1 Мусэ 46
46
Екъуб Мысырым зэрыкӀуар
1Арати, Израил, езым иӀэ псори здрихьэжьэри, кӀуащ Бэр-Шэвэ, хуищӀащ къурмэн езым и адэ Исхьэкъ и Тхьэм. 2Тхьэр Израил жэщым къыхуэлъагъуэри, къыжриӀащ:
– Екъуб! Екъуб!
– Сымис сэ, – жиӀащ абы.
3– Сэрщ Тхьэр, уи адэм и Тхьэр, – жиӀащ Тхьэм. – Умышынэ Мысырым укӀуэн; абдежым уэ къыщыптезгъэхъукӀынущ лъэпкъ ин дыдэ. 4Сэ сыпщӀыгъуу сынэкӀуэнущ Мысырым; апхуэдэуи Сэ укъисшыжынущ абы. Исуф езым и ӀэкӀэ зэтрипӀэжынущ уи нэхэр.
5Екъуб къибгынащ Бэр-Шэвэ; ирашэжьащ Израил и къуэхэм Екъуб, езыхэм я адэр, я сабийхэри, я фызхэри, фирхьэуным къарита шыгухэмкӀэ ар здашэнум нагъэсын папщӀэ. 6Къащтащ абыхэм я Ӏэщри, Ханаан щӀыналъэм щызыӀэрагъэхьа мылъкури, Мысырми нэсащ, Екъуби езым къытехъукӀа бын псори абы и гъусэу. 7Езым и къуэхэри, и къуэрылъхухэри, ипхъухэри, и пхъурылъхухэри, езым къытехъукӀа псори здишащ абы Мысырым.
Екъуб и бынхэр
8Мис Екъуб и къуэхэу Мысырым кӀуахэм я цӀэхэр, Екъубрэ абы и къуэхэмрэ:
Екъуб и щыпэлъху Рубэн.
9Рубэн и къуэхэр: Хъанох, Палыу, Хъэцрон, Къармый.
10Симеон и къуэхэр: Емуел, Ямин, Охад, Яхин, Цохар, Ханаан бзылъхугъэм и къуэ Шаул.
11Лэуий и къуэхэр: Гъэршэн, Къохат, Мэрарый.
12Иудэ и къуэхэр: Ер, Онан, Шэлэ, Пэрэц, Зэрахь; Еррэ Онанрэ щылӀащ Ханаан щӀыналъэм.
Пэрэц и къуэхэт Хэцрон, Хъамул.
13Иссашхар и къуэхэр: Толэ, Пуа, Яшуб, Щимрэн.
14Зэбулун и къуэхэр: Сэрэд, Елон, Яхьлэел.
15Ахэр Леа и къуэхэу Паддан-Арам Екъуб къыщыхуилъхуахэрщ; Динэ, абы и пхъур. Леа къуэрэ пхъууэ иӀащ цӀыху щэщӀрэ щырэ.
16Гад и къуэхэр: Цыфион, Хьагъый, Шуный, Ецбон, Ерый, Ародый, Арэлый.
17Ащэр и къуэхэр: Имнэ, Ишуэ, Ишыуй, Бэрие, абыхэм я шыпхъу Сэрахь. Бэрие и къуэхэр: Хъэбэр, Малхъыел.
18Ахэр Лабан ипхъу Леа иритауэ щытыгъа Зилпа и къуэхэщ. Абы ахэр Екъуб къыхуилъхуащ, цӀыху пщыкӀух хъууэ.
19Екъуб и фыз Рахэл и къуэхэр: Исуфрэ Биниаминрэ.
20Мысыр щӀыналъэм Исуф къыщыхуэхъуащ Мынасэрэ Ефраимрэ, Он къалэм щыщ тхьэгъэпс Потиферахь ипхъу Асэнат къилъхуахэр.
21Биниамин и къуэхэр: Бэлахь, Бэхэр, Ащбэл; Гъэрэ, НаӀаман, Ехьый, Рощ, Мупим, Хъуппим, Ард.
22Ахэр Рахэл и къуэхэу Екъуб къыхуэхъуахэрщ, псори цӀыху пщыкӀуплӀ хъууэ.
23Дан и къуэр: Хьушым.
24Нафталый и къуэхэр: Яхцэел, Гъуный, Ецэр, Щылэм.
25Ахэр Лабан ипхъу Рахэл иритауэ щытыгъа унэӀут бзылъхъугъэ Билхьэ и къуэхэщ. Абы ахэр Екъуб къыхуилъхуащ, псори цӀыхуибл хъууэ.
26Екъуб и гъусэу Мысырым кӀуа цӀыхухэр, езым къытехъукӀахэр, Екъуб и къуэхэм я фызхэр хэмыту, псори хъурт цӀыху хыщӀрэ хырэ. 27Исуф и къуэхэу абы Мысырым къыщыхуэхъуахэр цӀыхуитӀ хъурт. Екъуб и унагъуэм щыщу Мысырым кӀуахэр псори зэхэту цӀыху блыщӀ хъурт.
Екъуб Мысырым щыщ Гощэн щӀыгум зэритӀысхьар
28Екъуб Иудэ езым япэ Исуф деж игъэкӀуащ, езы Исуф Гощэн хэкум хуэкӀуэ гъуэгур къаригъэлъагъун папщӀэ. 29Гощэн щӀылъэм къыщыкӀуэм, Исуф шыгур зэщӀригъэщӀэри, Гощэн щӀыналъэм кӀуащ, езым и адэ Израил пежьэну. Ар къыщилъагъум, и адэм и пщэм зридзэри, куэдрэ гъащ Исуф. 30Абдежым жриӀащ Израил Исуф:
– СылӀэнщ иджы сэ, уи напэр къэслъагъужауэ; уэ иджыри узэрыпсэур сдъэгъуащи.
31ИтӀанэ яжриӀащ Исуф и къуэшхэми, и адэми, я унагъуэхэми:
– Сэ сыкӀуэнщ, фирхьэуным хъыбар езгъэщӀэнщ, жесӀэнщ абы: «Ханаан щӀыналъэм къикӀа си къуэшхэри си адэм и унагъуэри къэкӀуащ си деж. 32А цӀыхухэр мэлыхъуэхэщ, Ӏэщ зэрахуэ; я Ӏэщ цӀыкӀуи я Ӏэщышхуи, яӀэ псори къыздашащ абыхэм».
33– Фирхьэуным фриджэу: «Сыт фи ӀэщӀагъэр фэ?» – жиӀэрэ къывэупщӀмэ, 34фэ жыфӀэ: «Дэ, уи унэӀутхэр, дыӀэщыхъуэщ дыщыщӀалэм къыщыщӀэдзауэ иджыри къэс, дэри ди адэхэри», фэ Гощэн щӀыналъэм фыщагъэтӀысын папщӀэ. Мысыр цӀыхухэм я дежкӀэ гуемыӀущ дэтхэнэ мэлыхъуэри.
Currently Selected:
1 Мусэ 46: KbdNTGP2017
Highlight
Copy
Compare
Share
Want to have your highlights saved across all your devices? Sign up or sign in
© Библиер зэдзэкӀыным елжь Институт, 1993, 2007, 2011, 2017
