Еврейхэм яхуэгъэза тхылъ 1

1-НЭ ЕДЗЫГЪУЭ

Тхьэр езым и Къуэм и жьэкӀэ къызэрыпсэлъар

1Пасэ зэманым Тхьэр бегъымбархэм я жьэкӀэ куэдрэ икӀи зэмылӀэужьыгъуэу ди адэжьхэм къепсалъэу щытащ. 2Ауэ мы зэманым, мы дунейм и иужьрей дыдэ махуэхэм, Тхьэр и Къуэм и жьэкӀэ дэ къыдэпсэлъащ. Тхьэм Ӏуэху псори и Къуэм и ӀыхьэфӀ хъуну игъэуващ, абыи дунейр къригъэгъэщӀащ. 3Тхьэм и щӀыхьышхуэм и нэхур и Къуэм къыбгъэдэкӀыу къыттопсэ; и Къуэм и щытыкӀэр Тхьэм и щытыкӀэм хуэдабзэщ, лъэкӀыныгъэшхуэ зиӀэ и псалъэмкӀэ щыӀэ псори щегъэӀэ; абы и Къуэм цӀыхухэм ягухэм гуэныхьхэр зэрыригъэкъэбзыкӀыжын гъуэгу къахуигъэпсащ, уафэми дэкӀуеижри, тепщэныгъэшхуэ псори зиӀэ Тхьэм и ижьырабгъумкӀэ бгъэдэтӀысхьащ. 4Тхьэм «си Къуэ» жиӀэу, абы къызэреджэ цӀэр мелыӀычхэм я цӀэм нэхърэ зэрынэхъ лъапӀэм хуэдэу, Тхьэм и Къуэр мелыӀычхэм я щхьэ ищӀащ.

Къуэ лъапӀэр мелыӀычхэм я щхьэщ

5Сыт щхьэкӀэ жыпӀэмэ Тхьэм мелыӀычхэм ящыщ гуэрым,

«Уэращ си Къуэр,

нобэ Адэ сыпхуэхъуащ»,

жриӀа?#1:5 Тхьэм жриӀа – еплъ Уэрэд ЛъапӀэхэм (Сабур) 2:7. Тхьэм мелыӀыч гуэрми теухуауэ

«Сэ Адэ сыхуэхъунущ,

езыри си Къуэ хъунущ»,

жиӀа?#1:5 жиӀа – еплъ Самуел бегъымбарым и хъыбар зэрыт етӀуанэ тхылъым (2-я Царств) 7:14.

6Езым къыхиха и Къуэ щӀасэр дунейм къыщытригъэхьэм, Тхьэм жиӀащ:#1:6 Тхьэм … жиӀащ – еплъ 5 Мусэ 32:43; Уэрэд ЛъапӀэхэм (Сабур) 96:7

«Тхьэм и мелыӀыч псоми ар ирегъэлъапӀэ».

7МелыӀычхэм теухуауэ Тхьэм мыпхуэдэу жиӀащ:#1:7 Тхьэм мыпхуэдэу жиӀащ – еплъ Уэрэд ЛъапӀэхэм (Сабур) 103:4.

«Тхьэм и мелыӀычхэр жьым хуэдэ ещӀ,

а ӀуэхутхьэбзащӀэхэри мафӀэ бзийхэм

хуэдэ ещӀ».

8И Къуэм теухуауэ Тхьэм мыпхуэдэу жиӀащ:#1:8-9 Тхьэм мыпхуэдэуи жиӀащ – еплъ Уэрэд ЛъапӀэхэм (Сабур) 44:7-8.

«Уэ, Тхьэ, уи тепщэныгъэшхуэ тахътэм

игъащӀэкӀэ утесынущ.

Уи тепщэныгъэшхуэм и башыр захуагъэрщ.

9Щыпкъагъэр фӀыуэ уолъагъу,

бзаджагъэр плъагъу хъуркъым.

Абы щхьэкӀэ Тхьэуэ уи Тхьэм уи гъусэхэм нэхърэ

гуфӀэгъуэм и дагъэр#1:9 гуфӀэгъуэм и дагъэр – а зэманым пащтыхь хъунум дагъэ лъапӀэ щахуэрт. уэ нэхъ къыпщихуащ».

10Тхьэм мыпхуэдэуи жиӀащ:#1:10-12 Тхьэм мыпхуэдэуи жиӀащ – еплъ Уэрэд ЛъапӀэхэм (Сабур) 101:26-27.

«Уэ, Зиусхьэн, щӀэдзапӀэм деж

щӀылъэм и лъабжьэхэр хэбгъэуващ,

уафэхэри уи ӀэщӀыгъэщ.

11Ахэр кӀуэдыжынущ, ауэ уэ умыкӀуэду

укъелынущ.

Щыгъыным хуэдэу ахэр жьы хъунущ.

12Щыгъыным хуэдэу, зэкӀуэцӀыпшыхьынущ,

икӀи зэхъуэкӀа хъунущ;

ауэ уэ узэрыщытым утету укъэнэжынущ,

уи илъэсхэми кӀэух яӀэнукъым».

13ИкӀи Тхьэм мелыӀычхэм ящыщу гуэрым,

«Уэ уи бийхэр лъэгущӀэтын пхуэсщӀыху,

си ижьырабгъумкӀэ къызбгъэдэтӀысхьэ»,

жриӀа?#1:13 Тхьэм … жриӀа – еплъ Уэрэд ЛъапӀэхэм (Сабур) 109:1.

14МелыӀычхэр Тхьэм хуэӀурыщӀэ псэуэ щытщ, мыкӀуэду Тхьэм къызэрыригъэлынур ӀыхьэфӀу къызылъысыну цӀыхухэм яхуэӀуэхутхьэбзэщӀэну ахэр Тхьэм къегъакӀуэ.

Currently Selected:

Еврейхэм яхуэгъэза тхылъ 1: KbdNTGP2017

Highlight

Copy

Compare