Абдежым илъэсищрэ ныкъуэкӀэ#12:14 илъэсищрэ ныкъуэрэ – махуэ минрэ щитӀрэ хыщӀрэ мэхъу. Еплъ 12:6. щагъэшхэнущ. 15ЦӀыхубзыр псым иригъэхьын щхьэкӀэ, псыдзэм хуэдэу, блэжьым и жьэм псыр къыжьэдиутхыкӀащ. 16Ауэ щӀыр цӀыхубзым дэӀэпыкъущ, и жьэр зэӀуихри, благъуэжьым и жьэм къыжьэдиутхыкӀа псышхуэр ирифащ. 17ЦӀыхубзым ину хуэгубжьри, цӀыхубзым къытехъукӀа нэгъуэщӀ и бынхэм – Тхьэм и унафэхэр зыгъэзащӀэхэмрэ Хьисэ Мэссихь щыхьэт хуэхъухэмрэ – езэуэну кӀуащ благъуэжьыр итӀанэ.

Currently Selected:

Апокалипсис 12: KbdNTGP2017

Highlight

Copy

Compare